සිනමා වසන්තය සමරමින් දෙසැම්බර් 14 වැනිදා එකම දිනෙක නවතම සිංහල චිත්‍රපට හතරක් සැවෝයි සිනමා වසන්තය නමින් තිරගත කිරීමට කටයුතු යොදා ඇති බව එහි සංවිධායක මණ්ඩලය පසුගියදා මාධ්‍ය හමුවක් කැඳවමින් සඳහන් කළේය. මෙවැනි සංකල්පයක් මෙරට සිනමා ඉතිහාසය තුළ සිදුවන ප්‍රථම අවස්ථාවද මෙයයි.
මේ යටතේ ලාල් ප්‍රියදේව අධ්‍යක්ෂණය කළ ‘මේක පුදුම කතාවක්’ දේවින්ද කෝන්ගහගේ අධ්‍යක්ෂණය කළ ‘නාට්ටාමි ආමි’, ක්‍රිස් ඇන්තනි අධ්‍යක්ෂණය කළ ‘අපේ ප්‍රින්සිපල්’, ප්‍රසාද් සමරතුංග අධ්‍යක්ෂණය කළ ‘තාත්තා’ යන චිත්‍රපට හතර තිරගතවීමට නියමිතය. එහි මංගල දර්ශන එළැඹෙන 14 ‘නාට්ටාමි ආමි’, 15 වැනිදා ‘අපේ ප්‍රින්සිපල්’, 16 වැනිදා ‘මේක පුදුම කතාවක්’, 17 අවසන් දින ‘තාත්තා’ දිවයින පුරා පිහිටි ඊ.ඒ.පී. මණ්ඩලයේ සියලුම සිනමා ශාලාවන්හී ප්‍රදර්ශනය කිරීමට නියමිතය. මේ චිත්‍රපටයන් හී මංගල දර්ශන වැල්ලවත්ත සැවෝයි ප්‍රිමියර් සිනමා ශාලාවේ දී පැවැත්වෙනු ඇත. මෙම චිත්‍රපට ප්‍රදර්ශනය වන වේලාවන් ඔවුන්ගේ වෙබ් අඩවි සහ සමාජ මාධ්‍ය ජාලා ඔස්සේ ජනගත කරනු ඇත.
‘ආවර්ජනා’ සාර්ථකයි
ආවර්ජනා ප්‍රසංගය මේ වසරේ පැවත්වූ වැඩිම රසික සහභාගීත්වයක් සහිත සුභාවිත ප්‍රසංගය බවට පසුගිය දින පත්විය. සුභාවිත ගීතයට නව අරුතක් ගෙන එමින් ටෙලි නාට්‍ය නිෂ්පාදිකාවක් දේශීය හා විදේශීය ගී ප්‍රසංග රැසක් සංවිධානය කළ සුධර්මා ජයවර්ධන සමඟ ශෂිකලා හෙට්ටිආරච්චි එක්ව එය සංවිධානය කරනු ලැබූ අතර, මෙම ප්‍රසංගයේ ආදායම රාගම උතුරු කොළඹ රෝහලේ වාට්ටු අංක 31 හා 32 ද්විත්වයේ ප්‍රතිසංස්කරණ කටයුතු සඳහා ලබා දීමට නියමිතය.
අද දිවිය ලෝකයේ යන අමර
1998 රාජ්‍ය ළමා නාට්‍ය උලෙළේ හොඳම නළුවා සහ හොඳම රචනයට හිමි සම්මානය ඇතුළු සම්මාන පහක් හිමි කරගත් පාලිත ලොකු පෝතාගම පිටපත ලියා අධ්‍යක්ෂණය කළ “අමර ගියා දිවිය ලෝකේ” සහ “නුඹ වෙනුවෙන් මල් පිපේවි” ළමා වේදිකා නාට්‍ය ද්විත්වය අද (8) වැනිදා උදේ මරදාන එල්ෆින්ස්ටන් රඟහලේදී වේදිකාගත කෙරේ.
අමු concert
එක්සත් ප්‍රවෘත්ති පත්‍ර සමාගම මාධ්‍ය අනුග්‍රහය දැක්වූ සංජීව ලෝන්ලියෙස් ඒක පුද්ගල ප්‍රසංගය පසුගිය දින බණ්ඩාරනායක අන්තර්ජාතික සම්මන්ත්‍රණ ශාලාවේදී පැවැත්විණි.
රුචිරා දේවි මහනුවරදී
1980 බිහිවූ මිණි සලඹ නාට්‍යයෙන් වසර හතළිහකට පසුව බිහිවන නාඩගම් ශෛලියේ නූතන නාඩගම වන ”රුචිරා දේවි” වේදිකා නාට්‍යය හෙට (දෙසැම්බර් 9 දා) පෙ.ව. 10.30 ට (පාසල් දර්ශනය) සහ ප.ව. 3.30 ට (මහජන දර්ශනය) මහනුවර ධර්මරාජ විද්‍යාලයීය ශ්‍රවණාගාරයේ දී වේදිකාගත වේ.
