”ඖෂධ ප්‍රසම්පාදනය සඳහා මෙවර අය වැයෙන් රුපියල් බිලියන 181ක් වෙන් කර තිබෙනවා. ඉතිහාසයේ කිසිම දවසක් එවැනි මුදලක් වෙන් කර නැහැ. ඖෂධ ප්‍රසම්පාදනයට මෙපමණ මුදලක් අවශ්‍ය වන්නේ නැහැ කියල අපි විශ්වාස කරන්නේ” යැයි රජයේ වෛද්‍ය නිලධාරීන්ගේ සංගමයේ ලේකම් වෛද්‍ය හරිත අලුත්ගේ මහතා (07) පැවසීය.ගාල්ල කරාපිටියේ පැවති මාධ්‍ය හමුවක් අමතමින් අලුත්ගේ මහතා මේ බව කීවේය.
ඒ මහතා මෙසේ ද කීවේය.
”ඖෂධ ප්‍රසම්පාදනය සඳහා වෙන් කර ඇති මුදලින් කොටසක් අපට ඉතිරි කර ගන්න පුළුවන්. ගිය අවුරුද්දේ ප්‍රසම්පාදනයට මුදල් වෙන් වුණේ සොරකමටයි. හදිසි මිල දී ගැනීම්වලදී බිලියන තිහ හතළිහ දූෂණයට වංචාවට ගියා. රජයට ජනතාවට ඒ මුදල් අහිමි වුණා. නව සෞඛ්‍ය ඇමැතිතුමා සමඟ හොඳ ගමනක් යා හැකි බව අප විශ්වාස කරනවා. අප රජයේ වෛද්‍ය නිලධාරීන්ගේ සංගමය හැටියට ඇමැතිතුමා අවස්ථා කීපයකදී හමුවුණා. ඇමැතිතුමා ඇවිල්ලා වැඩි දවසක් නැහැ. සෞඛ්‍ය ක්ෂේත්‍රය පිළිබඳ යම් අවබෝධයක් තිබෙන කෙනෙක් අමාත්‍ය ධුරයට පත්වීම සම්බන්ධයෙන් මුලින්ම අපි සුබපැතුවා.ඒ වගේම ඖෂධ ප්‍රශ්නය සම්බන්ධයෙන් ගත්තොත් මේ අවුරුද්දේ විශාල මුදලක් අය වැය හරහා වෙන් කර තිබෙනවා. ඔෂධ ප්‍රසම්පාදන ක්‍රියාවලිය සඳහා බිලියන 181ක මුදලක් වෙන් කර තිබෙනවා. ඉතිහාසයේ කිසිම දවසක් ඒ වගේ මුදලක් වෙන් වෙලා නැහැ. මෙපමණ මුදලක් අවශ්‍ය වෙන්නේ නැහැයි කියල අපි විශ්වාස කරනවා. මේ මුදලින් කොටසක් අපට ඉතිරි කරගන්න පිළිවන්.”
