දරුණු ප්‍රතිචාර දක්වන බවට ඉරානයෙන් අනතුරු ඇඟවීම්
පුද්ගලයන් සියයකට වැඩි පිරිසකට මරු කැඳවමින් පෙරේදා ඉරානයේ කෙර්මන් නුවරදී සිදු වූ ද්විත්ව බෝම්බ පිපිරීමට අමෙරිකාව සහ ඊශ්‍රායලය වග කිව යුතු බව ඉරාන ජනාධිපති ඉබ්‍රාහිම් රයිසිගේ දේශපාලන නියෝජිත මොහොමඩ් ජම්ෂිඩි එක්ස් (එවකට ට්විටර්) පණිවුඩයකින් ප්‍රකාශ කර ඇතැයි වාර්තා වේ. අමෙරිකාව හෝ ඊශ්‍රායලය ඊට සම්බන්ධ නැති බවට බෝම්බ පිපිරීමේ සිදුවීමෙන් පසුව නිවේදනයක් නිකුත් කරමින් අමෙරිකාව ප්‍රකාශ කළ බව ‘ෆ්‍රාන්ස් 24‘ පුවත් සේවය වාර්තා කළේය. අමෙරිකාව කිසිදු ආකාරයකින් ඉරාන බෝම්බ සිදුවීමට සම්බන්ධ නැති බවත්, ඊශ්‍රායලය ඊට සම්බන්ධ බවට විශ්වාස කළ හැකි කිසිදු හේතුවක් නැති බවත් අමෙරිකා රාජ්‍ය දෙපාර්තමේන්තුවේ ප්‍රකාශක මැතිව් මිලර් ප්‍රකාශ කර තිබිණි. එමෙන්ම එය අයිඑස් ත්‍රස්ත ප්‍රහාරයක් විය හැකි බව ද අමෙරිකාව සඳහන් කර ඇතැයි වාර්තා වේ. මේ වන විට ඊශ්‍රායලයේ අවධානය මුළුමනින්ම යොමුවී ඇත්තේ හමාස් සංවිධානයට එරෙහි යුද්ධයට බව මේ පිළිබඳ ප්‍රකාශයක් නිකුත් කරමින් ඊශ්‍රායල හමුදා ප්‍රකාශක ඩැනියෙල් හගාරි ද සඳහන් කර තිබේ. මේ අතර බෝම්බ ප්‍රහාරයට වගකිව යුතු පුද්ගලයන්ට දරුණු ප්‍රතිචාර දක්වන බව ඉරානයේ ආධ්‍යාත්මික නායක අයතුල්ලා අල් කමේනි ප්‍රකාශ කර ඇතැයි ද වාර්තා වේ. 
ටෙහ්රාන් අගනුවරට ගිනිකොන දෙසින් කිලෝමීටර් 800ක් දුරින් කෙර්මන් නගරයේ පිහිටි හිටපු හමුදා ජෙනරාල්වරයකු වූ කසීම් සොලේමාන්ගේ සොහොන අසල පැවැති සිව්වැනි ගුණානුස්මරණ උත්සවයේදී එම බෝම්බ පිපිරී ගිය අතර, පුද්ගලයන් 200කට වැඩි පිරිසක් තුවාල ලබා රෝහල් කර කර තිබිණි. බෝම්බ අටවා ඇත්තේ ගමන් මළු දෙකක බවත්, දුරස්ථ පාලකයක් භාවිත කරමින් එය පුපුරුවා හැර ඇති බවත් මූලික විමර්ශනවලින් හෙළි වී තිබේ.
ජෙනරාල් කසීම් සොලේමාන්ගේ සිව්වැනි ගුණානුස්මරණ උත්සවය පැවැති ඔහුගේ සොහොන්ගැබට මීටර් 700ක් දුරින් පළමු බෝම්බය පිපිරී ඇති අතර, මිනිත්තු 15කට පසුව දෙවැනි බෝම්බය පුපුරා ගොස් ඇත්තේ කිලෝමීටරයක් පමණ දුරකින් බව එරට මාධ්‍ය වාර්තා කළේය. ඒ අනුව එම බෝම්බ පුපුරුවා හැර ඇත්තේ ජෙනරාල්වරයා සිහි කිරීමේ උත්සවයට පැමිණි ජනතාව ඉලක්ක කරමින් බවත් ඉරාන මාධ්‍ය වාර්තා කළේය.
1998 සිට ඉරානයේ ඉස්ලාමීය විප්ලවීය හමුදාවේ ප්‍රධානියා ලෙස කටයුතු කළ ජෙනරාල් කසිම් සොලේමාන් 2020 වසරේ ජනවාරි 3 වැනිදා නිල සංචාරයක් සඳහා ඉරාකයේ බැග්ඩාඩ් ගුවන්තොටුපොළ වෙත පැමිණි අවස්ථාවේ එල්ල වූ අමෙරිකානු ඩ්‍රෝන ප්‍රහාරයකින් ජීවිතක්ෂයට පත්වූ අතර, ඔහු ලොව අංක එකේ ත්‍රස්තවාදීයා ලෙස එවකට අමෙරිකාවේ හිටපු ජනාධිපති ඩොනල්ඩ් ට්‍රම්ප් ප්‍රකාශ කර තිබිණි. එම සිදුවීමත් සමඟ ඉරානය සහ අමෙරිකාව අතර උද්ගත වූ උණුසුම් වාතාවරණය මේ වන විටත් පවතින බව ද වාර්තා වේ.
