ටයිටස් තොටවත්තයන් විසින් අධ්‍යක්ෂණය කළ සාගරිකා චිත්‍රපටය, මෙවර ජාතික රූපවාහිනියේ සිනෙ ඡායාවෙන් විකාශය වන්නේ ජනවාරි 05 වන සිකුරාදා වන අද දිනය. කළු සුදු, 35mm ප්‍රමාණයේ චිත්‍රපටයක් වන මෙය ශ්‍රී ලාංකේය සිනමාවේ 284 වැනි චිත්‍රපටය ලෙසින් තිරගත වූයේ 1974 වසරේ සැප්තැම්බර් මස 06 වැනිදාය. ටෝනි රණසිංහ සහ ශ්‍රියානි අමරසේන චිත්‍රපටයේ ප්‍රේමවන්තයන් වන අතර, ටෝනි රණසිංහ ‘අජිත්’ ලෙසින් රංගනයෙන් සම්බන්ධ වන විට ඔහුගේ පෙම්වතිය වන්නේ සාගරිකාය.
ධනවත් ව්‍යාපාරිකයකුගේ පුතකු වන අජිත් තම නිවසින් බැහැරව මොරගොල්ලාගම නම් ග්‍රාමයට යන්නට හේතුවක් තිබිණි. එනම් අජිත්ගේ පියා සිය බිරිඳ මිය යෑමෙන් පසු මැටිල්ඩා නම් වූ කාන්තාවක් යළි ආවාහ කරගැනීමයි. ඇයට දියණියක් ද වුන් අතර, මැටිල්ඩාගේ චරිතය නිරූපණය කරනු ලැබුවේ රුක්මණි දේවියය. ධනවත් ව්‍යාපාරිකයා වූ වික්‍රමරත්න වූයේ සෝමසිරි දෙනිපිටියයි.
නිවෙසින් බැහැර වූ අජිත් ගම්මානයට පැමිණීමේදී ඔහුට මුලින්ම හමුවන්නේ ගමේ ආරච්චිලය. අජිත් මඳ කලක් ගමේ සිටින විට ඔහුට තේරුම් යන කාරණාව වූයේ ගමේ චණ්ඩියෙක් මෙන් සිටින රත්නේ ගමේ දියුණුව වෙනුවෙන් කිසිවක් නොකරන බවය. ඔහුට ළඟින්ම ඉන්නා හිතවතකු ද ගමේම සිටී, ඔහු කඩේ මාමාය. කෙසේ වෙනත් ආරච්චිල, ගමේ පිරිස හා එක්ව අජිත් ගමේ දියුණුවේ කටයුත්තට අතගසනා විට ඔහුට ගමේම ඉන්නා තරුණියකට හිත බැඳේ. ඇය නමින් සාගරිකාය. කෙසේ වෙතත් අජිත්ගේ මෙකී කාරණාවට හරහට සිටින්නේ රත්නේය. මන්ද සාගරිකා කෙරෙහි රත්නේගේ සිතෙහි ද කැමැත්තක් ඇතිවී තිබීමය. මේ අතරවාරයේ අජිත්ගේ කුඩම්මාගේ දියණිය විවාහ වීමට සිටින පුද්ගලයා අජිත්ව ඝාතනය කිරීමට සැලසුමක් සකස් කර ගමට පැමිණීමේදී ඔහුට රත්නේව හමුව, ඝාතන සැලැස්ම භාර දෙන්නේ ඔහුටය. කුඩම්මාගේ දියණිය විවාහ කිරීමට සිටින පුද්ගලයා අජිත්ව ඝාතනය කිරීමට උත්සාහ කරනුයේ පවුලේ ඉඩකඩම් පිළිබඳ ප්‍රශ්නයක් හෙයිනි.
කෙසේ වෙතත් අවසානයේදී රත්නේගේ සැලසුම අජිත් ඝාතනය කර එහි වරද කුඩම්මාගේ, බෑනා මත පටවා ඔහුව පොලිසියට හසුකර දීමය. එහෙත් එය දැනගන්නා ඔහු රත්නේ බේරාගැනීමට ගමට පැමිණේ. චිත්‍රපටය ඉදිරියට ගලාගෙන යන්නේ මෙවන් පසුබිමකය.
ටයිටස් තොටවත්ත විසින් අධ්‍යක්ෂණය කරනු ලැබූ සාගරිකා චිත්‍රපටයේ නිෂ්පාදනය මෙන්ම කතාව එතල් රත්නායකගේය. දෙබස් කරුණාරත්න අබේසේකරගේ වන අතර, කැමරා අධ්‍යක්ෂණය ඇන්ඩෘ ජයමාන්නය.
චිත්‍රපටයේ ගීත 6ක් අන්තර්ගත වූ අතර, ගී පද කරුණාරත්න අබේසේකරගේය. අමිතා වැදිසිංහ, සනත් නන්දසිරි, ලතා වල්පොල, අතුල සෝමසිරි, ෆීලික්ස් ඇන්ටන්, අයිවෝ ඩෙනිස්, එම්. එස්. ප්‍රනාන්දු, රෙක්ස් කොඩිප්පිලි සහ ත්‍රී සිස්ටර්ස් මේ සඳහා ගායනයෙන් සම්බන්ධ විය. මෙහි විශේෂත්වය වන්නේ සමූහ ගායනයක් සඳහා රෙක්ස් කොඩිප්පිලි ද සම්බන්ධ වූ අතර, ෆීලික්ස් ඇන්ටන්ගේ පළමු චිත්‍රපට ගීත සම්ප්‍රාප්තිය ද වේ. සෝමදාස ඇල්විටිගලයන්ගේ සංගීතයෙන් හැඬවූ චිත්‍රපටයේ වේශ නිරූපණයෙන් එක්වූයේ ඊබට් විජේසිංහ සහ රංජිත් මතඟවීරයි.
සාගරිකා චිත්‍රපටයේ ප්‍රධාන නළු නිළි යුවළ ලෙසින් ටෝනි රණසිංහ සහ ශ්‍රියානි අමරසේන එක්වුවද මේ සඳහා තවත් නළු නිළි කැලක්ම එක්වූහ. රොබින් ප්‍රනාන්දු, රෙක්ස් කොඩිප්පිලි, සෝමසිරි දෙණිපිටිය, නීටා ප්‍රනාන්දු, රුක්මණි දේවි, ඩී. ආර්. නානායක්කාර, දෙනවක හාමිනේ, හියුගෝ ප්‍රනාන්දු, විමල් කුමාර ද කොස්තා ඉන් කිහිපදෙනෙකි.
අද දින චිත්‍රපටය විකාශය වීමට පෙර ප්‍රවීණ සිනමා විචාරක ගාමිණී වේරගම සහ අරුණ ගුණරත්නගේ විචාරයක් සමඟින් ද ඔබට එක්වීමට හැකිවන්නේ රාත්‍රී 9.30ටය. රාත්‍රී 10.00 සිට චිත්‍රපටය රසවිඳීමේ හැකියාව ඔබට ලැබෙනු ඇත.
