ශ්‍රී ලංකා රේගු ඉතිහාසයේ වැඩිම ආදායම ඊයේ (21) වන විට උපයා ගැනීමට ශ්‍රී ලංකා රේගුව සමත් වී තිබේ.
මෙම වසරේ ජනවාරි සිට ඊයේ (21) දක්වා රුපියල් කෝටි 94,200ක් (බිලියන 942ක) උපයා ගැනීමට ශ්‍රී ලංකා රේගුවට හැකි වී තිබේ.
රේගුවට 2023 වසරේ රුපියල් බිලියන 894ක ඉලක්කයක් මුදල් අමාත්‍යාංශය මඟින් දෙවැනි වරට දී තිබූ අතර එම ඉලක්කය පසු කරමින් මෙම ඉලක්කය සපුරාගෙන තිබේ.
2018 වසරේ රේගු ඉතිහාසයේ වැඩිම ආදායම් උපයා ඇති වසර වන අතර එම වසරේ උපයා ඇති ආදායම රුපියල් බිලියන 924කි.
ඉදිරි සතිය තුළ රුපියල් බිලියන 950 ඉක්මවා යා හැකි බව මුදල් රාජ්‍ය ඇමැති රංජිත් සියඹලාපිටිය මහතා පැවැසීය.
රට මුහුණදී තිබූ අභියෝග හමුවේ මෙම ආදායම සොයා දීමට වෙහෙසුණු රේගු අධ්‍යක්ෂ ජනරාල් සරත් නෝනිස් මහතා ඇතුළු සමස්ත කාර්ය මණ්ඩලයට ස්තූතිය පුද කරන බව ද රාජ්‍ය අමාත්‍යවරයා පැවැසීය.
රංජිත් සියඹලාපිටිය මහතා මේ බව කියා සිටියේ ඊයේ (21) ශ්‍රී ලංකා රේගුවේ පැවැති නත්තල් කැරොල් උත්සවයට එක් වෙමිනි.
