හේමසිරි ලියනගේ ප්‍රත්‍යවලෝකනය සෙනසුරාදා

ජ්‍යෙෂ්ඨ කලාකරු හේමසිරි ලියනගේ මහතාගේ දසක හයක කළ මෙහෙවර ඇගැයීම සඳහා ඔහු රංගනයෙන් දායකත්වය ලබා දුන් චිත්‍රපට ත්‍රිත්වයක් කොළඹ ජාතික චිත්‍රපට සංස්ථා තරංගනී සිනමා ශාලාවේදී 16 දින ප්‍රදර්ශනය කෙරේ.

මධුර චාරිකා සිනමා පටය උදේ 10.30ට ද සංසාරණ්‍ය‍ෙය් දඩයක්කාරයා පස්වරු 1.30 සහ චන්ද කින්නරී සිනමා පටය රාත්‍රී 7.00 ද ප්‍රදර්ශනය කිරීමට නියමිත අතර මෙම සියලු දර්ශන නොමිලේ ප්‍රදර්ශනය කරේ.

මෙදින සවස පහට හේමසිරි ලියනගේ කලාකරුවාගේ කලා සේවය අගැයීම සඳහා කෙටි උත්සව සභාවක්ද පවත්වන අතර ඔහු විසින් ලියන ලද නාට්‍ය කෘති තුනක් එක් වෙළුමක් ලෙස එළිදැක්වීමද සිදු කෙරේ.

ආබාධ සහිත ප්‍රජාවගේ කලා මංගල්‍යය දෙසැම්බර් 18

ආබාධ සහිත ප්‍රජාවගේ කලා කුසලතාවයන් එළිදැක්වීමේ මංගල්‍යය දෙසැම්බර් මස 18 වන දින ප.ව 2.00 සිට 4.00 දක්වා කොළඹ එල්ෆින්ස්ටන් රඟහලේදී පැවැත්වේ.

මෙම ප්‍රසංගය පවත්වනු ලබන්නේ බුද්ධ ශාසන සහ ආගමික කටයුතු අමාත්‍යාංශය සහ ආබාධ සහිත ප්‍රජාවගේ සංස්කෘතික අයිතීන් ප්‍රවර්ධනය කිරීමේ කාර්යාංශය මඟින් වන අතර, මෙම ප්‍රසංගය පිළිබඳ සංකල්පය ආබාධ සහිත පුද්ගලයන්ගේ ඒකාබද්ධ පෙරමුණ විසිනි.

ගී ලොවට පිවිසෙන මහාචාර්යවරයා

කොතලාවල ආරක්ෂක විශ්වවිද්‍යාලයේ තාක්ෂණ පීඨයේ පීඨාධිපති මහාචාර්ය ප්‍රසන්න ප්‍රේමදාස මහතාගේ කුලුඳුල් ගීත නිර්මාණය වන සුවඳ තැවරූ හාදුවක් ගීතය අද (15) දා සවස 6.30ට සමාජ මාධ්‍ය ඔස්සේ ජනගත කිරීමට නියමිතයි. මෙහි පද රචනය විභීෂා මුතුකුඩ විසින් සිදු කර ඇති අතර සංගීත නිර්මාණය සිදු කර ඇත්තේ සුරේෂ් මාලියද්ද විසිනුයි. ප්‍රසන්න ප්‍රේමදාස මහතා කුඩා කාලයේ සිටම සංගීත ක්ෂේත්‍රයට ඇලුම් කළත් සිය ඉගෙනුම් සහ වෘත්තිය ජීවිතයේ කාර්යබහුලතාවය නිසා ඒ වෙනුවෙන් කාලය මිඩංගු කිරීමට අවස්ථාවක් නොලැබුණු බව කියයි. නමුත් වෘත්තිය ජීවිතයේ අපේක්ෂිත ඉලක්ක සම්පූර්ණ කිරීමෙන් අනතුරුව ලද විවේකය තුළ මෙම ගීත නිර්මාණය සංගීත ලෝකයට දායාද කළ බව ඒ මහතා පවසයි. ඉදිරියට තවත් ගීත කිහිපයක් නිර්මාණය කර ගීත ඇල්බමයක් නිකුත් කිරීම තම අපේක්ෂාව බව ඒ මහතා වැඩිදුරටත් පවසා සිටියේය.

මයාදැල මතුගමට එළයි

පිළිරූ, ගිම්හානය, අඳුරට පෙර, ආගන්තුකයා වැනි සම්මානනීය වේදිකා නාට්‍ය රැසක් නිර්මාණය කළ කපිල ගාමිණී ජයසිංහගේ නවතම නාට්‍ය නිර්මාණය වන මායා දැල දෙසැම්බර් මස 21 වන දින මතුගම ශ්‍රවණාගාරයේදී දර්ශනය වේ.

