ගංගා ෆිල්ම්ස් ඉදිරිපත් කළ “ආදරයයි කරුණාවයි” චිත්‍රපටය තිරගත වූයේ 1965 අගෝස්තු මස 06 වනදා ලාංකේය සිනමා ඉතිහාසයේ 118 වන චිත්‍රපටය වශයෙනි. මෙම චිත්‍රපටය නිර්මාණය වූවා යැයි සඳහන් වන්නේ “එන්ගල් සෙල්වි” සහ “ලජ්වන්ති” චිත්‍රපට ඇසුරිණි.
මෙම චිත්‍රපටයේ ප්‍රධාන චරිත අතරට එක්වූයේ ගාමිණී ෆොන්සේකා සහ ක්ලැරිස්ද සිල්වාය. චිත්‍රපටය මේ වන විට තිරගත වී වසර 60කට ආසන්න කාලයක් ගත වුවද ඩබ්ලිව්.ඩී. අමරදේවයන් සංගීතවත් කළ මෙම ගීතය අදටත් පැරණි ගීත රසිකයන් අතර ජනප්‍රියය.
මලින් මලේ රේණු උරා
රඟ බමර සතර දිගන්තේ
රන්රසු දැල් රාව දිදී
මවයි සීන මධුර දසන්තේ.
ජීවනයේ…..
සැපත උදාකරන විලාසේ
මී බඳුනේ…
මූණ පෙනී සතුට සිනාසේ
ගී ගයලා මත්වීලා….
ඔද වීලා නැළවීලා සැනසීලා….
මෙහි විශේෂත්වය වන්නේ ගීතය පද රචනය කර තිබුණේ මහගම සේකරයන් විසින් වීමය. තරුණ තරුණියන් පිරිසක් ප්‍රිය සම්භාෂණ උත්සවයකදී ගායනා කරන මෙම ගීතයට හඬ මුසුකළේ නාරද දිසාසේකර, අමිතා වැදිසිංහ සහ මිල්ටන් පෙරේරාය. මෙහි තවත් එක් විශේෂත්වයක් වන්නේ එවක ගාමිණී ෆොන්සේකා සමඟ කරට කර තරගයක් දෙමින් තම රංගන හැකියාව පෙන්නුම් කළ ආනන්ද ජයරත්න විසින් චිත්‍රපටය අධ්‍යක්ෂණය කර තිබීමය. එහෙත් ඔහු විසින් චිත්‍රපටයේ ප්‍රධාන චරිතය ක්ලැරිස්ද සිල්වා සමඟ රඟපෑමට ආරාධනා කළේ ගාමිණී ෆොන්සේකාටය. ආදරයයි කරුණාවයි ප්‍රේක්ෂක ජනතාව අතර මහත් කතාබහට ලක් නොවූ චිත්‍රපටයක් වුවද අමරදේවයන්ගේ සංගීතය චිත්‍රපටය පුරා විසිර තිබිණි.
1950 දශකයේදී සිනමාවට පිවිසි ක්ලැරිස්ද සිල්වා රසිකයන් අතර ප්‍රචලිතව පැවතියේ මාතලන් චිත්‍රපටයේ කළ රංගනය වෙනුවෙනි. එම චිත්‍රපටයේදී ඇය ගීතයක් ගායනා කරමින් නර්තනයක් ඉදිරිපත් කළ හෙයින් ඇය ප්‍රසිද්ධ වූයේ ලාංකේය සිනමාවට නර්තනය කැන්දාගෙන ආ නිළිය ලෙසිනි.
චිත්‍රපටයේ අනෙකුත් නළු නිළි කැල වන්නේ වික්‍රම බෝගොඩ, ආනන්ද ජයරත්න, එම්.ඒ. බාලන්, පී.ටී. වික්‍රමසිංහ, ජෝ, මයිකල්, ඉරංගනී පෙරේරා, සීතා කුමාරි, ඇග්නස් සිරිසේන සහ ගංගා ෆනෑන්ඩුය. 35mm ප්‍රමාණයේ චිත්‍රපටයක් වූ “ආදරයයි කරුණාවයි” සිනමා පටය නිෂ්පාදනය කරනු ලැබුවේ ජී.ඩී.එස්. ෆනෑන්ඩු වන අතර අධ්‍යක්ෂණය ආනන්ද ජයරත්නගේය.
අද ජාතික රූපවාහිනියේ සිනෙඡායා තුළින් මෙවර ‘ආදරයයි කරුණාවයි’ චිත්‍රපටය විකාශය වීමට පෙර රාත්‍රී 9.30 සිට 10.00 දක්වා චිත්‍රපටය ආශ්‍රයෙන් පවත්වනු ලබන සිනමා විචාරයක් නැරඹීමේ අවස්ථාව ද ඔබට හිමිවනු ඇත. මේ සඳහා සම්බන්ධ වන්නේ ප්‍රවීණ රංගන ශිල්පී විජේරත්න වරකාගොඩ මහතා සහ ප්‍රවීණ සිනමා විචාරක ගාමිණී වේරගමය.
