බණ්ඩාරනායක සම්මන්ත්‍රණ ශාලාවේ වාහන විකිණීමේ ආයතනයක් පවත්වාගෙන යමින් ප්‍රාඩෝ වර්ගයේ ජීප් රියක් දෙන බව පවසා දෙදෙනකුගෙන් රුපියල් කෝටි හතරහමාරක මුදලක් වංචා කර පලා ගොස් සිටින ‘රීගල් සේල්ස් පුද්ගලික සමාගමේ’ හිමිකරුට රටින් පිටවීම තහනම් කරමින් කොළඹ අතිරේක මහේස්ත්‍රාත් අයි.එන්. රිස්වාන් මහතා ඊයේ (21) විදෙස් ගමන් තහනමක් පැනවීය.
මේ සිද්ධියේ ප්‍රධාන සැකකරු මේ වන විට ප්‍රදේශයෙන් පලා ගොස් ඇති අතර, රට හැර යෑමේ ප්‍රවණතාවක් මතුව ඇති බැවින් විදෙස් ගමන් තහනම් කිරීමේ නියෝගයක් පනවන ලෙස කුරුඳුවත්ත පොලිසිය අධිකරණයෙන් කළ ඉල්ලීමක් සැලකිල්ලට ගත් මහේස්ත්‍රාත්වරයා මේ නියෝගය නිකුත් කළේය. මෙලෙස විදෙස් ගමන් තහනම් වූයේ අංක 72, ගලේගෙදර, පුස්වැල්ලගොල්ල, බදුල්ල පදිංචි රත්නායක මුදියන්සේලාගේ අසංක රත්නායක නමැත්තාටය.
සිද්ධිය සම්බන්ධයෙන් කුරුඳුවත්ත පොලිසිය නඩු දෙකකට අදාළව සැකකරුවන් තිදෙනකු අධිකරණයට ඉදිරිපත් කළ අතර, එක් නඩුවක් සඳහා අයකුට රු. ලක්ෂ 10 බැගින් වූ ශරීර ඇප දෙකක් මත මුදාහැරීමට මෙහිදී අධිකරණය නියෝග කළේය. එලෙස ඇප මත මුදාහැරුණේ ‘රීගල් සේල්ස් පුද්ගලික සමාගමේ’ සහකාර කළමනාකාර උචිත ඉන්ද්‍රනීල වික්‍රමගේ, එහි මුදල් අයකැමි රාම් කුමාර් අවිනාෂ් සහ එම සමාගමේ ප්‍රධාන කළමනාකාර විජේපාල කුරුප්පු යන අයයි.
සිද්ධියට සම්බන්ධයෙන් අදාළ ආයතනයේ සේවක සේවිකාවන් හත් දෙනකුගෙන් ප්‍රකාශ සටහන් කරගත් අතර මේ නඩු දෙකෙහි ඉදිරි විමර්ශන සඳහා අපරාධ පරීක්ෂණ දෙපාර්තමේන්තුවට භාර දෙනු ලබන බවද පොලිසිය අධිකරණයට දැනුම් දුන්නේය.
සිද්ධියට අදාළව කුරුඳුවත්ත පොලිසියට පැමිණිලි කර තිබුණේ දීබැද්ද, පාණදුර පදිංචි පන්නිලගේ කිත්මින් විරංජන පෙරේරා සහ මඩපාත, ගාල්ල පදිංචි නොට්ටල්බද්ද මහවිදානගේ සම්පත් කොස්තා යන අයයි. වාහන විකිණීමේ වෙබ් අඩවියක පළ කර තිබූ දැන්වීමක සඳහන් වූ 2015 වර්ෂයේ ලියාපදිංචි කරන ලද ටොයෝටා ප්‍රාඩෝ වර්ගයේ රථයක් මිල දී ගැනීමට එහි වූ දුරකතන අංකයට කතා කළ බවත්, පසුව සනත් රත්නායක යන අය ඇමතුමට සම්බන්ධ වී අදාළ වාහනය පිළිබඳ විස්තර දුන් බවත් පළමු පැමිණිල්ලේ සඳහන් බව පොලිසිය අධිකරණයට කරුණු ඉදිරිපත් කළේය.
