ගීත ලොවේ ශිලා ලිපිය මර්වින්

1966 එවකට රජයේ සංගීත විද්‍යාලයේ (අද සෞන්දර්ය කලා විශ්වවිද්‍යාලය) සංගීතය හදාරන්න පැමිණි ශිෂ්‍යයෝ කිහිපදෙනෙක් පසු කලෙක සිංහල සංගීත ක්ෂේත්‍රයේ ද සිනමා සංගීත ක්ෂේත්‍රයේ ද බහුවිධ දක්ෂතා දැක්වූහ. ගායන ක්ෂේත්‍රය බැබලූහ. ඒ පිරිස අතර මර්වින් පෙරේරා, වික්ටර් රත්නායක, අමරසිරි පීරිස්, සරත් දසනායක, වින්සන්ට් ප්‍රේමසිරි, ගුණදාස කපුගේ, සේන වීරසේකර, පුණ්‍යසිරි මහවත්ත, විජේරත්න රණතුංග, සෝමපාල රත්නායක, බර්ටි රණසිංහ ද සුවිශිත වූහ. රජයේ සංගීත විද්‍යාලයේ දී මර්වින් හා වික්ටර් රත්නායක සුවිශේෂ මිතුරන් වූවා මෙන්ම දක්ෂ වයලීන් වාදකයෝ වූහ. පසු කලෙක වික්ටර් රත්නායකයන් මර්වින් ගැන කතා කරමින් කියා තිබුණේ “ඔහු බහුවිධ දක්ෂතා පැවති තනු නිර්මාණ ශිල්පියකු මෙන්ම විශිෂ්ට ගායකයකු” බවය. ගායකයකු වූ මර්වින් තම මිතුරු වික්ටර්ට නොමසුරුව ජනප්‍රිය තනු සහිත ගීත කිහිපයක්ම නිර්මාණය කර දුන්නේය.

කොටින්ම මේ දෙදෙනාගේ කටහඬ ද එක සමාන විය. ඔවුන් දෙදෙනාගේ ගීත ගුවන් විදුලියෙන් වාදනය වන විට “මේ මර්වින්ගේ ගීතයක් ද?” මේ වික්ටර්ගේ ගීතයක් ද? කියා විසඳගත නොහැකිව වාද කර ගත් අය මට හමු වී ඇත.

මර්වින් ඇලෝෂියස් පෙරේරා 1940 වසරේ සැප්තැම්බර් 21දා කුඩා පයාගලදී උපත ලැබීය. ඔහුගේ පියා ටී. හර්මන් පෙරේරා වූ අතර ඉසබෙලා ඩයස් මෑණියන් විය. පවුලේ වැඩිමලා වූ මර්වින්ට ගර්ට්රූට්, ලූෂන්, සුනිල්, කමල්, ස්වේතා, කුමුදුනී හා පුෂ්පා නම් සහෝදර සහෝදරියන් හත්දෙනෙක් සිටියහ. මර්වින්ගේ පැටිකිරිය අතැඹුලක් සේ දන්නා 2002 පළ වූ “ඔබේ ආදරය ශිලා ලිපියක් වගේ” කෘතියට ලිපියක් ලියූ පියසේන ගුරුගේ පවසන මේ කතාවෙන් අපූරු සිත්තමක් මැවෙයි.

“කුඩා පයාගල මහ මුහුද පිස එන සුළඟ ඔහුගේ දෙසවන් සියුම් කරන්නට ඇති. වෙරළේ පෙණ විසිරෙන හඬ ඔහු අවදි කරවන්න ඇති. පල්ලියේ ඝණ්ටා නාදය පොල්රුප්පාවට ඉහළින් ඇසෙන විට ඔහුගේ හදවතේ රිද්මයක් ඇති වෙන්න ඇති. මහ මුහුද කියන්නේ මර්වින්ගේ ලෝකෙට නවමු දේ ඉදිරිපත් කළ ගුරුවරයෙක්. හැඟීම් සමුදායක් ජනිත කළ බිහිදොරක්. ඒව සිහිපත් කරන විට ඔහුගේ මුව නැඟෙන හිනාව හා ඔහුගේ වතේ ප්‍රභාව ඊට කෘතවේදීත්ව දක්වන්නට වගේ හැඟීමක් අප තුළ ජනිත වෙනවා. මුහුද හැමදාම ජීවිතේ ගීතය ගායනා කරනවා. වලාලය එක විදිහක්. වාරකනේ තවත් විදිහක්. වෙරළේ ඉමේ පොල්රුප්පාවේ වාඩිවෙලා හිටපු මර්වින්ට මී රා සුවඳ තවත් නිර්මාණ සඳහා ඉඩ සපයන්න ඇති.”

