කුරුණෑගල ඓතිහාසික රාජධානියට අයත් බව කියන බුවනෙකබාහු රජුගේ රාජසභා මණ්ඩපය ඩෝසර් කර කඩා දැමීමේ සිද්ධිය සම්බන්ධයෙන් කුරුණෑගල හිටපු නගරාධිපතිවරයා ඇතුළු පිරිසකට එරෙහිව නීතිපතිවරයා විසින් පවරා ඇති නඩුව කුරුණෑගල මහාධිකරණය හමුවේ ඊයේ (14) විභාගයට ගත් පළමු අවස්ථාවේදීම වරද පිළිගත් කුරුණෑගල හිටපු නගරාධිපති තුෂාර සංජීව විතාරණ ඇතුළු විත්තිකරුවන් පස් දෙනකුට කුරුණෑගල පළාත් බද මහාධිකරණ විනිසුරු ලාල් රණසිංහ බණ්ඩාර මහතා වසර තුනක බරපතළ වැඩ සහිත සිර දඬුවම් නියම කළේය.
සිර දඬුවමට අමතරව එක් එක් වගඋත්තරකරුවන් රුපියල් පනස්දහස බැගින්වූ දඩ මුදලක් ගෙවන ලෙසද එක් කෝටි 36 ලක්ෂයක වන්දි මුදලක් ගෙවන ලෙසද විනිසුරුවරයා විත්තිකරුවන්ට නියම කළේය.
කුරුණෑගල හිටපු නගරාධිපති තුෂාර සංජීව විතාරණ සමඟ හිටපු නාගරික කොමසාරිස් ප්‍රදීප් තිලකරත්න, හිටපු නාගරික ඉංජිනේරු චමින්ද බණ්ඩාර අධිකාරි, වැඩ පරීක්ෂක ඉලාලුඩීන් සුල්ෆිකාර්, බැකෝ යන්ත්‍ර ක්‍රියාකරු එස්.පී.ලක්ෂ්මන් ප්‍රියන්ත යන අයට එරෙහිව නීතිපතිවරයා විසින් මහාධිකරණය හමුවේ අධිචෝදනා පත්‍ර ගොනුකර තිබුණි.
කුරුණෑගල නගර මධ්‍යයේ පිහිටි පුරාවිද්‍යා වටිනාකමක් සහිත “බුවනෙකබා රාජ සභා මණ්ඩපය” සහිත ගොඩනැඟිල්ල කඩා ඉවත් කිරීමේ සිද්ධිය සම්බන්ධයෙන් මෙලෙස අධිචෝදනා ගොනුකර තිබේ.
හිටපු නගරාධිපතිවරයා ඇතුළු පිරිස ඊයේ දිනයේ අධිකරණය හමුවේ පෙනී සිටියහ.
මෙහි දී වගඋත්තරකරුවන් වෙනුවෙන් පෙනී සිටි ජනාධිපති නීතීඥ රියෙන්සි අර්සකුලරත්න මහතා අධිකරණයට කියා සිටියේ තම සේවාදායකයන් ඔවුන්ට එරෙහිව නීතිපතිවරයා විසින් ගොනු කර ඇති අධි චෝදනාවලට වරද පිළිගැනීමට සූදානම් බවය.මෙම ප්‍රකාශය සම්බන්ධයෙන් කරුණු දැක්වූ නීතිපතිවරයා වෙනුවෙන් පෙනී සිටි රජයේ අධිනීතීඥ මාධව තෙන්නකෝන් මහතා අධිකරණයට දන්වා සිටියේ වගඋත්තරකරුවන් පිරිස මෙම සිද්ධිය සම්බන්ධයෙන් සැකපිට අත්අඩංගුවට ගන්නා ලෙස කුරුණෑගල මහේස්ත්‍රාත් අධිකරණය මගින් සිතාසි නිකුත් කර ඇති බැවින් එම නියෝගය මෙහි දී ක්‍රියාත්මක කළ යුතු බවය. එසේම එල්ල කර ඇති අධි චෝදනා සම්බන්ධයෙන් වගඋත්තරකරුවන් වරද පිළිගැනීම ධනාත්මක තත්ත්වයක් වන බැවින් ඒ සම්බන්ධයෙන් ගනු ලබන අධිකරණ නියමයන් පිළිබඳ තම විරෝධතාවක් නොමැති බව ද රජයේ අධිනීතිඥවරයා දන්වා සිටියේය.
