නැඟෙනහිර මුහුදේදී රෝගී වූ ඉන්දියානු නාවික හමුදා සාමාජිකයකු ප්‍රතිකාර සඳහා යොමු කිරීමට ශ්‍රී ලංකා නාවික හමුදා සහාය දී තිබේ.
ඉන්දියානු නාවික හමුදාවට අයත් INS Sahyadri නෞකාව ශ්‍රී ලංකාවට නැඟෙනහිර මුහුදේ යාත්‍රා කරමින් සිටියදී හදිසියේ රෝගී වූ එම නෞකාවේ සිටි ජ්‍යේෂ්ඨ නාවිකයකු හදිසි ප්‍රතිකාර සඳහා යොමු කිරීමට එම නෞකාවෙන් පෙරේදා ( 13) ත්‍රිකුණාමලය වරායට රැගෙන ආ අතර, එම නාවිකයා ප්‍රතිකාර සඳහා යොමු කිරීමට ශ්‍රී ලංකා නාවික හමුදා සහාය දීමට කටයුතු කෙරිණි.
ඉන්දියාවේ විශාකාපට්නම් වරායේ සිට පැමිණි මේ නෞකාවේ සිට හදිසියේ රෝගී වූ මේ නාවිකයා කඩිනම් ප්‍රතිකාර සඳහා ගුවන් මඟින් ඉන්දියාව බලා පිටත් කර හැරීමට පෙරේදා (13) ත්‍රිකුණමලය වරායට රැගෙන එන බවත්, ඒ සඳහා අවශ්‍ය සහාය දෙන ලෙසත්, ශ්‍රී ලංකාවේ ඉන්දීය තනාපති කාර්යාලයෙන් නාවික හමුදා මූලස්ථානයට දැනුම් දීමක් සිදු කර තිබුණි.
ඒ අනුව එම දැනුම්දීමට වහාම ප්‍රතිචාර දැක්වූ ශ්‍රී ලංකා නාවික හමුදාව මේ නෞකාවෙන් ත්‍රිකුණාමලය වරායට රැගෙන ආ අසාධ්‍ය තත්ත්වයේ සිටි ඉන්දීය නාවික හමුදා සාමාජිකයා කඩිනමින් චීන වරාය ගුවන්තොටුපොළට රැගෙන යෑමට නැඟෙනහිර නාවික විධාන රෝහලට අයත් වෛද්‍ය කාර්ය මණ්ඩලයක් සමඟ ගිලන් රථයක් යොමු කර තිබුණි. රෝගියාට ප්‍රථමාධාර දෙමින් කඩිනමින් චීන වරාය ගුවන්තොටුපොළට රැගෙන ගොස් වැඩිදුර ප්‍රතිකාර සඳහා ඉන්දියාවට රැගෙන යෑමට චීන වරාය ගුවන්තොටුපොළට පැමිණි ඉන්දීය ගුවන් හමුදා යානාවක් වෙත භාරදීමට කටයුතු කළ බව නාවික හමුදාව පවසයි.