මර්වින්ගේ පියා අපූරු කලාකාරයෙකි. ඔහු නර්තන ශිල්පියෙකි; චිත්‍ර ශිල්පියෙකි; ගුරුවරයෙකි. ඔහු පෙර අපරදිග සංගීතය පිළිබඳ නිපුණත්වයක් මෙන් ම කථකලි, මනිපුරි, කථක් නැටුම් මැනවින් ඉගෙන ගත් ප්‍රවීණයෙකි. තාත්තාගේ ආභාසය මර්වින්ට ලැබුණට පාසල් යන කාලයේ ග්‍රහණයට ගෙන නැත. අම්බලන්ගොඩ ප්‍රජාපති විද්‍යාලයෙන් ද, ගාල්ලේ සවුත්ලන්ඩ් විද්‍යාලය, බද්දේගම ක්‍රයිස්ට් විද්‍යාලයෙන් ද ඉගෙනුම ලැබූ මර්වින් කුමර වියේ පයාගල රෝමානු කතෝලික කුමර විද්‍යාලයේ ඉගෙන ගන්නා කාලේ සංගීතය ඉගැන්වීමට ගුරුවරයෙක් නොසිටියේය. එහෙත් ඔහු තාත්තා විසින් තෑගි දුන් පුංචි වයලීනය පමණක් තුරුලුකර ගෙන සිටි බව වාර්තාවේ. ඔහුට කරුණාව පෑ මීසමේ පියතුමා පසන් ගී ගැයීමට, කන්තාරු ගී ගැයීමට තෝරා ගත්තේය.

පාසලේ විදුහල්පති ෆ්‍රැන්සිස් ප්‍රනාන්දු මහතා මර්වින්ගේ අනාගතය නුවණින් දැන සිටියේය. විදුහල්පතිවරයා විසින් මර්වින්ව ජ්‍යෙෂ්ඨ පන්තියේ සංගීත ගුරුවරයාට භාර කළේය. ගුරුවරයා සිසුවාගෙන් මේ ආකාරයෙන් ප්‍රශ්න කර ඇති බව විජිත් කුමාර් සේනාරත්න විසින් ලියා ඇති ‘සඳ මිදුලේ රන් මී විත’ (2008) කෘතියේ විස්තර කර තිබුණි.

‘ළමයා යමන් රාගය දන්නව ද?’

‘නෑ සර්’

‘එහෙනම් බිලාවල් රාගය’

‘ඒත් දන්නේ නෑ සර්’

මොනවා? එහෙමනම් ත්‍රීතාල්’

‘නෑ සර්, මං ඒ මොකවත් දන්නේ නැහැ’

‘අයියෝ! තමුසෙ, තමුසෙගෙ තාත්තගෙ නමත් කනවනේ’

මේ දෙබස තරයේ හිතට ගත් මර්වින් තාත්තාගේ නම්බුව රැක ගත්තේය. ජ්‍යෙෂ්ඨ විභාගයෙන් ඔහු සංගීත විෂය සමත් විය. තාත්තා කොතරම් සතුටු වූවා ද යත් පුතා කැටුව කොළඹ ගෙන ගොස් පොරෝලිස් ප්‍රනාන්දු සාප්පුවෙන් ජර්මන් වයිලීනයක් මිලදී ගෙන පුතාට තෑගි දුන්නේය. රජයේ කලායතනයේ සංගීත අංශයට බැඳුන මර්වින් එහි සිටි එස්. ඩී. ඇස්. ජයසේකර, පී. වී. නන්දසිරි යන ගුරුවරුන් යටතේ සංගීතය හැදෑරූ අතරම ෂෙල්ටන් ප්‍රේමරත්න විශාරදයාගේ පානදුරේ පවත්වාගෙන ගිය සංගීත පන්තියට ගියේය.