ඒ අනුව වගඋත්තරකරුවන් පිරිස අත්අඩංගුවට ගෙන රිමාන්ඩ් භාරයට පත්කර නඩුව විභාගයට ගැනීමට මහාධිකරණ විනිසුරුවරයා නියම කළේය.
එල්ල කර ඇති චෝදනා සම්බන්ධයෙන් වරද පිළිගන්නේ නම් නඩුව විභාගයට ගැනීමට එම පුරාවිද්‍යාත්මක ස්ථානයට සිදුව ඇති හානිය පිළිබඳ ගොඩනැඟිලි පර්යේෂණ ආයතනය විසින් පුරා විද්‍යා දෙපාර්තමේන්තුවට ලබා දී ඇති තක්සේරු වටිනාකම වන රුපියල් එක්කෝටි තිස්හය ලක්ෂයක මුදලක් අධිකරණයෙහි තැන්පත් කළ යුතු බවටද නියම කළ විනිසුරුවරයා ඒ සඳහා කාලය ලබා දෙමින් නඩු විභාගය මදකට කල් තැබීය.
ඒ අනුව වගඋත්තරකාර පාර්ශ්වය විසින් අදාළ මුදල සොයාගෙන විත් අධිකරණයෙහි තැන්පත් කිරීමෙන් පැය දෙකකට පමණ පසුව නඩු විභාගය නැවත ආරම්භ කෙරිණි.
මෙහි දී අධිකරණය හමුවේ කරුණු දැක්වූ රජයේ අධිනීතිඥ මාධව තෙන්නකෝන් මහතා පුරා විද්‍යාත්මක වටිනාකමක් සහිත මෙම ගොඩනැඟිල්ලට සිදු කර ඇති හානිය ඉතා බරපතළ වන අතර එය සිතා මතා සිදු කරන ලද හානියක් බව මනාව පෙනී යන බව ද ඒ බව ලැබී තිබෙන ඡායාරූපවලින් පවා පැහැදිලි වන බව ද සඳහන් කළේය. වගඋත්තරකරුවන් පිරිස මෙහි දී කිසිදු වගකීමකින් තොරව කටයුතු කර ඇති බව පෙන්වා දුන් මාධව තෙන්නකෝන් මහතා ඒ අනුව එල්ල කර ඇති චෝදනාවලට වරද පිළිගත්තද පුරා විද්‍යා පනතට අනුව ලබා දිය හැකි උපරිම දඬුවමක් වගඋත්තරකරුවන්ට ලබා දෙන ලෙස ඉල්ලා සිටින බව ද ඔහු ප්‍රකාශ කළේය.
ඉදිරිපත් කරන ලද කරුණු සැලකිල්ලට ගත් මහාධිකරණ විනිසුරු ලාල් බණ්ඩාර රණසිංහ මහතා මෙම සිද්ධිය මුළු රටේම ඉමහත් ආන්දෝලනයකට ලක්වූ සිද්ධියක් බව පෙන්වා දුන් අතර නගරයේ ප්‍රධාන පුරවැසියා වශයෙන් ජනතාවට ආදර්ශවත්ව කටයුතු කළ යුතු නගරාධිපතිවරයා මෙහි දී හැසිරී ඇත්තේ වගකීම් විරහිතව බව කියා සිටියේය.
ඒ අනුව වගඋත්තරකරුවන් පිරිස මෙරට වටිනා පුරා විද්‍යා ස්ථානයකට සිදු කර ඇති බරපතළ හානිය සැලකිල්ලට ගෙන මින් ඉදිරියට මෙවැනි හානි සිදු නොකිරීම සඳහා කිසිවකු යොමු නොවන ආකාරයට මෙවැනි දඬුවමක් නියම කරන බවට ප්‍රකාශ කළේය.
මෙම නඩුව කුරුණෑගල මහාධිකරණයේ දී ඊයේ පළමු වරට විභාගයට ගත් දිනයේදීම වගඋත්තරකරුවන් පිරිස අදාළ චෝදනා සම්බන්ධයෙන් වරද පිළිගැනීමත් එදිනම චෝදනා විභාගයට ගෙන තීන්දුව ප්‍රකාශයට පත් කිරීමත් විශේෂත්වයකි.
මෙම නඩු තීන්දුව දැක බලාගැනීමට හිටපු නගරාධිපතිවරයාගේ හිතවතුන් මෙන්ම විශාල පිරිසක් අධිකරණය වෙත පැමිණ සිටියහ. මේ හේතුවෙන් අධිකරණය වෙත විශේෂ ආරක්ෂාවක්ද යොදවා තිබුණි.
