අලදෙණිය පොලිස් වසමේ ගෝනිගොඩ පිහිටි වළගම්බා රජ දවස ඉදිකරන ලද ඓතිහාසික ගල්ගාන රජමහා විහාරයේ තිබුණු ඝණ්ටාරය කිසියම් පිරිසක් විසින් සොරාගෙන ගොස් ඇති බව විහාරාධිපති කර්මාචාර්ය පිටවල ධම්මානන්ද හිමියෝ පවසති. ගල් පර්වතයක් මත ඉදිකරන ලද අඩි විස්සක් පමණ උසැති කුලුනු දෙකක් මත සවිකර තිබුණු මෙම ඝණ්ටාරය තමන් දන්නා පරිදි වසර සියයකටත් වඩා පැරැණි බවද ධම්මානන්ද හිමියෝ පැවසූහ. 
ඊයේ (21) දින විහාරස්ථානය වෙත ගිය අප හට ධම්මානන්ද හිමියෝ වැඩිදුරටත් අදහස් දක්වමින් කියා සිටියේ දිනපතා උදේ දවල් සහ සන්ධ්‍යා කාලයේ පවත්වන ආගමික පූජාවන්වලදී මෙන්ම විහාරස්ථානයේ සිට ගම්වාසින්ට පණිවිඩයක් ලබාදීමට ද මෙම ඝණ්ටාරය ශබ්ද කිරීම සිරිතක් වශයෙන් සිදු කරනු ලබන බවය. පසුගිය 17 වැනිදා පෙරවරුවේ සුපුරුදු පරිදි බුද්ධ පූජාව තැබීම පිණිස ඝණ්ටාරය ශබ්ද කිරීමට තමන්වහන්සේ ගිය අවස්ථාවේ එය කිසියම් පිරිසක් විසින් සොරාගෙන ගොස් ඇති බව දැනගත් බව උන්වහන්සේ කියා සිටියහ.