‘ඒ කාලයේ මගේ සමකාලීන මිතුරෝ කවුරුත් වාදනයට දක්ෂයෝ වීම නිසා බාහිර පටිගත කිරීම්වලට අපිව තෝරා ගත්තා. සේන වීරසේකරගේ තම පියා සිහිකර නම් තැබූ ජයන්ත වීරසේකර මාවතේ නිවසේ ඔහුගේ කාමරයේ නැවතී ගජයෝ (අමරසිරි පීරිස්, ගුණදාස කපුගේ, සෝමපාල රත්නායක) සමඟ දුක සැප බෙදා ගනිමින් මර්වින් ද නිර්මාණයට යොමු වුණා.’ මර්වින් පවසා තිබුණි.

මර්වින්ට මුල්ම සංගීත ගුරු පත්වීම ලැබී ඇත්තේ අම්පාර රජ්ගම විද්‍යාලයට බවත්, කොළඹ සිට අම්පාර බලා මුලින්ම ගිය ගමනේ දී ගුවන් විදුලි වාදක මණ්ඩලයේ සිටි විශිෂ්ට වයලීන් වාදකයෙකු මෙන්ම ගායකයකු, චිත්‍රපට රංගන ශිල්පියකු වූ තිලකසිරි ප්‍රනාන්දු ගිටාරයක් තෑගි දුන් බව මර්වින් විජිත් කුමාර සේනාරත්නට කියා තිබුණි.

කොළඹ ආ නිවාඩු කාලයේ මර්වින් තම ගජයන් වූ ප්‍රේමකීර්ති ද අල්විස්, කේ. ඩී. කේ. ධර්මවර්ධන, වික්ටර් රත්නායක, මිල්ටන් මල්ලවාරච්චි සමඟ ඇලී ගැලී සිට ඔවුන්ගේ නිර්මාණවලට මියුරු තනු නිර්මාණය කර දුන්නේය. ඉන් ගීත කිහිපයකි මේ.

‘පාවේ වලා – ඈත කඳු බලා

පෑ ආදරේ අමා

මා හද මවා – මා හද මවා

කඳුවැල්ලෙන් හසරැල්ලෙන්

සිහින මැවෙනවා

ජීවිතයේ මිහිරි සුවේ

මහද නැඟෙනවා

(ගායනය – වික්ටර් රත්නායක/ගීත රචනය – මීගොඩ විල්සන්)

වික්ටර් විසින් මර්වින්ගේ තනුවකට හැටේ දශකයේ ගැයූ මේ ගීත එකල ගුවන් විදුලියේ ජනප්‍රිය තාරුණ්‍යයේ හඬ ශ්‍රාවකයන්ගේ හදවත දිනූ ජනප්‍රිය ගීතයකි.

‘සෝක සැනසුම් වේදනාවන්

ආදරේ පුරවා ගෙනා

ඈගේ නිලුපුල් දෑසේ කඳුලැල්

ජීවිතේ මතු වාසනා

මිල්ටන් මල්ලවාරච්චි ගැයූ මේ ගීතය ද ප්‍රකටය.

‘ලොව සැතපෙන යාමේ

ඔබේ සෙනෙහස අවදි වෙවී’

සුනිල් ආරියරත්නයන් ගේය පද රචනය කළ නන්දා මාලිනී ගැයූ මර්වින් තනුව නිර්මාණය කළ ගීත ඔබට මතක ද?

‘බුදුනේ – ජේසුනේ

නබිනායකතුමනි

නොමිනිසුන් හට මිනිසත්කම දුන මැනවි’

‘දෙවියන් විසින් පඬුරක් ලෙසින්’, ‘ඔබේ පෑළ පැලේ පිල’, ‘ලොවම එපා වී කලකිරී තැවී දැවී’, ‘නිලම්බරේ සුදු පරෙවි රෑන් යන දිනක් උදාවේවා’, ‘අයන්න කියන්න ලොවටම ඇහෙන්න මර්වින් තනු නිර්මාණය කළ ගීත ගැන නන්දා මාලිනිය මෙසේ පවසා තිබුණි.

