242
ප්‍රහාරක ජෙට් යානා 4ක් පිරිවරාගත් රුසියානු ජනාධිපති ව්ලැදිමිර් පුටින් පෙරේදා මැදපෙරදිග දුර්ලභ සංචාරයක නිරත වූ බව විදෙස් මාධ්‍ය වාර්තා කළේය. රුසියාවට බටහිර විරෝධතා වර්ධනය වෙමින් පවතින අවස්ථාවක ජනාධීපති පුටින් එක්සත් අරාබි එමීර් රාජ්‍යයේ සහ සෞදි අරාබියේ සංචාරයක නිරත වීම ජාත්‍යන්තර අවධානයට ලක් වූ බව ද වැඩිදුරටත් වාර්තා වේ.
යුක්රේන යුද ගැටුම් ආරම්භවීමෙන් පසු පුටින් රුසියාවෙන් බැහැර ගිය සිවුවැනි අවස්ථාව මෙය වේ. මීට පෙර ඔහු චීනයේ සහ ඉරානයේ සංචාරයක නිරත වූ අතර, යුක්රේන යුද බිමට ද ගොස් තිබේ. යුක්රේනයේ දරුවන් බලහත්කාරයෙන් රුසියාවට රැගෙන ගිය බවට චෝදනා කරමින් ජාත්‍යන්තර යුද අපරාධ අධිකරණය රුසියානු ජනාධිපතිවරයා අත්අඩංගුවට ගැනීමට වරෙන්තුවක් ද නිකුත් කර තිබිණි.