ඒ අනුව රුපියල් ලක්ෂ 340ක වටිනාකමකින් යුත් ඒ වාහනය මිල දී ගැනීමට දෙපාර්ශ්වයේ දීර්ඝ දුරකතන සංවාදවලින් පසු පැමිණිලිකරු ඔහුගේ මිතුරකුද සමඟ බණ්ඩාරනායක සම්මන්ත්‍රණ ශාලාවේ බ්ලොක් 2හි ස්ථාපිත කර තිබූ සැකකරුගේ ‘රීගල් සේල්ස් පුද්ගලික සමාගමේ’ කාර්යාලයට පැමිණ ඇත. පසුව අදාළ වාහනය පිළිබඳ ඡායාරූප සහ යතුරුද පෙන්වා පැමිණිලිකරුට විශ්වාසය තහවුරු කර ඇති සැකකරු, රුපියල් තුන්කෝටි තිස් ලක්ෂයක මුදල පැමිණිලිකරුගෙන් ගෙන ඔවුන්ට වාහනය නවතා ඇති ස්ථානයට යන ලෙසට දැනුම් දී ඇති අතර, එහිදී පැමිණිලිකරු වාහනය නවතා ඇති ස්ථානය ලෙස සඳහන් කළ තැනට ගොස් සිටියත් සැකකරු පැමිණ නැත. පැය ගණනක් බලා සිටියත් සැකකරු පැමිණ නැති බැවින් ඔහුගේ ජංගම දුරකතනයට ඇමතුම් ගත් පැමිණිලිකරුට ඒ දුරකතනය ක්‍රියා විරහිතව බව දැනගැනීමෙන් සැකයක් ඉපදී නැවත සැකකරුගේ කාර්යාලයට යෑමට පිටත්වීමේදී කාන්තාවක සහ පිරිමි පුද්ගලයකු “අනේ අපේ සල්ලි අරගෙන ගියා” යනුවෙන් පවසමින් හඬමින් පැමිණි බවත් පැමිණිල්ල සඳහන් කර ඇතැයි පොලිසිය අධිකරණයට වාර්තා කළේය.
ඒ අනුව මෙහි දෙවැනි පැමිණිල්ල ලෙස සැකකරුට රුපියල් එක්කෝටි විසිපන් ලක්ෂයක මුදලක් දුන් තැනැත්තා සිය බිරිය සමඟ පුවත්පත් දැන්වීමට අනුව අදාළ වාහනය මිල දී ගැනීමට පැමිණ ඇති බවත්, එහිදී පෙර පරිද්දෙන්ම ඔවුන්ගේ විශ්වාසය දිනාගත් සැකකරු අදාළ මුදල ගෙන කාර්යාලයේ වාඩි වී සිටින ලෙස ඔවුන්ට පවසා එහි පිටුපස දොරෙන් පැන ගොස් ඇති බවට කරුණු අනාවරණය වන බවත් පොලිසිය අධිකරණයට වාර්තා කළේය.
සැකකරු අදාළ මුදල රැගෙන සේවකයකුද සමඟ කාර්යාලයේ පිටුපස දොරෙන් එළියට ගොස් කුලී රියක නැඟී බණ්ඩාරනායක සම්මන්ත්‍රණ ශාලාවෙන් පිටතට පැමිණ, ඒ සේවකයා සහ වාහනය නැවත හරවා යවා ඔහු වෙනත් වාහනයක නැඟී පලා ගොස් ඇති බවට කරුණු අනාවරණය වන බව පොලිසිය අධිකරණයට දැනුම් දුන්නේය.
මේ සැකකරු සමාගම් අංක පී.වී. 00289805 යටතේ ඉකුත් 4 දා ‘රීගල් සේල්ස් පුද්ගලික සමාගම’ ආරම්භ කර ඇති අතර, 11 දා සිට කුලී පදනම මත කොළඹ බණ්ඩාරනායක සම්මන්ත්‍රණ ශාලාවේ වෙළෙඳ කුටියක් ගෙන ඇති බවත්, අන්තර්ජාලයේ පළ කළ දැන්වීමකට අනුව ඉකුත් 14, 15 දෙදින තුළ සම්මුඛ පරීක්ෂණයක් පවත්වා එම ආයතනයට සේවක සේවිකාවන් අට දෙනකු බඳවාගෙන ඇති බවත් කුරුඳුවත්ත පොලිසිය අධිකරණයට කරුණු ඉදිරිපත් කළේය.
සිද්ධියට අදාළව අත්අඩංගුවට ගත් සැකකරුවන් එම සමාගමේ නිලධාරීන් වන අතර ඔවුන්ගේ දැනුවත් භාවයෙන් මේ වරද සිදු කර ඇති බව පොලිසිය අධිකරණයට සැකකරුවන් ඉදිරිපත් කරමින් සඳහන් කළේය.
