ව්‍යාපාරවලින් ලාභ නොපෙන්වා බදුවලින් හැංගෙන ආකාරය කියා දෙන මෙරට පිහිටි වරලත් ගණකාධිකරණ ආයතන 27ක් හඳුනාගෙන ඇතැයි පාර්ලිමේන්තු කටයුතු පිළිබඳ ජනාධිපති ජ්‍යෙෂ්ඨ උපදේශක ආශු මාරසිංහ මහතා පැවැසීය.
මෙය ආර්ථිකයේ විශාල අර්බුදයක් බවත් රාජ්‍ය ආදායමට වැට බඳින එම ආයතනවල නිලධාරීන් පිළිබඳ සොයා බැලිය යුතු බවත් කී මාරසිංහ මහතා වැඩිපුර දූෂිත වී ඇත්තේ දේශපාලනඥයන්ට වඩා රාජ්‍ය නිලධාරීන් බව පැහැදිලි යැයිද සඳහන් කළේය.
සිරිකොත පක්ෂ මූලස්ථානයේ ඊයේ (14) පැවැති මාධ්‍ය හමුවේ දී අදහස් දක්වමින් ඒ මහතා මේ බව කීය.
එහිදී ආශු මාරසිංහ මහතා මෙසේද කීය.
බදු ආදායම් ලබා ගැනීමේ ආයතන වන රේගුව, ආදායම් බදු, සුරාබදු දෙපාර්තමේන්තු මඟින් මඟ හැරීමකින් තොරව බදු ආදායම එක් රැස් කර ගැනීමේ හැකියාව වර්ධනය වී තිබෙනවා. ඒවායේ රාජ්‍ය නිලධාරීන් නිවැරදි පරිදි බදු එකතු කර නොගෙන මගහරිනවා නම්, එයට විරුද්ධව නඩු පැවරීමේ හැකියාව පිළිබඳ සාකච්ඡා වෙමින් තිබෙනවා.
බදු එකතු කිරීමේ දී තමන් විසින්ම පුරවා තමන් ගෙවිය යුතු බදු ප්‍රමාණය සටහන් කර දැක්වීමට තිබෙනවා. ආදායම් බදු එකතු කරන ෆයිල් දාහක් අරන් බැලුවොත් ඒ දාහටම උපදෙස් දීම සිදු වන්නේ චාර්ටඩ් එකවුන්ටන්සි ආයතන විසි හතකින්. බදු හංගන විදිහ ලාභ නොපෙන්වා ඉන්න ආකාරය පිළිබඳ උපදෙස් දෙන්නේ මෙන්න මේ ආයතන විසිහත විසින් කියන එක පැහැදිලිව පෙනෙන්නට තිබෙනවා. මේ රාජ්‍ය ආදායමට වැට බඳින ආයතන විසි හතේ නිලධාරීන් ගැන මාධ්‍යවේදීන් වන ඔබ සොයා බැලිය යුතුයි. දේශීය ආදායම් දෙපාර්තමේන්තුවේ හෝ කස්ටම් එකේ හෝ හිටපු නිලධාරීන් ඉක්මනින් විශ්‍රාම ගිහිල්ලා දැන් කොහෙද වැඩ කරන්නේ කියන එක සොයා බැලිය යුතුයි. මේ ආර්ථිකයේ තියෙන විශාලම අර්බුදය මේක කියන එක පැහැදිලිව පේනවා. අප ආයතන 39ක් පාර්ලිමේන්තුවට ගෙනල්ලා මේ පිළිබඳ සමාලෝචනයක් කළ පසු මේ පිළිබඳ දැන ගත්තා. ආයතන විසි හතක් මඟින් මේ කාරණා සිද්ධ කරමින් සිටින බව හෙළිදරව් කරගත්තා.
එනිසා මේ සිද්ධිය නිරීක්ෂණය කිරීමේ දී පෙනී යන්නේ වැඩියෙන්ම දූෂිත වෙලා තිබෙන්නේ දේශපාලනඥයන්ට වඩා රාජ්‍ය නිලධාරීන් කියන එක පැහැදිලිව පේනවා. තමන්ගේ දරුවන්ව ජාත්‍යන්තර පාසල්වලට යවලා, විදේශවලට යවලා මේ රාජ්‍යදාම මංකොල්ලකන්න උත්සාහ කරන නිලධාරීන් පිළිබඳ අප අවබෝධයෙන් සිටිය යුතු වෙනවා. සියයට 75ක් ආදායම් බදු සහ අනෙකුත් බදු එකතු කරන නිලධාරීන් හොඳින් ඒ කාර්යය කරද්දී සියයට 25ක් පමණ දෙනා සමාගම් 27කට සේවය කරනවා නම්, අප සූදානම් ඔවුන් පිළිබඳ සොයා ගන්න. දිනපතා අප බදු ආදායම් පිළිබඳ විමසිල්ලෙන් ඉන්නවා. ඒ පිළිබඳ ගණනය කිරීම් කෙරෙනවා. අද වන විට බිලියන 2541 බදු ආදායමක් එකතු කරගෙන තිබෙනවා. ඒ වගේම බදු නොවන ආදායම බිලියන 250කට ආසන්න ප්‍රමාණයක් රැස් කරගෙන තිබෙනවා. බදු එකතු කිරීම් සිද්ධ වෙනවා. මේ බදු මගහැරීමට සහ පැහැර හැරීමට උදව් කරන නිලධාරින් සම්බන්ධ විශේෂ පරීක්ෂණ කටයුතු සිදු කරන බව අප දැනුම් දෙන්නට කැමතියි.