මතුගම ආනන්ද ශාස්ත්‍රාලයේ කැඩෙට් කණ්ඩායමට ආධාර පිණිස මෙම නාට්‍ය ප්‍රදර්ශනය කෙරේ.

වර්තමාන සමාජයේ සුලභ සහ අතිශය සුන්දර මාතෘකාවක් වූ ප්‍රේමය වස්තු විෂය කරගෙන තරුණ පරපුරට මහත් ආදර්ශයක් ලබා දෙන මෙම මායා දැල ඉතා විශිෂ්ට නාට්‍ය රසික ආදරයට පාත්‍ර වී තිබේ.

ජාතික රූපවාහිනියෙන් උපන් දින තෑග්ගක්

දිල්ෂාන් තමෙල් විසින් අධ්‍යක්ෂණය කර අමාලි තමෙල් විසින් තිර රචනය කරන ලද ‘උපන් දින තෑග්ග’ ඒකාංගික නත්තල් නාට්‍යය 2023 දෙසැම්බර් මස 24 වන දින පෙ.ව.11.00ට ජාතික රූපවාහිනිය තුළින් විකාශනය වේ. මෙම නිර්මාණය සඳහා ජනප්‍රිය රංගන ශිල්පීන් වන මනොහාරි විමලතුංග, නයනී රාමනායක, දමිත් ග්‍රේෂන් හා නවක ළමා නළු විදුන් හෙට්ටිආරච්චි රංගනයෙන් දායක වන අතර කඳාන හපුගොඩ ප්‍රදේශයේ දරු දැරියන් රැසක් මෙම ටෙලි නාට්‍යය සඳහා රංගන දායකත්වය ලබා දෙයි.

ලෝරන්ස්ගේ මනමාලි ගාලු යයි

ගාල්ල රිච්මන්ඩ් විද්‍යාලයීය ආදි ශිෂ්‍ය සංගමය සංවිධානය කරනු ලබන සුජීව ප්‍රියාල් යද්දෙහිගේ නාට්‍ය නිර්මාණය “ලෝරන්ස්ගේ මනමාලි” දෙසැම්බර් මස 17 වන ඉරිදා දින දර්ශන වාර දෙකක් සමඟින් සවස 3.30 සහ 6.30ට ගාල්ල හෝල් ඩී ගෝල් ශාලාවේ දී වේදිකාගත වේ.

දුලීකා මාරපන, මලී ජයවීර, සම්පත් ජයවීර, සුජීව ප්‍රියලාල් සහ හේමන්ත ප්‍රසාද් යන ජනප්‍රිය වේදිකා නළු නිළියන් මෙම නිර්මාණයට දායකත්වය ලබා දෙයි.

යාපනය සිනමා උලෙළ ඇරඹේ

යාපනය අන්තර්ජාතික සිනමා උලෙළ නව වැනි වරටත් 2023 දෙසැම්බර් 14වන දින ඇරැඹි අතර, එය 19 දා තෙක් යාපනයේ දී පැවැත්වේ.

මේ උලෙළෙන් තරුණ චිත්‍රපට නිෂ්පාදකයන් ඔවුන්ගේ මංගල චිත්‍රපට සහ කෙටි චිත්‍රපට ප්‍රදර්ශනය කිරීම හා ප්‍රවර්ධනය කිරීම සඳහා දිරිගන්වනු ලබයි. මෙවර උලෙළට රටවල් 27කින් කෙටි චිත්‍රපට, දිගු චිත්‍රපට සහ වාර්තා චිත්‍රපට 75කට අධික ප්‍රමාණයක් ඉදිරිපත් කෙරෙයි. එම රටවල් වන්නේ ඇෆ්ගනිස්ථානය, ආමේනියාව, ඔස්ට්‍රේලියාව, බංග්ලාදේශය, චෙක් රාජ්‍යය, ඩෙන්මාර්කය, පින්ලන්තය, ප්‍රංශය, ජර්මනිය, ඉන්දියාව, ඉරානය, ඉරාකය, ජපානය, ලැට්වියාව, ලිතුවේනියාව, නේපාලය, නෙදර්ලන්තය, පිලිපීනය, පෘතුගාලය, රුමේනියාව, රුසියාව, සිංගප්පූරුව, ස්පාඤ්ඤය, ශ්‍රී ලංකාව, ස්වීඩනය, ස්විට්සර්ලන්තය, අ‍ෙමරිකා එක්සත් ජනපදය සහ යුක්‍රේනයයි.

