ජනාධිපති සම්මානලාභිනී 2020 වසරේ හොඳම ගායිකාව වූ ප්‍රවීණ ගායන ශිල්පිනි ආචාර්ය නන්දා මාලනියගේ ජීවිත කතාව ඇසුරෙන් නිර්මාණය කරන ලද ගීතයක් පසුගිය දින ජනගත කෙරිණි. ‘ජීවිතේ ඇය තනුව වැයුවේ නමැති’ මෙම ගීතය රචනා කරන ලද්දේ මාධ්‍යවේදී සංජීව බෝපේආරචිච් විසිනි. ගැයුමට එක්වුණේ ආචාර්ය රෝහණ වීරසිංහයන් සමඟ නිලක්ෂි හැලපිටියයි.
‘කල්‍යාණමිත්තතා’ සිතුවම් දැක්ම
එච්.ඩබ්. කුමාරතුංගගේ පුද්ගල සමාජභාවය පිළිබඳ ‘කල්‍යාණමිත්තතා’ සිතුවම් දැක්ම අද (22) පෙ.ව 9.30 සිට සවස 6 දක්වා කොළඹ, හෝර්ටන් පෙදෙසේ පිහිටි, දෘශ්‍යකලා විශ්වවිද්‍යාලයීය ජේ.ඩී.ඒ. පෙරේරා කලාගාරයේදී පැවැත්වේ. සමාජය තුළ විද්‍යමාන හා අපට නොපෙනෙන ගැටලු චිත්‍රමය වශයෙන් මුදා හැරීම තුළින් පීඩනයට පත් ආන්තික ප්‍රජාවන් පිළිබඳ සමාජයට අවබෝධයක් දීම සහ ආන්තික ප්‍රජාවන්ට සුව පහසුවෙන් ජීවත් විය හැකි සමාජයක් නිර්මාණය කිරීම මෙහි අරමුණ යැයි සිතුවම්කරු පවසයි.
ඔස්ට්‍රේලියාවේ වෙසෙන අපේ චිත්‍ර ශිල්පියා
ඔස්ට්‍රේලියාවේ වෙසෙන මහේෂ් අලුත්ගේ චිත්‍ර ශිල්පියෙකි. විශිෂ්ට කලාකරුවෙකු වීමට අවශ්‍ය සියලු ලක්ෂණ ඔහු සතුව පවතී. මුල් කාලයේ ඔහු ප්‍රධාන වශයෙන් අඟුරු, පැන්සල්, බෝල්පොයින්ට් පෑන් සහ පැස්ටල් භාවිතයෙන් චිත්‍ර නිර්මාණයේ යෙදුණේය. අඟුරු, පැන්සල් සහ පෑන් භාවිත කරන අධි යථාර්ථවාදය ඔහුගේ මුල් කලා කෘති බොහොමයක දක්නට ලැබිණි. මෙම චිත්‍ර නිර්මාණ ඔහුගේ ප්‍රාථමික හා ද්විතීයික පාසලේ ඉතා ජනප්‍රිය වූ අතර ඔහුගේ වෘත්තීය ජීවිතයට විශාල වාසියක් ලබා දුන්නේය. මහේෂ් බ්‍රිස්බේන්හි නැඟී එන දෘශ්‍ය කලාකරුවන්ගෙන් කෙනෙකු බවට පත්ව ඇත. එහිදී ඔහු බොහෝ දුරට අන්තර්ජාලය හරහා තම සිතුවම් අලෙවි කරන අතර ගෘහ කලාගාරයක් ද පවත්වාගෙන යයි. ඔහුගේ ප්‍රියතම විෂයයන් වන්නේ ආලේඛ්‍ය චිත්‍ර, භූමි අලංකරණය සහ ජලයයි.
‘‘සහජයෙන් එන දක්ෂතාවක් තියෙනවා නම්, ඒ මත ලොකු ආයාසයක් නැතුව සියුම් දේවල් කරන්න පුළුවන්. හොඳ ‘ඇහැක්’ තියෙන එක විශේෂ වාසියක් වෙනවා.