‘මර්වින් කිසිම විටෙක තමන්ගේ නිර්මාණ දෙස ආඩම්බරයෙන් කතා කරන කෙනෙක් නොවේ. මොන තරම් හොඳ නිර්මාණයක් කළත් කිසි විටක ඔහු සෑහීමට පත් වන්නේ නෑ. ‘නිලම්බරේ’ ගීතය පටිගත කළ දා මර්වින් මේ ගීතය ජනප්‍රිය වන බවට අනාවැකියක් කිව්වා. එය අකුරටම ඉටු වුණා.’

වික්ටර් රත්නායකයන් සමඟ සුජාතා අත්තනායක ගැයූ ප්‍රේමකීර්ති ද අල්විස් ගේය පද රචනය කළ මේ ගීතය මුල්වරට පද පෙරළියක් ගීතයකට තේමාව වූ උත්සාහයකි.

‘සඳට අහස ආදරේ දෝ හ්ම්…හ්ම්…

මලට බඹරු ආදරේ දෝ හ්ම්… හ්ම්…

දෙනෙතට වත ආදරේ දෝ හ්ම්… හ්ම්…

සොඳුරිය මම ආදරේ දෝ නෑ… නෑ…

ගීතයේ ‘පද පෙරළිය’ එන්නේ අවසාන දෙවන අන්ත්‍රා කොටසේය.

‘පද සහනයි – සඳ පහනයි

පද මවනයි – මද පනයි

වසර සසන තුරු – සසර වසන තුරු

අම මාදරෙයි – මම ආදරෙයි’

මර්වින් තනු නිර්මාණ ගීත අතර ‘අශෝකමාලා මමයි ස්වාමීනි’ (ගායනය – චන්ද්‍රලේඛා පෙරේරා), ‘පින් මඳ පුතුනේ ඉඹුල් සිනාවන්’ (ගායනය – විජය කුමාරතුංග), ‘වැව් බැම්මේ – නා තුරු සෙවණේ’ ගීත මෙන්ම ප්‍රියා සූරියසේන, පුන්සිරි සොයිසා, නීලා වික්‍රමසිංහ, රොහාන් ශාන්ත බුලේගොඩ, නිරංජලා සරෝජිනි, එඩ්වඩ් ජයකොඩි, චරිතා ප්‍රියදර්ශනී, ප්‍රදීපා ධර්මදාස ඇතුළු ගායක ගායිකාවන් ගැයූ ගීත රැසකි. ලීනස් මෙන්ඩිස් පියතුමා, කුමාරදාස සපුතන්ත්‍රි, උපාලි ධනවලවිතාන, පියසේන ගුරුගේ, බන්දුල නානායක්කාර, රවී සිරිවර්ධන, කමලසිරි කොතලාවල, මර්වින්ගේ නිර්මාණවල දායක වූ ගේය පද රචකයයෝ අතර වෙති. මේ ගීතවලට සරත් දසනායක, ග්‍රේෂන් ආනන්ද, ස්ටැන්ලි පීරිස්, ස්ටැන්ලි පෙරේරා, රෝහණ වීරසිංහ, පුණ්‍යසිරි මහවත්ත, නිමල් පෙරේරා සංගීත රචනය කළෝය.

සහෝදර ගායක ගායිකාවන්ට නොමසුරුව තනු නිර්මාණය කළ මර්වින් ජනප්‍රිය ගායකයෙකු ලෙස තමාගේම තනු නිර්මාණය කර ගත්තේය. මර්වින් තම ගජමිතුරා වූ ප්‍රේමකීර්ති ද අල්විස් හා මනා සංයෝජනයෙන් බිහි කළ ගීත ඔහු මිය ගියත් ඔබේ මතකයෙන් බැහැර නොවේ. ප්‍රියසාදවලදී පද මාලාවන් (කොලයක් නොබලා) මතකයෙන් ගැයූ තරුණ පරපුරක් මෙරට සිටියහ. මේ ඒ ගීත අතර මිණි මුතු වන ගීත කිහිපයකි.

