ඉන්දීය රජය මේ මස මුල් භාගයේදී අපනයනය තහනම් කිරීමෙන් පසු එරට තොග වෙළෙඳපොළේ ලොකු ලූනු මිල 50%කින් පහත වැටී ඇතැයි විදෙස් මාධ්‍ය වාර්තා කළේය.
කිලෝව ඉන්දීය රුපියල් 40ක්ව තිබූ එරට තොග මිළ රජයේ අපනයන තහනමත් සමඟ රුපියල් 20 දක්වා පහත වැටී ඇතැයි ද, එම මිල ස්ථාවර තත්ත්වයේ පැවැතීම හෝ තවදුරටත් පහත වැටීම ඉදිරියේදී තීරණය වනු ඇතැයි ඉන්දියාවේ ලූණු වෙළෙඳ හිමියන් ප්‍රකාශ කර ඇතැයි ද වාර්තා වේ.
මේ වන විට ඉන්දියාවේ ලූනු ගොවියන් අපනයනය තහනමට එරෙහිව උද්ඝෝෂණය කරමින් සිටින බවත්, ඉදිරියේදී ඉන්දීය රජය එම තීරණය පිළිබඳ සලකා බලනු ඇති බවත් වැඩිදුරටත් වාර්තා වේ. අපනයනය තහනම හේතුවෙන් එරට ලොකු ලූනු මිල පහත වැටුණද, එම තහනම හේතුවෙන් ආසියාවේ රටවල් රැසක ලොකු ලූනු මිල ඉහළ ගොස් ඇතැයි රොයිටර් පුවත් සේවය වාර්තා කළේය. නේපාලය, ශ්‍රී ලංකාව, බංග්ලාදේශය, මැලේසියාව සහ එක්සත් අරාබි එමීර් රාජ්‍ය ඇතුළු රටවල් රැසකට ඉන්දීය ලොකු ලූනු හිඟයෙන් දැඩි බලපෑම් එල්ල වී ඇතැයි රොයිටර් පුවත් සේවය වාර්තා කළේය.