ඔස්ට්‍රේලියාව වගේ රටක වෘත්තියමය චිත්‍ර ශිල්පියෙක් වීම අවදානම් වැඩක්. වෘත්තියමය නිපුණතාවයක සීමාවන් තිබෙනවා. චිත්‍ර ශිල්පියෙක්ට එහෙම කිසිම දෙයක් නෑ, සියල්ල අතහැරලා වෘත්තීය චිත්‍ර ශිල්පියෙක් වෙන එක නුවණට හුරු නෑ, හැබැයි කරන්න පුළුවන් කෙනාට කාලයක් යනකොට අදහසක් එනවා.
වෙස් මංගල්‍යයක්
මහියංගණය ශ්‍රී සරසවී කලා ආයතනය වාර්ෂිකව පවත්වනු ලබන වෙස් මංගල්‍යය පසුගිය දින සොර බොර අශෝකාරාම විහාරස්ථානයේදී විශේෂ ආරාධිත අමුත්තන් සහ මවුපියන්ගේ සහභාගිත්වයෙන් පැවැත්විණි. නර්තනාචාර්ය රුවන්තී විජේසිංහ, පුලස්ති පරාක්‍රම හා අනුසි අභයරත්න යටතේ ශිල්ප හැදෑරූ පිරිමි ළමුන් 8ක් සහ ගැහැනු ළමයින් 26කින් සමන්විත තිස් හතර දෙ‍ෙනකු වෙස් සහ ශීර්ෂ පලඳින ලදි. සරසවි කලායතනයේ දරුවන් 125ක් අතරින් ජ්‍යෙෂ්ඨත්වය අනුව මෙම වෙස් පැලඳීම හා ශිර්ෂ පලඳනාව සිදු කරන ලදී.
නම්මුනිගේ අඩවිය අද
ජ්‍යෙෂ්ඨ මාධ්‍යවේදී සමන් ප්‍රියංකර නම්මුණිගේ විසින් ආරම්භ කරන්නට යෙදෙන ‘නම්මුනිගේ අඩවිය’ නම් සමාජ ජාලය ආරම්භ කිරීමේ උත්සවය මේ මස 22 වන දින සවස තුනට ජාතික චිත්‍රපට සංස්ථාවේ ජෝ අබේවික්‍රම ශාලාවේදී පැවැත්වේ. මුද්‍රිත මාධ්‍ය, රූපවාහිනී මාධ්‍ය හා සමාජ මාධ්‍ය ජාලාවල සාමාජිකයින් ඇතුළු කලාකරුවන් රැසකගේ ප්‍රධානත්වයෙන් මෙම උත්සවය පැවැත්වීමට සියලු කටයුතු සූදානම් කර ඇත. වසර තිහකට වැඩි කලක් මාධ්‍යවේදියෙකු ලෙස කටයුතු කරන සමන් හට අප ද සුභ පැතුම් ගෙන එන්නෙමු.
සංගීත ප්‍රසංගයයි සිහින මංසලයි
ප්‍රවීණ රූපවාහිනී සහ ගුවන් විදුලි නිවේදකයෙකු, පුවත්පත් කලාවේදියෙකු, ග්‍රන්ථ කර්තෘවරයෙකු, චිත්‍රපට හා ටෙලිනාට්‍ය නළු, ‘කටහඬ’ නිර්මාතෘ, මාධ්‍යවේදී ශ්‍රීමත් ඉන්ද්‍රජිත් ලියනගේ මහතා දශක තුනක පමණ කාලයක සිට ඉදිරිපත් කරන ‘සවනට ගී මධු’ ගුවන්විදුලි වැඩසටහනට සමගාමීව පැවැත්වූ සංගීත ප්‍රසංගය ඔහුගේ උපන් දිනය යෙදුණු පසුගිය 11 වැනිදා කෝට්ටේ ශාන්ත තෝමස් විද්‍යාලයීය රඟහලේදී පැවැත්විය.