කිවිවර මෙහෙවරට සම්මාන
ජාතික මහා කාව්‍ය සම්මේලනයේ ගම්පහ දිස්ත්‍රික් බල මණ්ඩලයේ පළමු සංවත්සරය දෙසැම්බර් දෙවන දින ගම්පහ සාම විහාරයේදී උත්සවාකාරයෙන් පැවැත්වුණි. එහිදී කවිය හා කවියා වෙනුවෙන් දිගු කලක් සේවය කළ කිවිවර කඩවත බණ්ඩාර රාජපක්ෂ, පැල්පිට ජේ. රත්නායක, වෑබඩ විල්මන්, පතිරත්න කිවිවරු මෙන්ම කාව්‍ය රසිකයකු වන වැබඩ කැමිලස් රණවක මහතා සම්මානයෙන් පුද ලැබූහ.
ප්‍රාණ 19 දා නෙළුම් පොකුණ රඟහලේදී
මෙරට ජනප්‍රියම ගායක ගායිකාවන් රැසක් සහභාගී වන ‘ප්‍රාණ ලයිව් ඉන් කොන්සර්ට්’ ප්‍රසංගය දෙසැම්බර් දහ වනදා සවස 6.30 ට කොළඹ නෙළුම් පොකුණ රඟහලේදී පැවැත්වේ. මෙම ප්‍රසංගය සංගීතවත් කරනු ලබන්නේ හොට් චොක්ලට් සංගීත කණ්ඩායම විසිනි. උමාරියා සිංහවංශ, ෂිහාන් මිහිරංග,සහ ජයශ්‍රී ශිල්පීන් මෙම ප්‍රසංගය සඳහා එක් වීමට නියමිතය.
ප්‍රාණ ලයිව් ඉන් කොන්සර්ට් ප්‍රසංගයයෙන් ලැබෙන සියලු ආදායම රෝගී දරුවන්ගේ සුවසෙත සඳහා අවශ්‍ය කරන වෛද්‍ය උපකරණ රෝහල් සඳහා ලබා ගැනීමට නියමිතය.
රතු සැඟවූ කළු රෝස
ජාතික රූපවාහිනියෙන් ඔබේ ආලින්දයට තිළිණ කරන ‘කළු රෝස’ මේ දිනවල සෑම සති අන්තයකම සෙනසුරාදා, ඉරිදා දිනවල රාත්‍රී 7.00ට. මෙය ඔබත් නැරඹිය යුතුම ටෙලි වෘතාන්තයකි. මෙහි ප්‍රධාන චරිතය වන නිරූපමාගේ චරිතයට පණ පොවන්නේ යොවුන් රංගන ශිල්පිනී සමාධි පෙරේරායි. ප්‍රවීණ රංගන ශිල්පීන්ට අමතරව යොවුන් රංගන ශිල්පීන්, ශිල්පිනියන් රැසක් මෙහි රංගනයෙන් දායක වෙති. මෙහි අධ්‍යක්ෂණය සහ පිටපත් රචනය ඉරේෂා ලොකු බණ්ඩාර විසිනි. නිෂ්පාදනය ප්‍රවීණා අංජලී විසිනි. තේමා ගී පද ප්‍රවිණ රංගන ශිල්පී පාලිත සිල්වා විසින් ලියැවී ඇති අතර ප්‍රවීණ ගායන ශිල්පිනී චරිතා ප්‍රියදර්ශනී පීරිස් තේමා ගී ගායනය කරන්නීය. සංගීතය සපයා ඇත්තේ සරත් ගුණරත්නයි. සහාය අධ්‍යක්ෂණයෙන් ජනක සම්පත් රාජකුලතුංග දායක වන අතර කලා අධ්‍යක්ෂණයෙන් උපුල් සම්පත් ලියනගේ දායක වෙයි.
දෙමටමල්පැලැස්ස සිසු දස්කම් අගැයේ
සමස්ත ලංකා පාසල් සංගීත තරගාවලියේ කනිෂ්ඨ අංශයේ ප්‍රශස්ති හා හටන් අංශයේ 3 වන ස්ථානය හා එහි හොඳම ප්‍රාසාංගික නිර්මාණයට හිමි සම්මානය දිනූ අම්පාර දෙමටමල්පැලැස්ස විද්‍යාලයේ දරු දැරියන් විසින් දිනා ගනු ලැබූහ. ්‍
විනීගෙන් සිතුවම් ප්‍රදර්ශනයක්
විනී හෙට්ටිගොඩ විසින් beyond the sight නමින් පවත්වනු ලබන සිතුවම් ප්‍රදර්ශනයක් මෙම මස 12 වැනිදා සිට 2024 ජනවාරි 15 වනදා දක්වා කොළඹ 07 සී. ඩබ්ලිව්. ඩබ්ලිව්. කන්නන්ගර මාවතේ ‘සියම් නිවාස’ හිදී පැවැත් වේ. තෙල් සායමින් සහ ඇක්‍රිලික් සායමින් කැන්වස් මත කරන ලද සිතුවම් සමූහයක් මෙහිදී ප්‍රදර්ශනය කෙරේ. වසර හතළිහකට වැඩි කලක් ශ්‍රී ලංකාවේ කාටුන් ශිල්පයෙහි යෙදෙමින් ක්‍රියා කළ විනී ගේ මෙම නිර්මාණ දැක්මට වෙනස්ම ආකාරයක සිතුවම් ඇතුළත්ය. මෙහි දැක්වෙන්නේ ප්‍රදර්ශනයට තබා ඇති සිතුවමකි.