සමාරම්භක උලෙළ ඊයේ 14 වනදා යාපනය සංස්කෘතික මධ්‍යස්ථානයේදී ඇරැඹි අතර සම්මාන උලෙළ පැවැත්වෙන්නේ මේ මස 19 වැනිදා යාපනය රීගල් සිනමාහලේදීය.

දස්කම් රැසක් පිරි සංජීවනී

සංජීවනී විජේකෝන් වන ඇය නයිනමඩම මහා විද්‍යාලයේ සංවර්ධන නිලධාරීවරියක් ලෙස සේවය කරන්නීය. බෝයවලාන මහා විද්‍යාලයෙනුත් වික්‍රමශීලා ජාතික පාසලෙනුත් අධ්‍යාපනය ලැබූ ඇය පාලිත ලොකුපෝතාගම මහතාගෙන් නාට්‍යය හා රංග කලාව හැදෑරුවාය. සෞන්දර්යය විශ්ව විද්‍යාලයට ඇතුළත් වී ප්‍රාසාංගික කලාවේදී (විශේෂ) නාට්‍යය හා රංග කලාව උපාධිය හැදෑරූ ඇය ජයන්තා රණවක මහතා යටතේ අංගරචන ශිල්පී NVQ4 සහ අංග රචන ඩිප්ලෝමා පාඨමාලා හැදෑරුවාය.

අනතුරුව දයානන්ද ගුණවර්ධන මහතාගේ “නළු කීර්ති සභා” නාට්‍යය කණ්ඩායමට සම්බන්ධ වී කටයුතු කරන ඇය නරි බෑණා නාට්‍යයයේ ගම දුවගෙ චරිතයටත්, බක්මහ අකුණු නාට්‍යයයේ මැණිකාගේ චරිතයටත් පන පොවන්නීය. එමෙන්ම සුමින්ද කේ.ගුණරත්න මහතාගේ “කටුසු පාලිය” නාටකයේ අලිහාමිනේගේ චරිතයත්, ධම්මික හෙට්ටිආරච්චි මහතාගේ “මල් පිපුණොත් ගුටි කමු” නාටකයේ සුජා කුමරියගේ චරිතයත්, ජයන්ත කරුණාතිලක මහතාගේ “වස්ත්‍රයක් ඕනෑ” නාටකයේ රජ බිසවගේ චරිතයත් රඟ දක්වන්නීය. වේදිකා නාට්‍යයවලට අමතරව මැය ටෙලි නාට්‍යය සහ චිත්‍රපට සඳහා සහය ඇඳුම් නිර්මාණයත්, සහය අංග රචනයත් සිදු කරයි. අනුර මාධව ජයසේකර මහතා අධ්‍යක්ෂණය කළ “සඳට අහස ආදරෙයි” ටෙලි නාට්‍යයයේ සහය අංග රචනයත්, ප්‍රසන්න වණසිංහ මහත්මා අධ්‍යක්ෂණය කළ “ජීවිතයම ක්‍රිකට් වගේ” නාට්‍යයයේ සහ “හිමගිර නැඟ” ටෙලිනාට්‍යයයේ සහය අංග රචනයටත් සම්බන්ධ වූ ඇය “මහරජ ගැමුණු” චිත්‍රපටයේ ඇඳුම් නිර්මාණයටත්, “තාල” චිත්‍රපටයේ ඇඳුම් නිර්මාණයටත් සහය වූවාය.

පාසල් නාට්‍ය උලෙළේ දක්ෂයෝ මෙන්න

2023 සමස්ත ලංකා පාසල් නාට්‍ය උලෙළේදි මෙවර නව නාට්‍ය නිර්මාණ කේ.බී. හේරත් නාට්‍ය ජවනිකාවක් වන මායාදේවි – 2023 සමස්ත ලංකා හොඳම නිෂ්පාදනය, ප්‍රථම ස්ථානය – ශ්‍රී රාජසිංහ ජාතික පාසල, කොටිකාවත්ත හිමි කරගත්තේය.

එහිදී හොඳම අධ්‍යක්ෂණය, රංග වින්‍යාසය, රත්නා ලාලනී ජයකොඩි, හොඳම නිළිය මලිති නවෝද්‍යා, හොඳම වේදිකා පරිපාලනය – ඔශාන් කවිශ්ක ජූරියේ කුසලතා ඇගයුම් සම්මාන, රංගනය වෙනුවෙන්, ෆාතිමා රුශ්නා, පසිදු තාරක, ගගනි මදුලිශානි, චමත් ප්‍රතාප්, මලිදු පැහැසර හිමි කරගත්තාය.

ආනුෂංගික අංශ යටතේ, අංග රචනය – ඩිල්රංග පෙරේරා, වේදිකා පසුතල නිර්මාණය – මතීශ සිතුම් පෙරේරාට හිමි විය.

