අමෙරිකාවේ කොලරාඩෝ ප්‍රාන්තයේ ශ්‍රේෂ්ඨාධිකරණයට මහ රෑ කඩා වැදුණු නාඳුනන පුද්ගලයකු පොලිසියට වෙඩි තබා එහි පියගැට පෙළකටත් ගිනි තබා ඇතැයි විදෙස් මාධ්‍ය වාර්තා කළේය. පෙරේදා අලුයම 1.15ට පමණ මේ සිදුවීම වී ඇති අතර, සැකකරු අත්අඩංගුවට ගෙන අධිකරණයට ඉදිරිපත් කළ බව කොලරාඩෝ පොලිසිය ප්‍රකාශ කර තිබේ.
මේ වසරේ පැවැත්වෙන අමෙරිකාවේ ජනාධිපතිවරණයට තරග වැදීමට හිටපු ජනාධිපති ඩොනල්ඩ් ට්‍රම්ප් නුසුදුසු බවට තීන්දු කරනු ලැබුවේ ද කොලරාඩෝ ශ්‍රේෂ්ඨාධිකරණයෙන් වන අතර, නාඳුනන පුද්ගලයා එම ගොඩනැඟිල්ලට ඇතුළුවීම සහ ට්‍රම්ප්ගේ තීන්දුව අතර සම්බන්ධතාවක් තිබේදැයි පොලිසිය විමර්ශනය කරමින් සිටින බව ද වාර්තා වේ.
44 හැවිරිදි සැකකරු බ්‍රෙන්ඩන් ඔල්සන් නමැති පුද්ගලයකු බවත්, ඔහු ශ්‍රේෂ්ඨාධිකරණ භූමියට ඇතුළු වී නිරායුධව සිටි ආරක්ෂක නිලධාරීන්ට පිස්තෝලයක් පෙන්වා එම ගොඩනැඟිල්ලේ යතුරු බලහත්කාරයෙන් ලබාගෙන ඊට ඇතුළුවී ඇති බවට තොරතුරු අනාවරණය වී තිබේ.