සැකකරුවන් වෙනුවෙන් අධිකරණයේ පෙනී සිටි නීතඥ මංජුල පතිරාජ මහතා:
“ස්වාමීනි, පුවත්පතක දැන්වීමක් පළ කර තිබුණා ආයතනයකට සේවකයන් බඳවාගන්නවා කියලා. ඒ නිසා ඒකට කතා කළාම මෙහි තෙවැනි සැකකරු තමයි මගේ සේවාදායකයා සම්මුඛ පරීක්ෂණයක් තියලා සේවයට අරගෙන තිබෙන්නේ. සේවයට පැමිණි දිනම ඉතා අවාසනාවන්ත ලෙස මේ සිදුවීම වුණා. මෙහි පළමු සැකකරු තමයි පැමිණිලිකරුවන්ගෙන් සල්ලි අරගෙන ගනින්න කියලා මගේ සේවාදායකයාට දීලා තියෙන්නේ. ඊට පස්සේ සල්ලි ගැනලා එයා සල්ලි ආපහු අසංකට දීලා. මගේ සේවාදායකයා එතැන පඩියට වැඩ කළා විතරයි. රස්සාවට ගිය දවසේම මෙහෙම වුණා. මේ අය ඉතා අහිංසක මිනිස්සු. ඒ නිසා සුදුසු ඇපයක් මත මුදාහරින ලෙස ඉල්ලා සිටිනවා.”
දෙවැනි සැකකරු වෙනුවෙන් අධිකරණයේ පෙනී සිටි නීතිඥ නලින් පතිරණ මහතා:
“ස්වාමීනි, මගේ සේවාදායකයා විදේශ රැකියාවක නිරත වෙලා මේ රටට ඇවිත් මාස හතරක් වෙනවා. පුවත්පත් දැන්වීමක් දැකලා ඒකට කතා කරලා මෙතැන සේවයට ආවා මුදල් අයකැමි ලෙස. පසුව ඔහු ඒ රැකියාවට ගිය පළමු දවසේ පුහුණුවක් දුන්නා. දෙවැනි දවසේ රැකියාවට ගියාම මේ සිද්ධිය වුණා. මේ අය ඉතාමත් අහිසංක මිනිස්සු. මේ අය මේ කිසිම දෙයක් ගැන දන්නේ නැහැ. එයාට සල්ලි ගනින්න කිවුවා. සල්ලි ගැනලා ආපහු දුන්නා. එච්චරයි එයා කළේ. ඒක එයාට පවරපු රාජකාරිය. සුදුසු ඇපයක් මත මුදාහරින ලෙස ඉල්ලා සිටිනවා.”
තෙවැනි සැකකරු වෙනුවෙන් අධිකරණයේ පෙනී සිටි නීතිඥ තේජිත කෝරළගේ මහතා:
“ස්වාමීනි, මගේ සේවාදායකයා විශ්‍රාමික 66 හැවිරිදි වියේ පසු වන පුද්ගලයෙක්. විශ්‍රාම ගියාට පස්සේ ආර්ථික ප්‍රශ්න නිසා ඔහු අන්තර්ජාලයේ දැන්වීමක් දානවා රැකියාවක් අවශ්‍යයි කියලා. ඒකට මේ ප්‍රධාන සැකකරු කතා කරනවා. පසුව මේ මාසේ පළමුවැනිදා රාජකාරියට එන්න කියලා කියනවා. මේ කාර්යාලයේ පුටු මේස ගන්න කාර්යාලයේ වැඩ කරගන්න සල්ලි එහෙම එයා මගේ සේවාදායකයාට දුන්නා. වාහන බයින් ඇන්ඩ් සෙලින් කරන ආයතනයක් කිවුවාට එහෙම එකක් පෙනුණේ නෑ. සිද්ධිය වූ දිනයේ ඔහු කතා කරලා මගේ සේවාදායකයාට කියනවා දඹුල්ල ආර්ථික මධ්‍යස්ථානය ළඟට යන්න, එතනට ගියාම වාහනයක් ගැන විස්තර කියන්නම් කියලා. ඒ සැකකරුම කුලී පදනම මත වාහනයක් දාලා දෙනවා දඹුලු යන්න. අන්තිමට දඹුල්ලේදී සැකකරුගේ ජංගම දුරකතනයට කතා කළත් ඒක අක්‍රිය නිසා මගේ සේවාදායකයා නැවත ආයතනයට ආවා. ඒ ආවාම තමයි මේ සිද්ධිය වුණේ. මගේ සේවාදායකයා සිද්ධිය වෙන අවස්ථාවේ එතැන හිටියේ නැහැ.”
ඉදිරිපත් වූ කරුණු සැලකිල්ලට ගත් අධිකරණය සැකකරුවන්ට ඇප නියම කරමින් සිද්ධියට අදාළ වැඩිදුර වාර්තා කැඳවීම ජනවාරි 8 දා තෙක් කල් තැබීය.