The Ruse End කොළඹ එයි

රොන්ස්ටන් සිංගරායර් ගේ The Ruse End කෙටි (ද රූස් එන්ඩ්) කෙටි චිත්‍රපටය එළඹෙන 17 වැනි ඉරුදින Colombo City Center Socpe සිනමා ශාලාවේ සවස 4 සහ 5 ට තිරගත වේ.

මෙම චිත්‍රපටය මීට පෙර රාගල ලක්මාලි සිනමාශාලාවේ ප්‍රේක්ෂක ප්‍රතිචාර මධ්‍යයේ ප්‍රදර්ශනය කෙරුණි. රොන්ස්ටන් මීට පෙරද කෙටි චිත්‍රපට කිහිපයක් නිමවා ඇත.

හදවතේ ප්‍රසංගය හෙට මහවැවදී

රටක් ගීතයෙන් සැනසූ සන්ෆ්ලවර්ස් ගායන ශිල්පී නෙල්සන් වාස්ගේ හදවත් සැත්කමට අවශ්‍ය මූල්‍ය ප්‍රතිපාදන ලබා ගැනීම සඳහා පවත්වනු ලබන හදවතේ ප්‍රසංගය දෙසැම්බර් 16 සෙනසුරාදා රාත්‍රී 9.00 සිට මහවැව මාලිගාවත්ත ක්‍රීඩා පිටියේදී පැවැත්වේ.

රන්ජන් රාමනායක, කුමාරසිරි පතිරණ, අජිත් මුතුකුමාරණ, පුන්සිරි සොයිසා, ධනපාල උඩවත්ත, චන්ද්‍රසේන හෙට්ටිආරච්චි, හෙලන් අත්තනායක, ඉන්ද්‍රජිත් දොලමුල්ල, මංජුල වර්ණකුලසූරිය ඇතුළු ශිල්පීන් මේ සඳහා එක්වෙති. සංගීතය මෙහෙයවනු ලබන්නේ නීල් වර්ණකුලසූරිය ප්‍රමුඛ සන්ෆ්ලවර්ස් තාල් විසිනි.

හඳගමගේ අල්බොරාදාට සම්මාන රැසක්

කතෝලික සිනමා පර්ෂදය සංවිධානය කළ සිග්නිස් උත්තමාචාර සිනමා ටෙලි සම්මාන උලෙළ පසුගියදා බණ්ඩාරනායක අන්තර්ජාතික සම්මන්ත්‍රණ ශාලාවේ දී පැවැත්විණි. එහිදී ප්‍රවීණ සිනමා අධ්‍යක්ෂක අශෝක හඳගම අධ්‍යක්ෂණය කළ අල්බොරාදා හොඳම චිත්‍රපටය ඇතුළු සම්මාන 11ක් හිමි කරගත්හ. 2021 හා 2022 වසර සඳහා පැවති සම්මාන උලෙළ නියෝජනය කරමින් 2022 වසර සඳහා අශෝක හඳගමට මෙවර සම්මාන 11 හිමිකර ගැනීමට හැකි විය.

හේනේගම ආදි සිසු ප්‍රතිභා

හේනේගම මධ්‍ය විද්‍යාලයීය ආදී සිසු සිසුවියන්ගේ දස්කම් දක්වන ප්‍රාසාංගික පෙළහර ආදි සිසු ප්‍රතිභා දෙසැම්බර් 30 වනදා සවස 3.30 සහ 6.30ට විදුහල් ප්‍රධාන ශාලාවේදී පැවැත්වේ.

මෙම ප්‍රසංගය සංවිධානය කරනු ලබන්නේ හේනේගම මධ්‍ය විද්‍යාලයීය ආදි සිසුන් විසිනි.

ගී හටන අද දහවල් 12ට

ජනමාධ්‍ය හා ප්‍රවාහන මහාමාර්ග ඇමැති ආචාර්ය බන්දුල ගුණවර්ධන මහතාගේ සංකල්පයක් යටතේ ශ්‍රී ලංකා ගුවන් විදුලි සංස්ථාවේ වෙළඳ සේවයේ සහ 121 සඳ ටීවී නාලිකාව එක්ව සංවිධානය කරනු ලබන නිශාන්ති රණතුංගගේ නිෂ්පාදනයක් වන පැදුරු සාජ්ජය ගී හටන ප්‍රසංගය අද 15 දහවල් 12ට ආනන්ද සමරකෝන් මැදිරියේදි පැවැත්වේ. ගියේ මිහිරියාව විඳින්න රසික ඔබ සැමට ආරාධනා.