වයස අවුරුදු 35ට අඩු ජනගහනයෙන් සියයට 15ක් දියවැඩියාවෙන් ද, සියයට 35ක් අධික රුධිර පීඩනයෙන් පෙළෙන බව සමීක්ෂණ වාර්තාවලින් අනාවරණය කර ඇත. ඊට ප්‍රධාන හේතුව ශරීර සුවතාව පිළිබඳ වැඩි උනන්දුවක් නොදැක්වීම බව 2021-2022 වර්ෂවලදී සෞඛ්‍ය අමාත්‍යාංශය විසින් කළ සමීක්ෂණ දත්ත මඟින් පැහැදිලි කර ඇත.
වාර්ෂිකව සිදු වන මරණවලින් සියයට 80කට හේතුව බෝ නොවන රෝග සහ එහි සංකූලතා බව සොයා ගෙන ඇත.
මෙම කරුණු අනාරවණය වූයේ සෞඛ්‍ය අමාත්‍යංශ පරීශ්‍රයේ ස්ථාපිත කළ ශරීර සුවතා ඒකකය සෞඛ්‍ය අමාත්‍යංශයේ ලේකම් විශේෂඥ වෛද්‍ය පාලිත මහීපාල මහතා අතින් විවෘත කිරීමේ උත්සවයේදීය.
සෞඛ්‍ය අමාත්‍යංශයේ කාර්ය මණ්ඩලයේ ශරීර සුවතාව පිළිබඳ වැඩි අවධානයක් යොමු කර සෞඛ්‍ය අමාත්‍යංශයේ මානව සම්පතෙහි ගුණාත්මකභාවය වැඩිදියුණු කිරීම අරමුණු කර ගනිමින් මෙම ශරීර සුවතා ඒකකය ස්ථාපිත කෙරිණි.
ලෝක සෞඛ්‍ය සංවිධානයේ මුල්‍යාධාර මත මෙම ශරීර සුවතා ඒකකය ස්ථාපිත කරන ලදී. මෙම ශරීර සුවතා ඒකකය මඟින් ශරීර සුවතාවය දියුණු කිරීම, බෝ වන රෝග පාලනය, ආතතිය අවම කර මානසික සුවතාවය දියුණු කිරීම අපේක්ෂා කරයි.
ඉදිරියේ දී මෙවැනි ශරීර සුවතා ඒකක රජයේ රෝහල් තුළද ස්ථාපිත කිරීමට සෞඛ්‍ය අමාත්‍යංශය සැලසුම් කර ඇත.
මෙම අවස්ථාවට සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන මහතා, සෞඛ්‍ය අමාත්‍යංශයේ අතිරේක ලේකම්වරුන්, නියෝජ්‍ය අධ්‍යක්ෂ ජනරාල්වරුන්, ජ්‍යෙෂ්ඨ සහකාර ලේකම්වරුන්, අධ්‍යක්ෂවරුන්, විශේෂඥ වෛද්‍යවරුන්, වෛද්‍යවරුන් සහ කාර්ය මණ්ඩලයේ පිරිසක් සහභාගී වූහ.