නවකතා, සන්නිවේදනය යන විවිධ පැතිකඩයන් ඔස්සේ ග්‍රන්ථ 35කට අධික ප්‍රමාණයක් රචනා කර තිබෙන ඔහුගේ කව් ගී එකතුවක් වන ‘සිහින මංසල’ ග්‍රන්ථය එළිදැක්වීමද එදින සිදු විය. ඊට අමතරව ‘පැටිකිරිය’ ග්‍රන්ථයේ නව මුද්‍රණය එළි දැක්වීමද සිදු විය. සවනට ගී මධු චිත්‍රාංගය ඔස්සේ සිදු කළ සුවිශේෂී කටයුත්තක් ලෙස එල්ෆින්ස්ටන්, ටවර් රඟහල ආදියෙහි ප්‍රසංග ගණනාවකම එළිදැක්වීමත් දැක්විය හැකිය.
ප්‍රේමණීය නත්තල ජාතික රූපවාහිනියේ
ජාතික රූපවාහිනියේ ජ්‍යෙෂ්ඨ වැඩසටහන් නිෂ්පාදිකා තරංගී අතුරුලියගේ නිර්මාණ අධ්‍යක්ෂණයෙන් හා නිෂ්පාදනයෙන් යුත් ‘ප්‍රේමණීය නත්තල’ විශේෂාංග සංගීතමය වැඩසටහන මේ මස 25 වැනිදා රාත්‍රී 9.30ට ජාතික රූපවාහිනියෙන් විකාශය කෙරේ.
කීර්ති පැස්කුවල්, ලහිරු පෙරේරා, ලක්ෂ්මන් හිල්මි, ගයාන් ගුණවර්ධන, සූරියා දයාරුවන්, ආදිත්‍යා වැලිවත්ත, සිතාරා මදුෂානි, ශානි නානායක්කාර, උපේකා නිර්මාණී සමඟ කොච්චි ගායක කණ්ඩායම ඇතුළු ජනප්‍රිය කලාකරුවන් සමඟ නව පරපුරේ රැසක් ගීත ගායනයෙන් එක් වන ‘ප්‍රේමණීය නත්තල’ සංගීතවත් වන්නේ විශේෂ කාර්ය බළකායේ පොලිස් පරීක්ෂක HAMP කරුණාරත්න ප්‍රමුඛ බටහිර වාද්‍ය කණ්ඩායමෙනි. සනත් පෙරේරා, සුගත් පන්නිලගේ සහ පද්මසිරි ගුණතිලක ශබ්ද පරිපාලනයෙන් එක් වූ මෙහි පසුතල නිර්මාණය කෝකිල විජේසුන්දරගෙනි. ආලෝකකරණය චතුර ඒකනායක සහ චානුක ප්‍රභාශ්වර ගෙනි. සහාය අධ්‍යක්ෂණයෙන් ප්‍රසන්න හෙට්ටිආරච්චි එක්වූ ප්‍රේමණීය නත්තල ඉදිරිපත් කිරීම නව පරපුරේ ජනප්‍රිය තාරකාවක් වන නෙත්මී රොෂෙල් සමඟ පබසර විතානගේ ගෙනි.
දරුවන්ගේ කලා කුසලතා ඇගැයෙන ‘ආනන්දා ගී රංගා’
දෙවසරකට වරක් ආනන්ද විද්‍යාලය විසින් පවත්වනු ලබන ‘ආනන්දා ගී රංගා’ ප්‍රසංගය මෙවරත් අති උත්කර්ෂවත් අන්දමින් පැවැත්වේ. මෙය දෙසැම්බර් 18 වැනිදා ආරම්භ කළ අතර ලබන 23 දින දක්වා විද්‍යාලයීය කුලරත්න ශ්‍රවණාගාරයේදී පුරා දින 06ක් පැවැත්වේ.
10 වැනි වරටත් පවත්වන මේ ප්‍රසංගයෙන්, සාහිත්‍යය, කලාව රසවිඳින්නට ප්‍රාථමික දරුවා හුරු කිරීමත්, අනාගතයේ සමාජගතවීමේදී සෞන්දර්යාත්මක මෙන්ම මානව ගුණදහම්වලින් පිරිපුන් පෞරුෂයක් සහිත දරුවකු බිහි කිරීමත් ‘ආනන්දා ගී රංගා’ හි මූලික අරමුණයි.
