මොනරාගල – බිබිල මාර්ගයේ 4/32 බෝක්කුව (නක්කල වත්ත හංදිය) අසලදී ඉකුත් වසරේ දෙසැම්බර් 23දා සිදුවූ රිය අනතුරින් මියගිය යතුරුපැදියේ පසුපැදිකරුවූ කාන්තාවගේ මරණය ඇයගේ පැරණි පෙම්වතා විසින් සිදු කළ මනුෂ්‍ය ඝාතනයක් බවට විමර්ශනවලදී හෙළිවී ඇතැයි මොනරාගල මූලස්ථාන පොලිසියේ රථවාහන අංශයේ ස්ථානාධිපති ජානක රත්නසිරි මහතා පැවසීය.
මෙම අනතුරෙන් මිය ගියේ දඹගල්ල, කෝට්ටගල පදිංචි අමිතා ජීවමාලී (37) නමැති එක්දරු මවකි.
ඇය ආයුර්වේද දෙපාර්තමේන්තුවේ බහුකාර්ය සේවිකාවක ලෙස කටයුතු කරමින් සිට ඇති අතර, පළමු විවාහයෙන් වෙන්වීමෙන් පසු මොනරාගල, බිබිල පාර තුන්වන පටුමගේ පදිංචි හතළිස් දෙහැවිරිදි රියැදුරෙකු සමඟ අවුරුදු 5ක පමණ කාලයක් අනියම් ප්‍රේම සම්බන්ධතාවයක් පවත්වාගෙන යමින් කුලී නිවසක එකට ජීවත්වී දෙදෙනා අතර නිතර ආරවුල් ඇති වීම නිසා මෑතකදී ඔහුගෙන් වෙන්වී රියැදුරෙකු වන තවත් අයකු සමඟ අනියම් ප්‍රේම සම්බන්ධතාවයක් පවත්වාගෙන ගොස් තිබේ.
ඒ බව දැනගත් පැරණි පෙම්වතා ඇයට සහ ඇගේ වත්මන් පෙම්වතාට දුරකතනයෙන් සහ අවස්ථා කිහිපයකදී මරණ තර්ජනය කර ඇති බව පරීක්ෂණවලදී හෙළි විය.
ඉකුත් 23දා ඇය අලුත් පෙම්වතා වන බැරේගලකන්ද, සර්වෝදය, ඉහළකොස්ගම පදිංචි 37 හැවිරිදි පුද්ගලයා සමඟ යතුරුපැදියකින් බදුල්ල ප්‍රදේශයට යන බවට පැරණි පෙම්වතා දැන ගැනීමෙන් පසුව, යතුරුපැදියෙන් ඔවුන් දෙදෙනා මොනරාගල – බිබිල මාර්ගයේ මොනරාගල සිට නක්කල දෙසට යමින් සිටියදී වෑන් රථයකින් ඔවුන් ලුහුබැඳ ගොස් යතුරුපැදියේ පිටුපස හප්පා පලාගොස් ඇත.
අනතුරෙන් යතුරුපැදිය පැදවූ කාන්තාවගේ අලුත් පෙම්වතා සහ ඇය මොනරාගල දිස්ත්‍රික් මහ රෝහලට ඇතුළත් කිරීමෙන් අනතුරුව කාන්තාව මියගොස් තිබිණි.
පසුව එම වෑන් රථය බඩල්කුඹුර කරවිලපාරේ නිවසක් ඉදිරිපිට දමා ගොස් තිබියදී පොලිසිය මඟින් සොයාගෙන තිබිණි.
ඊට පසුදින (24) වෑන් රථයේ රියැදුරු සහ හිමිකරු වන වීරහැන්දිගේ ඉන්දික ප්‍රනාන්දු (42) නමැති අය නීතීඥවරයකු මාර්ගයෙන් මොනරාගල මහේස්ත්‍රාත් අධිකරණයට ඉදිරිපත් කිරීමෙන් අනතුරුව ජනවාරි 5දා දක්වා රක්ෂිත බන්ධනාගාරගත කර ඇත.
මෙම සිද්ධිය පිළිබඳව දීර්ඝ වශයෙන් විමර්ශනය කිරීමෙන් අනතුරුව මෙම අනතුර හිතාමතා ඉතා සැලසුම්සහගත ලෙස සිදුකළ මනුෂ්‍ය ඝාතනයක් බව පොලිසියට කරුණු අනාවරණය වී තිබෙන අතර, ඒ පිළිබඳව ඊයේ (04) මහේස්ත්‍රාත් අධිකරණයට පොලිසිය මඟින් කරුණු ඉදිරිපත් කිරීමට නියමිතව තිබිණි.
මොනරාගල මූලස්ථාන පොලිස් පරීක්ෂක පී.එස්. චාමින්ද සංජීව මහතාගේ උපදෙස් පරිදි, රථවාහන අංශයේ ස්ථානාධිපති ජානක රත්නසිරි මහතා වැඩිදුර පරීක්ෂණ පවත්වයි.
