මාර්තු 2 වැනිදාට යෙදෙන ශ්‍රී ලංකා ගුවන් හමුදාවේ 73 වැනි සංවත්සරය මෙවර උතුරු පළාත කේන්ද්‍ර කරගනිමින් යාපනය දිස්ත්‍රික්කයේ අභිමානවත් ලෙස සැමරීමට කටයුතු යොදා තිබේ.
මේ වැඩසටහන් අතරට යාපනය දිස්ත්‍රික්කයේ පාසල් 73ක යටිතල පහසුකම් සංවර්ධනය, පාසල් ළමයින්ගේ සෞඛ්‍ය ආරක්ෂිත වැඩසටහන්, විනෝද ක්‍රීඩා, දරුවන්ගේ දැනුම වර්ධනය කිරීමේ වැඩසටහන් ආදි විවිධ වැඩසටහන් මේ සංවත්සරය නිමිත්තෙන් යාපනය දිස්ත්‍රික්කයේ පැවත්වීමට පියවර ගෙන තිබේ.මේ වැඩසටහන් ක්‍රියාත්මක කිරීම පිළිබඳව උතුරු පළාත් ආණ්ඩුකාර පී. එස්. එම්. චාල්ස් මහත්මිය සහ ශ්‍රී ලංකාවේ ගුවන් හමුදාපති එයාර් මාර්ෂල් උදේනි රාජපක්ෂ මහතා අතර සාකච්ඡාවක් පෙරේදා (13) උතුරු පළාත් ආණ්ඩුකාර කාර්යාලයේදී පැවැත්විණි.
මෙහිදී ආණ්ඩුකාරවරිය සඳහන් කළේ මේ වැඩසටහන් යාපනය දිස්ත්‍රික්කයේ පැවැත්වීම පිළිබඳව සතුටු වන බවත්, ඒ සඳහා උපරිම සහාය දෙන බවත්ය.
මේ නිමිත්තෙන් මෙවරත් ශ්‍රී ලංකා ගුවන් හමුදාවේ පාපැදි සවාරිය අදියර කිහිපයක් ඔස්සේ පැවැත්වෙන අතර, ගුවන් හමුදාවේ කටයුතු පිළිබඳ ජනතාවට අවබෝධයක් ගැනීමට ගුවන් යානා පිළිබඳ ප්‍රදර්ශනයක් මෙන්ම එහි ක්‍රියාකාරීත්වය පිළිබඳ වැඩසටහන් ද සංවිධාන කර තිබේ.
ගුවන් හමුදාපතිවරයා මෙහිදී වැඩිදුරටත් පවසා සිටියේ ප්‍රදේශයේ ජනතාවටත්, දරුවන්ටත් නව අත්දැකීමක් ගත හැකි පරිදි 73 වන සංවත්සරය ඉතාම ඉහළින් සැමරීමට කටයුතු කරන බවයි.