‘මේ නගරය මා ඔබ මුණ ගැසුණු නගරයයි

මේ නගරය මා ඔබ වෙන් කෙරුණු නගරයයි’

‘ඔබ දේදුන්න ආකාසයේ

අන්දා තබා යන තෙක් විත් බලා

සැංගී හඹා එමි කඳුළැල් සලා

ඔබ දේදුන්න ආකාසයේ’

‘කතරකි තනි වී ඔබ යන අයුරු පෙනි පෙනී

හිම සිල මුදුනත හිටිය ද මහද ගිනි ගනී

ගිම්හානය පැමිණී එක් තැනම නොම රැඳී

පැමිණෙන දුක් පැණි රස බව නොසිතුණි ද ළඳේ

‘සඳ මිදුලට එනවා

ඇගෙ වත සිහිවෙනවා

සඳ වතුරේ නළවා සතපා

ඇය රෑ එළියේ සැඟවී යනවා’

‘දියලුම දිය රැලි දිය රැල හා

ගල ගල යයි සමුදුර සොයලා

හද උපදියි ආදරේ

සැනසුම් තෙර සොයලා’

මීට අමතරව කේ. ඩී. කේ. ධර්මවර්ධන රචනා කළ ‘රන් මී විත පුරවා – සිරිකත සව්දිය පිරුමට ආ නියා’, ‘නිලුපුල් යුවලේ රතු තොල් සඟලේ’ ගීත ද සුවිශේෂය.

ප්‍රේමකීර්ති සුසංයෝගයෙන් ‘ආදරේ රන් බිඟුන් නැසූ’, ‘එක මොහොතක් ඔබ සෙවණේ හිඳින්නට තරම්’, ‘වන බඹර කුලේ – පිපි තඹුරු විලේ’, ‘පබසර රන් පබළු’, ‘අකුරු සතරකින් මනස පැටලිලා’, ‘දෙදෙනා පෙරදා හමු වී නොදොඩා නොබලා’ ගීත මර්වින් අතින් තනු මැවුණු ගීතය.

මර්වින් විසින් වෙනත් සංගීතඥයන්ගේ ජනප්‍රිය තනුවලට ගැයූ ගී ද වෙයි. ‘මා සනසා – මා නළවා සුරංගනාවක් හිමින් ඇවිල්ලා’ (ගීත රචනය – කේ. ඩී. කේ. ධර්මවර්ධන / ස්වර රටා – පුණ්‍යසිරි මහවත්ත) සුවිශේෂය.

මර්වින් ගායනයෙන් දායක වූ චිත්‍රපට අතර, විසිහතර පැය, ධවල පුෂ්පය, රජගෙදර පරෙවියෝ, සයුර තෙර, දයාබර නිලූ, සත්කුළු පව්ව, පුතුනි මට සමාවෙන්න චිත්‍රපට මෙන්ම ළා හිරු දහසක්, නියත, තෘප්තා, නෙලන්න බැරි මල, හංස දඩයම ටෙලි නාට්‍යවල ද තනු නිර්මාණ කළේය.

මර්වින් තම පුතකු වූ අමල් පෙරේරා සමඟ යුග ගීතයක් ගයා ඇත. අද අමල් ජනප්‍රිය ගායකයෙකු හා සංගීත නිර්මාණකරුවකු ලෙස ප්‍රකටය. ටෙලි නාට්‍යයට හා සංගීත රචකයකු ලෙස ද අමල් සුමති සම්මාන පිදුම් ලබා ඇත.1971 මැයි 13 වෙනිදා මර්වින් මාලිනි යුවතිය විවාහ කර ගත්තේය. අමල්, සොහාන්, සමන්කා, නිමෂා ඔවුන්ගේ දූ දරුවන්ය. 2008 වසරේ දෙසැම්බර් 07 වෙනිදා මර්වින් පෙරේරා නම් මේ ගායක සංගීතඥයා ජීවිතයෙන් සමු ගත්තේය.

මහාචාර්ය සුනිල් ආරියරත්නයන් විසින් මර්වින්ට ලියූ මේ ගේය පද වගේම මර්වින් පෙරේරා ගීතාවලියේ ශිලා ලිපියක් වගේය. මේ ගීතයේ ස්වර රටා පුණ්‍යසිරි මහවත්ත ගෙනි.

‘ඔබේ ආදරේ ශිලා ලිපියක් වගේ

ඔබේ ආදරේ

දෙවන පෑ තිස් රජ දවසේ

ශිලා ලිපියක් වාගේ

ශිලා ලිපියක් වගේ’

ඒ. ඩී. රන්ජිත් කුමාර