මෙරට බෝ නොවන රෝග පාලනය හා ඒ හේතුවෙන් වන මරණ අඩු කිරීමේ අරමුණින් ජපන් ජනතාව විසින් ශ්‍රී ජයවර්ධනපුර මහ රෝහල වෙත යෙන් මිලියන 500ක් වටිනා නවීන වෛද්‍ය උපකරණ ප්‍රදානය කිරීමේ වැඩසටහනේ පළමු අදියර වශයෙන් යෙන් මිලියන 49ක වෛද්‍ය උපකරණ ප්‍රදානය කිරීම ශ්‍රී ජයවර්ධනපුර මහ රෝහලේ දී පෙරේදා (06) සිදුකෙරිණි.
සෞඛ්‍ය හා කර්මාන්ත ඇමැති වෛද්‍ය රමේෂ් පතිරණ මහතාගේ සහ ජපන් ජනරජයේ තානාපති H.E. Mizukoshi Hdeaki මහතාගේ ප්‍රධානත්වයෙන් එය සිදුකෙරිණි.
මේ සමස්ත ප්‍රදානයන්හි පළමු අදියරට අදාළව Angio-CT යන්ත්‍රය සඳහා අවශ්‍ය වන අනෙකුත් විකිරණ උපකරණ (Radiology Equipment (Angio-CT Machine), සැත්කම් උපකරණ කට්ටල (Surgical Instument set), අක්ෂි උපකරණ ( (Automated Refractomter and Three Slit Lams), දැඩි සත්කාර ඒකකයේ ඇඳන් තුනක්, ප්‍රතිසාධන ඇඳක් මෙහිදී ප්‍රදානය කෙරිණි.
ජපන් ජනරජයේ තානාපති H.E.Mizukoshi Hdeaki මහතා විසින් සෞඛ්‍ය හා කර්මාන්ත ඇමැති වෛද්‍ය රමේෂ් පතිරණ මහතා වෙත නිල වශයෙන් ඉහත ප්‍රදානය ලබාදීම සිදු වූ අතර, සෞඛ්‍ය ඇමැතිවරයා විසින් ශ්‍රී ජයවර්ධනපුර මහ රෝහලේ සභාපති වෛද්‍ය නිහාල් ජයතිලක මහතා වෙත එම ප්‍රදානය නිල වශයෙන් බාරදීම ද සිදු විය.
ශ්‍රී ජයවර්ධනපුර මහ රෝහල සඳහා මේ ව්‍යාපෘතිය යටතේ Angio-CT යන්ත්‍රයක් හා එම යන්ත්‍රයට අදාළ වන අනෙකුත් විකිරණ උපකරණ,ඒකක 15කින් සමන්විත අතිනවීන දන්ත ශල්‍ය ඒකකයක්, අක්ෂි උපකරණ කට්ටලයක්,ශල්‍ය උපකරණ කට්ටලයක්,අක්මා බද්ධ කිරීමේ උපකරණ කට්ටලයක් ඉදිරියේදී ලැබීමට නියමිතය.එමෙන්ම මේ ව්‍යාපෘතියට අදාළ වන දේශීය ප්‍රතිපාදන යටතේ 2024 ජාතික අයවැය මඟින් ඉදිකිරීම් ඇතුළුව නවීන හෘද කැතීටකරණ රසායනාගාරයක් සඳහා, OPG (දන්ත එක්ස් කිරණ) යන්ත්‍රය මිලදී ගැනීමට, දන්ත වෛද්‍ය ඒකකය ස්ථාපනයට අදාළ ප්‍රතිපාදන සඳහා ද මුදල්‌ වෙන් කර ඇත.
මේ ප්‍රදානය ලබාගනිමින් අදහස් දැක් වූ සෞඛ්‍ය හා කාර්මාන්ත ඇමැති වෛද්‍ය රමේෂ් පතිරණ මහතා කියා සිටියේ ජපානය සහ ශ්‍රී ලංකාව අතර වසර 70කට අධික මිත්‍ර රාජ්‍ය තාන්ත්‍රික සබඳතාවක් පවතින බවත්, එම කාලයේ ජපන් රජය විසින් මෙරට සෞඛ්‍ය සේවාව ශක්තිමත් කිරීමට ශ්‍රී ජයවර්ධනපුර මහ රෝහල ඉදිකිරීම,පේරාදෙණිය විශ්වවිද්‍යාලයේ දන්ත වෛද්‍ය පීඨය පිහිටුවීමට ආධාර කිරීම, රුධිර බැංකු පිහිටුවීම මෙන්ම වෛද්‍ය උපකරණ,සෞඛ්‍ය සේවා වෘත්තිකයන් අතර කුසලතා වැඩි දියුණු කිරීමට විවිධ සහයෝගීතා වැඩසටහන් ක්‍රියාවට නැංවීමට කටයුතු කළ බවය.
කොවිඩ් -19 වසංගතය අතරතුර ජපානයේ නිෂ්පාදිත එන්නත් ලබාදීම සහ සීතල දාම යටිතල පහසුකම් වැඩිදියුණු කිරීමට කටයුතු කළ බවත් ජපන් ජනතාව දුන් මේ පරිත්‍යාගය වෙනුවෙන් මෙරට සෞඛ්‍ය ඇමැතිවරයා ලෙස සිය ස්තූතිය පුද කරන බවත් ඇමැතිවරයා පැවසීය.
ජපන් ජනරජයේ තානාපති H.E. Mizukoshi Hdeaki මහතා කියා සිටියේ ජපානය සහ ශ්‍රී ලංකාව අතර වසර 70කට අධික මිත්‍ර රාජ්‍ය තාන්ත්‍රික සබඳතාවයක් පවතින බවය.
1983 වසරේදී ජපාන රජයේ ප්‍රධාන ආධාර මත මේ රෝහල ඉදි කළ බවත්, ශ්‍රී ලංකාවේ පිළිකාව, ආඝාතය සහ දියවැඩියාව ඇතුළු බෝ නොවන රෝග සඳහා ප්‍රතිකාර සහ සැත්කම් සඳහා නවීනතම උපකරණ මේ ප්‍රදානය යටතේ දෙන බවත් හෙතෙම පැවසීය. සෞඛ්‍ය රාජ්‍ය ඇමැතිනී විශේෂඥ වෛද්‍ය සීතා අරඹේපොල, ශ්‍රී ජයවර්ධනපුර රෝහලේ අධ්‍යක්ෂ වෛද්‍ය රත්නසිරි ඒ. හේවගේ මහත්ම මහත්මීන් ඇතුළු විශේෂඥ වෛද්‍ය,වෛද්‍ය,හෙද ඇතුළු සෞඛ්‍ය කාර්ය මණ්ඩලයේ පිරිසක් මේ අවස්ථාවට සහභාගි වූහ.
