විපක්ෂ නායක සජිත් ප්‍රේමදාස මහතා පාර්ලිමේන්තුවේදී කැමරාව සහ මයික්‍රෆෝනය ඉල්ලමින් සිය කතාව ප්‍රචාරය කර ගැනීම එකම අභිප්‍රාය කර ගනිමින් කටයුතු කරන බව වෘත්තිය සමිති පිළිබඳ ජනාධිපති අධ්‍යක්ෂ ජනරාල් සමන් රත්නප්‍රිය මහතා පැවසීය.
සිරිකොත එක්සත් ජාතික පක්ෂ මූලස්ථානයේදී පසුගියදා පැවති මාධ්‍ය හමුවේදී අදහස් දක්වමින් මේ බව සඳහන් කළේය.
එහිදී සමන් රත්නප්‍රිය මහතා මෙසේ ද කීය.
අය වැය සම්බන්ධව පාර්ලිමේන්තුවේ විෂයානුබද්ධ සාකච්ඡාව මේ වන විට පැවැත්වෙමින් තිබෙනවා. විශේෂයෙන්ම විපක්ෂ නායකයා පාර්ලිමේන්තුවේ කාලය විනාඩි හතළිහක් විතර භුක්ති විඳිමින්, කැමරාව ඉල්ලමින්, මයික්‍රෆෝනය ඉල්ලමින් මාධ්‍ය හරහා සෑම දිනයකම තමන්ගේ කතාවක් ප්‍රචාරය කරන ගැනීම ඔහුගේ එකම අභිප්‍රාය බව දැන් පෙනෙනවා. සාමාන්‍යයෙන් විපක්ෂ නායකවරුන් සතියකට එක පාරක්වත් පාර්ලිමේන්තුවේ කතා කරන්නේ නැහැ. සෙසු මන්ත්‍රීවරුන්ට අවස්ථාව ලබා දී තමන්ගේ කටයුතු සම්බන්ධීකරණය කිරීම ඔහු සිදු කරනවා.
ඒ වගේම ජාතික ජන බලවේගයේ කාන්තා පාර්ශ්වය ළමා හා කාන්තා වැය ශීර්ෂයට අදාළව උද්ඝෝෂණයක් සිදු කරනවා අප දැක්කා. එම උද්ඝෝෂණයේ දී පොලිසිය විසින් ජල ප්‍රහාර එල්ල කළා කියලා මර්දනය පිළිබඳව ලොකු ඝෝෂාවක් ඇති කරන්නට උත්සාහ ගත්තා. ලෝකයේ වගේම මේ රටේ ජනතාවටත් වැඩ වර්ජනය කිරීමේ, උද්ඝෝෂණ කිරීමේ, ඉල්ලීම් ලබා ගැනීමේ අයිතිය තිබෙනවා.
ඒවා ක්‍රියාත්මක වෙනකොට අනෙකාගේ අයිතියට හානි කර විදිහට සිදු කරන්නට බෑ. සිදුකිරීමේ හැකියාව වෙනුවෙන් නීති ප්‍රතිපාදන නැහැ. මං මාවත් හරස් කරනවා නම් අනෙකාගේ අයිතියට එය බලපෑමක් වෙනවා නම්, එය මර්දනය කිරීමේ හෝ මැඬ පැවැත්වීමේ බලය පොලිසියට තිබෙනවා. සමහර අයට වීදි සටන් වගේ දේවල් පුරුදු නැහැ. ඒවට එන්න උත්සාහ කළාම හුරු නැතිකම නිසා ප්‍රශ්න ඇති වෙනවා. රනිල් වික්‍රමසිංහ මේ රටේ කාන්තාවන්ගේ අයිතිවාසිකම් ආරක්ෂා කළ කෙනෙක්. පළාත් පාලන නියෝජිතවරියන් ගේ දායකත්වය සියයට 25 දක්වා වැඩි කළේ ඔහුයි. ඒ අයිතිවාසිකම් වෙනුවෙන් ඉඩ හදලා දුන්න කෙනෙක්. අනිත් අය සිදු කරන්නේ කතා කිරීම පමණක් බව මතක් කළ යුතුයි.
මේ රට හදන්න අනුර කුමාරට බැහැනේ. පරණ වාහන යකඩවලට විකුණලා රට හදනවයි කියපු, මිනිරන් විකුණලා රට හදනවයි කියපු, පැලවත්තේ සීනි සමාගමෙන් ආසියාවටම සීනි දෙන්න පුළුවන් කියපු, ත්‍රිකුණාමලේ සංවර්ධනය කළාම, මුළු රටම සංවර්ධනය කරන්න පුළුවන් කියපු අයට ත්‍රිකුණාමලය තෙල් ටැංකි ටික සංවර්ධනය කරන්න ඒ දේවල්වලට තෙල් ගේන්න කොහෙන් ද ඩොලර් ගේන්නේ කියන එක ඒ මොළවල නැහැ. එහෙම කියපු අය ආණ්ඩුවක් ගත්තම වෙන්නේ කාම්බෝජයේ පොල්පොට්ට ආණ්ඩුවක් දුන්නා වගේ තමයි. එහෙම අයට මේ රටේ ආණ්ඩු කරන්න බෑ. කොහොමටත් මාස හයක් යද්දි ආණ්ඩුව වැටෙනවා. එහෙම ආණ්ඩුවක් වැටුණාම, තියෙන්නේ මර්දනය පමණයි. මිනිස්සු නැඟිටිනකොට මර්දනය ගේනවා. පොල්පොට් කළෙත් කෘෂිකර්මය මත පදනම් වුණු ආර්ථිකයක් ගැන කතා කළ එකයි.
