මාරාන්තික රිය අනතුරකින් දියණියන් දෙදෙනකුට පිය සෙනෙහස අහිමි කරමින් පුද්ගලයකු අකල් මරණයට පත්වී ඇති පුවතක් පසුගිය 18 වැනිදා කඩවත පොලිසියෙන් වාර්තා වෙයි.
කඩවත 9කණුව ආසන්නයේ දී අසංවර රියැදුරකුගේ වරදින් මහමඟ ඇදවැටුණු සාලිය කුමාර මහතා මරණයෙන් මුදා ගැනීමට කවුරුන් හෝ සිටියා නම් හැකි වන බව ඔහුගේ වියෝවෙන් තැවෙන මවුපියෝ හැඬූ කඳුළින් පවසති. 
නව වසර උදාවීමට තව ඇත්තේ දින කිහිපයකි.දහසක් බලාපොරොත්තු පොදිබැඳ උදෑසන රැකියාවට ගිය ආදරණීය තාත්තා යළි නි‍ෙවසට එනතුරු මඟ බලසිටි දියණියන් දෙදෙනා සහ දයාබර බිරිය මධ්‍යම රාත්‍රියේ නින්දෙන් පිබිද තිබුණේ කඩවත පොලිසියෙන් ලද දුරකතන ඇමතුමකටය.
මාකොළ, උතුරු මාකොළ අංක 130/2/c දරන නිවසේ පදිංචිව සිටි සාලිය කුමාර මහතා ලංකා ගමනාගමන මණ්ඩලයේ කටුබැද්ද ඩිපෝවේ ගබඩා කම්කරුවකු ලෙස සේවයේ නිරතව සිටී. වයස අවුරුදු පනහක් වූ සාලිය කුමාර දියණියන් දෙදෙනකුගේ දයාබර පියෙකි. මවුපියන්ට දයාබර පුතෙක් මෙන්ම බිරිය රසාංගි ඉන්දිකාට දයාබර සැමියා ලෙස ඉතා හොඳින් වගකීම් ඉටුකළ පුද්ගලයෙකි. සහෝදර සහෝදරියන් සිව්දෙනෙකුගේ පවුලේ තුන්වැන්නා වූ සාලිය තම පවුලේ මෙන්ම මාකොළ ගමේ ද සමාජ සේවකයෙකි. ඔහුගේ අකල් වියෝව අසා එහි එන සැවොම මේ අවාසනාවන්ත මරණය කළ නොහික්මුණු පලා ගිය රියැදුරුට පමණක් නොව සිද්ධිය ඇසින් දකිමින් තුවාලකරු මහ පාරෙන් ඉවත් නොකළ මිනිස් සමාජයටම සාප කරති.
මේ අවාසනාවන්ත සිදුවීම ගැන සාලියගේ බිරිය රසාංගීගෙන් විමසූ අතර ඇය ඉතාම සංවේදීව මෙසේ පැවසුවාය.
Òමගේ මහත්තයා කුරාකූඹියකුටවත් වරදක් කරන කෙනෙක් නොවෙයි. එදා 18 වැනිදා රෑ අන්තිමට මට රෑ 10.00ට කෝල් කළා. දැන් කොළඹින් බස් එකේ නඟිනවා. පැයකින් එන්නම් කිව්වා. මම අවදියෙන් හිටියේ. මොහොතක් ඇස් පියවුණා විතරයි. කෝල් එකක් ආවා. කඩවත පොලිසියෙන් කතා කරන්නේ මහත්තයා ඇක්ෂිඩන්ට් වෙලා කඩවත පොලිසියට එන්න කීවා. අපේ ඥාති දරුවෙක් කඩවත පොලිසිය ආසන්නයේ ඉන්නවා. මං එයාට කෝල් කර මහත්තයා පොලිසියේ ඉන්නව ද බලන්න කිව්වා. එයා ඒ මොහොතේම එතැනට ගිහින් බලලා පොලිසියෙන් අහලා තිබුණා. එතකොට තමයි පොලිසියෙන් කියා තිබුණේ කඩවත 9කණුව ළඟදි වාහනේක හැපිලා තියෙනවා. අපිත් යතුරුපැදියේ එතැනට ගියේ කියලා. සුවසැරියෙන් ඇවිත් තුවාලකරු මියගිය බව සනාථ කළා කියලා.
ඒ මොහොතේ අපේ පුතා යාළුවො දෙන්නෙක් එක්ක ත්‍රීවිලර් එකකින් එතැනට යනකොටත් මුහුණකට හා නහය පුරා ලේ වැගිරෙනවා. තැළිලා පොඩිවෙච්ච මළ සිරුර තමයි දැකලා තිබුණේ. 
මහත්තයා පුරුද්දක් වශයෙන් 9 කණුවෙන් බැහැලා පුෂ්පාරාම පාරෙන් ගෙදර එන්නේ. එදත් එහෙම එන්න එනකොට තමයි පාර පනින්න අන්තිම පියවර දෙකේදී නොහික්මුණු රියැදුරෙක් මහත්තයා හප්පගෙන පලා ගිහින් තියෙන්නේ. අතක් පයක් කැඩිලා හරි මගේ දරුදෙන්නට තාත්තාගේ පණ ටික ඉතුරු වුණානම් අපට ඒ ඇති. අපි විවාහ වෙලා අවුරුදු 23ක්. කවදාවත් මගේ මහත්තයා අපි කාගෙවත් හිත රිදවලා නැහැ.
සතෙක් පාරේ දි හැපුණත් අපි එතැනින් අරන් පාර අයිනක තියනවා. මේ හැපුණේ මනුස්සයෙක්. මේ තරමට සමාජයෙන් මනුස්සකම නැති වෙලා ද දෙයියනේ.
අපට නැති වුණේ පුතෙක් නොවේ දෙවි කෙනෙක්. කවදාවත් කාගෙවත් හිත රිදවලා නෑ. මගේ පුතාට අනතුරක් කර පැනලා ගිය රියැදුරා නීතියෙන් අත්අඩංගුවට ගන්නේ කවද ද කියා අපි බලන් ඉන්නවා. මගේ පුතාට ආයෙත් පණ දෙන්න බැහැ. නමුත් සමාජයට මීට වඩා වගකීම් තියෙනවා. මාරාන්තික රිය අනතුරකදී හැමදේටම කලින් ලෙඩා රෝහල්ගත කරන්න. මහ පාරේ තවත් වාහනවලට යට නොවෙන්න තුවාලකරු එතැනින් අයින් කරන්න. මේ වගේ වැදගත් පණිවිඩ පොලිසිය හරහා ජනතාවට දෙන්න. මවුපියන්ගේ මළගමට කරගහන්න සිටිය දරුවා. අද අපේ කරමතින් ගෙනියන්න වුණායැයි 75 හැවිරිදි වයෝවෘද්ධ පියා ඉකි ගසමින් පැවසීය.
මෘත දේහය පිළිබඳ අධිකරණ වෛද්‍ය පරීක්ෂණය කර ඇති අතර 27 වැනිදා එම වාර්තාව ඥාතීන්ට දෙන බව රාගම රෝහලේ හදිසි මරණ පරීක්ෂණ අංශයේ නිලධාරීහු පැවසූහ. මියගිය සාලිය කුමාර මහතාගේ අවසන් කටයුතු ඊයේ (21) සවස මාකොළ නෙල්ලිගහ කනත්ත සූසාන භූමියේ දී සිදුකරන බව ඥාතීහු පැවසූහ.