‘ආනන්දා ගී රංගා’ විචිත්‍රවත් කිරීමට විද්‍යාලයේ විදුහල්පති, සහකාර විදුහල්පති, ගුරු මණ්ඩලය, කළමනාකරණ ඒකකය කටයුතු යොදා ඇති අතර අධ්‍යාපන අමාත්‍යාංශයේ අනුග්‍රාහක දායකත්වය ද නොමඳව ලැබේ.
වසර 137ක විද්‍යාලයීය ප්‍රෞඪ ඉතිහාසයේ අභිමානය ද ආරක්ෂා කර ගනිමින් නොයෙක් වෙනස්කම්වලට භාජනය වෙමින් වසර ගණනාවක් තුළ පවත්වාගෙන ආ ‘ආනන්දා ගී රංගා’ ප්‍රසංගයේ ප්‍රාසාංගික බව වඩාත් ඉස්මතු කරලීමට මෙවරද විශේෂ නර්තන, ගායන අංග රැසක්ම ඇතුළත් කර තිබේ.
චරිතාංග රඟන නිරෝෂන්
සුරංග ලක්මාල් සෙනෙවිරත්න මහතාගෙන් රංගනය හදරා රංගන ක්ෂේත්‍රයට පැමිණෙන නිරෝෂන් වත්තේගම ‘හොඳ වැඩේ, ධරණී, කියාදෙන්න ආදරේ තරම්, පිච්ච මල සුවඳයි, ටීචර් අම්මා, කකුළුවෝ සහ මකුළුවෝ මැස්සා, KEY, තත්ත්පරයක් දෙන්න’ නාට්‍යයවල මෙන්ම පොහොය ටෙලිනාට්‍යය කීපයකට ද ප්‍රධාන චරිතයෙන් රංගන දායකත්වය ලබා දී ඇත.
එරංග තිලකරත්නගේ ‘ද ඩිසිෂන්’, ගයාන් කහවත්තගේ ‘නිහඬ ගිර’ යන ටෙලි නාට්‍යයවලද නාලක නිශාන්ත කුරුප්පුගේ ‘පැටීගේ කතා මාලාවෙන්’ ‘බන්ටි’ චරිතයට ද පණ පොවයි. තවද නාලක නිශාන්ත කුරුප්පුගේ ‘ගුණේගේ කතා මාලාව’ ඉදිරියේදී විකාශනය වීමට නියමිතය.
සිංදු කියන කොමසාරිස්
ශ්‍රී ලංකා පුවත්පත් ආයතනයේ පුවත්පත් කොමසාරිස් යනු පරිපාලන තනතුරකි. ඔහු වෘත්තියෙන් පරිපාලන නිලධාරියකු වුවද ඔහු තුළ කවියකු, ගායකයකු කලාකරුවකු සැඟව සිටී. ඔහු නමින් නිරෝෂන් තඹවිටය. ඔහු දැන් ගායන ශිල්පියකු ලෙස තම ගායන දිවිය ආරම්භ කර තිබේ. ඔහු ගැයූ මුල්ම ගීතය ගායන ලෝකයේ බොහෝ විට කතා නොකරන පිය ගුණ පිළිබඳ ගීතයකි. එය “හිරු සඳු වගේ දෙපසින් දිලී” නම් වූ පිය ගුණ ගීතයයි.
හිරු සඳු වගේ දෙපසින් දිලී
අප සිත් නිවූ පියවරුනේ
ඇසුරෙන් මිදී ළය ඉකි බිඳී
ආදර සුවඳ පමණයි දැනෙන්නේ
මේ නිරෝෂන් ගැයූ ගීතයේ පළමු පද පෙළයි. මේ ඒ පිළිබඳව ඔහු අප සමඟ සිදු කළ පිළිසඳරයි.
* ඔබ ගැයූ ගීතය අද ඇසෙන වෙනත් ගීතවලට වඩා වෙනස් ඒ වෙනසට හේතුව කුමක්ද?
