පොලොන්නරුව විවිධ සේවා සමුපකාර සමිතියෙන් රුපියල් 44,54000ක් වටිනා සහල් ලබා ගෙන අගුරු චෙක්පත් ලබාදී වංචා කළේ යැයි කියන සිද්ධියක් සම්බන්ධයෙන් සැකපිට අධිකරණයට ඉදිරිපත් කළ කාන්තාවක් 20 වැනිදා දක්වා රිමාන්ඩ් කිරීමට මහර අතිරේක මහේස්ත්‍රාත් ජනිතා පෙරේරා මහත්මිය පෙරේදා (13) නියම කළේය.
මෙම සිද්ධිය සම්බන්ධයෙන් මහමැදගම, තලාතුඔය ප්‍රදේශයේ පදිංචි ඒ.එම්. සමුද්‍රා ශ්‍යාමලී කුමාරි නමැත්තිය එසේ රිමාන්ඩ් කිරීමට නියම විය. පොලොන්නරුව විවිධ සේවා සමුපකාර සමිතියේ කළමනාකාරිනිය බව කියන බැදිවැව, පොලොන්නරුව ප්‍රදේශයේ පදිංචි ජී.එම්. හේමලතා කුමාරි නමැත්තිය විසින් පැලියගොඩ විශේෂ අපරාධ විමර්ශන ඒකකයට කළ පැමිණිල්ල විමර්ශනය කර මෙම සැකකාරිය අධිකරණයට ඉදිරිපත් කර තිබිණි.
පෑලියගොඩ විශේෂ අපරාධ විමර්ශන ඒකකයේ සැරයන් (71453) ඩී.එම්.ඒ. කුමාර මහතා විසින් වැඩිදුර වාර්තාවක් මඟින් පැමිණිල්ල ඉදිරිපත් කරමින් මෙම සැකකාරිය මෙම සිද්ධියට සම්බන්ධ ප්‍රධාන සැකකරු වන හේමන්ත රත්නායක යන අය සමඟ අනියම් ඇසුරක් පවත්වා ගෙන යන අතර එම ප්‍රධාන සැකකරුගේ මෙම වංචනික කටයුතු සඳහා මෙම කාන්තාව මාර්ගයෙන් තවත් කාන්තාවන් හඳුනාගෙන විවිධ මුල්‍ය ආයතනවල ගිණුම් විවෘත කර ඒ සඳහා අගරු චෙක්පත් ප්‍රධාන සැකකරු මාර්ගයෙන් ලබාදී මෙම වංචා කටයුතු සිදු කර ඇති බව පැවසීය.
මෙම සිද්ධියට සම්බන්ධ ප්‍රධාන සැකකරුට එරෙහිව මෙවැනි විවිධ වංචා කටයුතු සිදු කිරීම සම්බන්ධව චෝදනා රැසක් ඇති බවත් මෙම නඩුව පොදු දේපොළ පනත යටතේ පවරා ඇති නඩුවක් වන බව සැරයන්වරයා අධිකරණය හමුවේ පැවසීය.
මෙම සිද්ධිය සම්බන්ධයෙන් තවත් සැකකරුවන් අත්අඩංගුවට ගැනීමට විමර්ශන කටයුතු සිදු කරන අතර මෙම සිද්ධිය සම්බන්ධයෙන් මෙම සැකකාරියගෙන් බන්ධනාගාරය හරහා ප්‍රකාශයක් ලබා ගැනීමට අවසර ලබා දෙන ලෙසට සැරයන්වරයා වැඩි දුරටත් ඉල්ලා සිටියේය. කරුණු කෙරෙහි අවධානය යොමු කළ මහේස්ත්‍රාත්වරිය මෙම සැකකාරිය රිමාන්ඩ් කිරීමට නියම කර මෙම සිද්ධියට අදාළව සැකකාරියගෙන් බන්ධනාගාරය හරහා පෑලියගොඩ විශේෂ අපරාධ විමර්ශන ඒකකයේ නිලධාරීන්ට ප්‍රකාශයක් ලබා දීමට නියම කළේය.
