බණ්ඩාරනායක ජාත්‍යන්තර ගුවන්තොටුපොළ තුළ මාසයකට ආසන්න කාලයත් තිස්සේ තිබුණු ගමන් මල්ලකින් රුපියල් කෝටි 10ක් පමණ වටිනා කුෂ් නමැති මත්ද්‍රව්‍ය කි.ග්‍රෑ. 20කට ආසන්න ප්‍රමාණයක් ඊයේ (8) සොයාගෙන තිබේ.
මේ ගමන් මල්ල ඉකුත් නොවැම්බර් 14 දා සිට තිබී ඇත්තේ ගුවන්තොටුපොළ පරිශ්‍රයේය. එහි මත්ද්‍රව්‍ය ඇතැයි බස්නාහිර පළාත් බුද්ධි කාර්යාංශයේ නිලධාරීන්ට ලද තොරතුරකට අනුව ගුවන්තොටුපොළ බලධාරීන්ගේ සහාය ඇතිව එය පරීක්ෂා කර ඇත. එහි තිබුණු කුෂ් මත්ද්‍රව්‍ය තොගය හමු වී ඇත්තේ එහිදීය. කි.ග්‍රෑ. 19යි ග්‍රෑ. 589ක් බරැති කුෂ් මත්ද්‍රව්‍ය එහි තිබී හමු වී ඇති බව පොලිස් මාධ්‍ය ප්‍රකාශක, ජ්‍යෙෂ්ඨ පොලිස් අධිකාරි නීතිඥ නිහාල් තල්දූව මහතා සඳහන් කළේය.
මත්ද්‍රව්‍ය තිබුණු මේ ගමන් මල්ල ඩුබායි සිට නොවැම්බර් 14 දා පස්වරු 2.40ට කටුනායක බණ්ඩාරනායක ජාත්‍යන්තර ගුවන්තොටුපොළට ගොඩබස්සවන ලද ශ්‍රී ලන්කන් ගුවන් සේවයේ UL226 ගුවන් යානයෙන් මෙරටට පැමිණ ඇත. ඩුබායි සිට එම ගමන් මල්ල මෙම යානයට පටවා ඇත්තේ කැනඩාවේ සිට ඩුබායි පැමිණි ගුවන් යානයක තිබී බව ඒ සම්බන්ධයෙන් මෙතෙක්කර ඇති විමර්ශනයේදී අනාවරණය වී තිබේ.
ඩුබායි සිට පැමිණි ගුවන් යානයෙන් මෙරටට පැමිණි ශ්‍රී ලංකික කාන්තාවකගේ ගමන් මල්ල එදින අස්ථානගතව තිබී ඇති බවද විමර්ශනයේදී අනාවරණය වී ඇත. එදින එම ගුවන් යානයේ පැමිණි සෑම ගුවන් මගියකුගේම ගමන් මලු තිබුණත් ඉතිරිව තිබී ඇත්තේ මත්ද්‍රව්‍ය තිබුණු ගමන් මල්ල පමණි. එම ගමන් මල්ල තමාට අයත් එකක් නොවන බව එම ගුවන් මඟියා පවසන්න වූ බැවින් ඇගේ ගමන් මල්ල ගැන ඩුබායි ගුවන්තොටුපොළින් විමසීමක් කර තිබේ. ඇගේ ගමන් මල්ල වැරදීමකින් එරට ගුවන්තොටුපො‍ළේ කාර්ය මණ්ඩලයට කැනඩා ගුවන් යානයෙන් මේ ගුවන් යානයට පැටවීමට නොහැකි වී ඇති බව එහිදී අනාවරණය වී ඇත. ගමන් මල්ලේ විස්තර සහ එහි ඇතුළේ ඇති භාණ්ඩ ගැන විස්තර ඇයගෙන් ගෙන එම ගමන් මල්ල ඩුබායි සිට පැමිණි ගුවන් යානයකින් ගෙන්වා ගෙන ඇයට භාර දී තිබේ. ඒ එහි ඇති බව ඇය කල් ඇතිව ප්‍රකාශ කළ දෑ එහි තිබේදැයි නිශ්චිතවම තහවුරු කරගැනීමකින් අනතුරුවය.