අද ඇහෙන ගීත බොහොමයක් ඒකාකාරියි. ඒ වගේම වඩාත් ඇහෙන්නේ විරහ ගීත නැතිනම්, ප්‍රේම ගීත. ඒත්, ලොකයේ ලොකුම සෙනෙහස වගේම උතුම්ම ආදරය වන වන පිය සෙනෙහස ගැන ගීත තිබෙන්නේ ඉතාමත් අඩුවෙන්. ඒත්, පියකු තුළ තිබෙන්නේ ලොකු ආදරයක්. ඒත්, ඒක බොහෝ විට ලෝකයට පෙනෙන්නේ නැහැ. මගේ පියා වෙනුවෙන් ගැයෙන ගීයක් වුණත් මේ තුළ ලෝකයේ සියලු පියවරු පිළිබඳ අගැයුමක් තිබෙන්නේ. පියකු කියන්නේ නොකා නොබී තම දරුවන් වෙනුවෙන් වැඩ කරන කෙනෙක් මගේ පියා මෙන්ම ලෝකයේ සෑම පියකුම ඒ වගේ උතුම් පිරිසක් අන්න ඒ දේ පෙන්වා දීම තමයි මේ ගීතයේ තේමාව වුණේ.
* මේ ගීතය නිර්මාණයට දායක වුණේ කවුද?
මම විවිධ අයගෙන් මගේ තේමාවට ගීත රචනා සෙව්වා. අන්තිමට මගේ සිතේ තිබූ අදහසට ගැළපෙනම ගීත රචනාව ලියා දුන්නේ ප්‍රවීණ ගීත රචක බණ්ඩාර ඇහැලියගොඩ මහතායි. ඒ ගීත රචනාවටම ගැළපෙන්න සංගීතය නිර්මණය කළේ නවරත්න ගමගේ මහතායි. ඇත්තෙන්ම මේ ගීතයේ සමස්ත ගෞරවයම මේ අයට අයිති වෙන්න ඕනෑ.
* පිය උපහාර ගීතයට ලැබෙන ප්‍රතිචාර කොහොමද?
ප්‍රතිචාර ඉතාමත් ඉහළයි. ඇත්තෙන්ම මේ ගීතය අද ඇහෙන ගීත රැල්ලෙන් වෙනස් වුණ ගීතයක්. තමන්ට පියා සමඟ ගත කළ අතීතය සිහිපත් වන බව මේ ගීතය අසන සැම දෙනා කියනවා. මේ ගීතය ඇත්තෙන්ම අතීතාවලෝකනයක් විදිහට හඳුන්වන්න පුළුවන්. උඩුගම් බලා යන ගීත ප්‍රයත්නයක් විදිහටත් මගේ මේ ගීතය පෙන්වා දෙන්න පුළුවන්.
වලාකුළෙන් මිදුණු සඳක්
බටේපොල මහා විද්‍යාලයේ ප්‍රධාන ශාලාව අලුත්වැඩියා කර ගැනීමේ අරමුණෙන් එම විද්‍යාලයීය නාට්‍ය අංශය ඉදිරිපත් කරන ‘වලාකුළෙන් මිදුණු සඳක්’ වේදිකා නාට්‍ය අද (22) දහවල් 12 සහ සවස 2ට එම විද්‍යාලයීය ප්‍රධාන ශාලාවේදී රඟ දැක්වේ.
කෙටි චිත්‍රපට උලෙළක්
ජනාධිපති කාර්යාලය, ජනමාධ්‍ය අමාත්‍යාංශය සහ ජාතික චිත්‍රපට සංස්ථාව එක්ව ප්‍රථම වරට සංවිධානය කරන ලෙස්ටර් – සුමිත්‍රා අනුස්මරණ ජාතික කෙටි චිත්‍රපට උලෙළ අද ( 22) සවස 3ට කොළඹ රාජකීය විද්‍යාලයීය නව රඟහලේදී සම්භාවනීය අමුත්තන්, කලාකරුවන්, විද්වතුන් රැසකගේ සහභාගිත්වයෙන් පැවැත්වේ.
