අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂ ශානි අබේසේකර මහතාට දැනට සපයා ඇති ආරක්ෂාවට අමතරව අතිරේක ප්‍රමාණවත් ආරක්ෂාවක් ලබන ජනවාරි මස 18 වැනිදා තෙක් වහාම සපයන ලෙස අභියාචනාධිකරණය විසින් ආරක්ෂක බලධාරීන්ට ඊයේ (14) නියෝග කරනු ලැබීය.
තමන්ට නිසි ලෙස ආරක්ෂාව ලබා නොදීමට එරෙහිව ශානි අබේසේකර මහතා විසින් ගොනුකළ රිට් පෙත්සමක් කැඳවූ අවස්ථාවේදී ඉදිරිපත් වූ කරුණු සලකා බැලූ අධිකරණය මෙම නියෝගය කරන ලදි. අභියාචනාධිකරණ සභාපති විනිසුරු නිශ්ශංක බන්දුල කරුණාරත්න, විකුම් කළුආරච්චි යන අභියාචනාධිකරණ විනිසුරු මඬුල්ල හමුවේ මෙම පෙත්සම කැඳවන ලදී.
එහිදී නීතිපතිවරයා වෙනුවෙන් පෙනී සිටි අතිරේක සොලිස්ටර් ජනරාල් රොහාන්ත අබේසූරිය මහතා සඳහන් කළේ පෙත්සම්කාර ශානි අබේසේකර මහතාගේ ජීවිතයට තර්ජන ඇති බවට කරුණු ඇතුළත් බුද්ධි අංශ වාර්තාව අවශ්‍ය පියවර ගැනීම සඳහා මහජන ආරක්ෂක අමාත්‍යාංශය ලේකම්වරයා වෙත මේ වන විට යොමු කර ඇති බවය.
එම වාර්තාව අධ්‍යයනය කර අවශ්‍ය පියවර ගැනීම සඳහා මසක පමණ කාලයක් අවශ්‍ය බව අතිරේක සොලිසිටර් ජනරාල්වරයා අධිකරණයට දන්වා සිටියේය.
එසේම සාක්කිකරුවන් සහ වින්දිතයන් ආරක්ෂා කිරීමේ පනත යටතේ වින්දිතයා සහ ආරක්ෂක බලධාරීන් අතර ගිවිසුමක් ඇති කර ගත යුතු අතර, එම ගිවිසුම ඇති කර ගැනීමේ කටයුතු මේ වන විට සිදු කරමින් පවතින බවද අතිරේක සොලිසිටර් ජනරාල්වරයා සඳහන් කළේය. එම කටයුතු නිම කිරීම සඳහා ද මසක පමණ කාලයක් අවශ්‍ය බව ඒ මහතා සඳහන් කළේය.
එහිදී පෙත්සම්කාර ශානි අබේසේකර මහතා වෙනුවෙන් පෙනී සිටි ජනාධිපති නීතිඥ උපුල් ජයසූරිය මහතා සඳහන් කළේ එතරම් කාලයක් ලබාදිය නොහැකි බවය. පෙත්සම්කාර ශානි අබේසේකර මහතාගේ ජීවිතයට මේ වන විටත් තර්ජන ඇති බැවින් මේ අවස්ථාවේදී හෝ ඔහුගේ ජීවිතයට හානි විය හැකි බව ඒ මහතා සඳහන් කළේය. මේ වන විටත් ශානි අබේසේකර මහතාට යතුරුපැදියක් සහ එක් පොලිස් නිලධාරියෙකු පමණක් ආරක්ෂාව සඳහා ලබා දී ඇති බවද එය කිසිසේත්ම ප්‍රමාණවත් නොවන බවද ජනාධිපති නීතිඥවරයා සඳහන් කළේය.
ඉදිරිපත් වූ කරුණු සලකා බැලූ විනිසුරු මඬුල්ල දැනට සපයා ඇති ආරක්ෂාවට අතිරේක ආරක්ෂාවක් ශානි අබේසේකර මහතාට ඊළඟ නඩු දිනය තෙක් ලබාදෙන ලෙස ආරක්ෂක බලධාරීන්ට නියෝග කළේය.
පෙත්සම ජනවාරි මස 18 වැනිදා නැවත කැඳවීමට තීරණය කෙරිණි. අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂ ශානි අබේසේකර මහතා විසින් මෙම පෙත්සම් ගොනු කර තිබුණි.
වින්දිතයන් සුරැකීමේ අධිකාරිය, එවකට බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන්, පොලිස්පතිවරයා, නීතිපතිවරයා ඇතුළු පිරිසක් මෙහි වගඋත්තරකරුවෝ වෙති.
තමන්ට ප්‍රමාණවත් ආරක්ෂාවක් ලබා දෙන ලෙස පොලිස්පතිවරයාගෙන් ඉල්ලා සිටි බවත් එම ඉල්ලීම ආරක්ෂක ලේකම්වරයා වෙත යොමු කළ බව පොලිස්පතිවරයා ලිඛිතව දැනුම් දුන් බවත් පවසන පෙත්සම්කරු වෙනත් කරුණු සලකා බැලීමෙන් පසුව එම ඉල්ලීම සම්බන්ධයෙන් සලකා බලන බව ආරක්ෂක ලේකම්වරයා දැනුම් දුන් බව පවසයි. අනතුරුව වින්දිතයන් සුරැකීමේ අධිකාරියට සිය ආරක්ෂාව සම්බන්ධයෙන් ඉල්ලීම යොමු කළ අතර, වින්දිතයන් සුරැකීමේ පනත අනුව ආරක්ෂාව නොසැපයීම අධිකරණයට අපහාස කිරීමක් බව ද පෙත්සම්කරු පෙන්වා දෙයි.
ඒ සම්බන්ධයෙන් සාර්ථක ප්‍රතිචාරයක් නොලැබුණු බව සඳහන් කරන පෙත්සම්කාර ශානි අබේසේකර මහතා, ඒ හේතුවෙන් මෙම පෙත්සම ගොනු කළ බව පවසයි. මෙම පෙත්සම මීට පෙර කැඳවූ අවස්ථාවේදී නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල් රොහාන්ත අබේසූරිය මහතා සඳහන් කර සිටියේ රිය අනතුරකට ලක් කර ශානි අබේසේකර මහතා ඝාතනය කිරීමේ කුමන්ත්‍රණයක් ඇති බවට බුද්ධි අංශ විසින් මේ වන විට තොරතුරු අනාවරණය කරගෙන ඇති බවය.
