තමා දැමූ රේස් ඔට්ටුවට දිනුම් ඇදුණු රුපියල් හයලක්ෂ පනස් දාහක මුදලක් (650,000) ලබා නොදී රේස් ඔට්ටු සමාගම වංචාවක් කළ බවට වැලිපැන්න ප්‍රදේශයේ පදිංචිකරුවෙකුගෙන් පැමිණිල්ලක් ලැබුණු බව වැලිපැන්න පොලිසිය පවසයි.
වැලිපැන්න, ගබඩා හන්දිය පදිංචි එම්.එල්.ඒ. සංජීව කුමාර නමැති 42 හැවිරිදි පුද්ගලයෙකු විසින් මෙම පැමිණිල්ල ඉදිරිපත් කර ඇත.
පසුගිය 8 වැනිදා වැලිපැන්න ගබඩා හන්දියේ පිහිටි, පිළියන්දල ප්‍රදේශයේ ස්ථාපිත රේස් ඔට්ටු සමාගමක් මඟින් පාලනය වන රේස් ඔට්ටු එකතුකිරීමේ මධ්‍යස්ථානයකින් තමා රුපියල් 1600ක මුදලක් ගෙවා අශ්වයන් 3 දෙනෙකුට රේස් ඔට්ටු ඇල්ලු බවත්, ඒ අනුව එක අශ්වයෙකුට 1010ක් ද, තවත් අශ්වයෙකුට රුපියල් 340ක් ද, ලෙස අශ්වයන් තිදෙනෙකුට ඔට්ටු දැමූ බවත් පැමිණිලිකරු පවසයි.
අනතුරුව 9 වැනිදා උදේ රේස් ඔට්ටු එකතුකිරීමේ මධ්‍යස්ථානයට ගිය විට රේස් ඔට්ටු ගෙන එන අය විසින් එම මධ්‍යස්ථානයෙන් පෙර දින දැමූ 1600ක ඔට්ටුවට රුපියල් හය ලක්ෂ පනස්දාහක මුදලක් දිනා ඇති බව රේස් බුකියේ අයට පවසන අයුරු සංජීව කුමාරට ද අසන්නට ලැබී ඇත.
පසුව රේස් බුකියේ අයගෙන් විමසූ විට තමාගේ ඔට්ටුවට මෙම විශාල මුදල ඇදී ඇති බව තහවුරු කරගෙන ඇත. එහෙත් ඊට පසු දිනත් තමාගේ දිනුම් මුදල් නොලැබීම නිසා විමසා බැලීමේදී ඔට්ටු කොළ පොඩිවී ඇති නිසා එම මුදල් නැවත රේස් බයි රේස් සමාගමට හරවා ගොස් ඇති බව පවසා ඇත.
පසුව රේස් ඔට්ටු බෙදාහැරීමේ කළමනාකරුවෙකු බව කියන අයෙකුගෙන් විමසීමේදී ද නිසි පිළිතුරක් නොලැබීම නිසා තමා මෙසේ පොලිසියේ පැමිණිල්ලක් දමා තමාට අයත් මුදල ලබාගැනීමට නීතියේ පිහිට පැතීමට කටයුතු කළ බව පැවසීය.
එම කළමනාකරුවන් පොලිසියට ගෙන්වා විමසීම් කළත්, ඔවුන් තමාගේ මුදල වංචා සහගත ලෙස නොගෙවා සිටින බැවින් තමාට සාධාරණයක් ඉටුකර දෙන ලෙසත්, කුලී වැඩ කරමින් ජීවත් වන තමා මේ වනවිට රිය අනතුරකට භාජනය වී ඇවිදීමටවත් නොහැකි තත්ත්වයක සිටින බවත්, රජයේ අනුමත රේස් ඔට්ටු පොළකින් දැමූ ඔට්ටුවට ලැබුණු මුදල තමාට ලබාදීමට කටයුතු කරන ලෙසත් සංජීව කුමාර වැඩිදුරටත් ඉල්ලා සිටී.