යාපනය අන්තර්ජාතික සිනමා උලෙළ
නව වන වරට පවත්වනු ලබන යාපනය අන්තර්ජාතික සිනමා උලෙළ දෙසැම්බර් 14 වන දින සිට 19 වනදා දක්වා පැවැත්වේ. මේ සංවිධානය කරනු ලබන්නේ ජාත්‍යන්තර සම්මානයට පාත්‍ර වූ හා ජාත්‍යන්තර සිනමා උලෙළේ ජූරි සභිකවරියක සහ සම්මානනීය ප්‍රවීණ වාර්තා චිත්‍රපට අධ්‍යක්ෂක වන අනෝමා රාජකරුණායි. එහි සිනමාත්මක රසය විඳින්නට යාපනයට එන්න යැයි සිනමා රසවතුන් සියලු දෙනාට ආරාධනා කරයි.
සරච්චන්ද්‍ර සම්මානය ඩී.එස්.ට
2023 සමස්ත ලංකා සංගීත තරගාවලියේදී ජ්‍යෙෂ්ඨ අංශයේ නාඩගම් අංශය නියෝජනය කරමින් කොළඹ ඩී. එස්. සේනානායක විද්‍යාලයේ සිසුන් මෙවර නාඩගම් සම්ප්‍රදායේ එන මනමේ නාට්‍ය ගීතය ඉදිරිපත් කරමින් සමස්ත ලංකා ප්‍රථම ස්ථානය දිනාගන්නට සමත් විය. එය එම අංශයේ විශිෂ්ටතම අංගය ලෙස තේරී පත්වූ අතර, ඒ සඳහා වන ස්වර්ණ සම්මානය ද හොඳම නිර්මාණාත්මක අංගය ලෙස තේරී පත්වූ අතර, ඒ සඳහා වන එදිරිවීර සරච්චන්ද්‍ර සම්මානය ද මෙවර දිනා ගැනීමට ඩි. එස්. සේනානායක විදුහලේ සිසුන්ට හැකි විය.
දුව දුවා වැඩි සේක
‘Agenda 14’ මඟින් සංවිධානය කරන 13 වැනි කෙටි චිත්‍රපට උලෙළට සමගාමීව දමිත් අලුත්ගම අධ්‍යක්ෂණය කළ ‘දුව දුවා වැඩි සේක’ චිත්‍රපටය හෙට (9) සවස 3.30ට කොළඹ ජර්මානු සංස්කෘතික ආයතනයේදී (Gothe) සහ 10දා පෙ.ව 10ට ප්‍රංශ සංස්කෘතික ආයතනයේදී ද තිරගත කෙ‍ෙර්. මේ චිත්‍රපටය නොමිලයේ නැරඹීමට ඉඩ සලසා ඇත.
කෙටි නාට්‍ය 3ක් අද
චාලක රණසූරිය පිටපත ලියා අධ්‍යක්ෂණය කළ කෙටි නාට්‍ය ත්‍රිත්වය අද 08 දා සවස මරදාන එල්ෆින්ස්ටන් රඟහලේදී වේදිකාගත කෙරේ.
වයඹින් එක විජයකටුපොත විදුහලට
හලාවත ආරච්චිකට්ටුව විජයකටුපත මහා විද්‍යාලය 2023 සමස්ත ලංකා පාසල් සංගීත තරගාවලියේ සමූහ ගී අනුවාදන ජ්‍යෙෂ්ඨ පිරිමි – අංශයෙන් ප්‍රවිණ ගායන ශිල්පි මර්වින් පෙරේරා ගායනා කරන “මේ නගරය මා ඔබ මුණගැසුණු නගරයයි” ගී අනුවාදනයට වයඹ පළාත් ප්‍රථම ස්ථානය හිමි කරගත් අතර, මේ අතර විජයකටුපොත මහා විද්‍යාලය සමස්ත ලංකා අවසන් පාසල් හය අතරට ද එක් විය. ආචාරිනී ශ්‍යාමා ගුණරත්නගේ මඟපෙන්වීම යටතේය. සමස්ත ලංකා අවසන් පාසල් 6 අතරට ද තේරී පත් විය.
‘නිර්-වස්ත්‍ර’ වැඩ ඉවරයි
කතාව, තිරපිටපත හා අධ්‍යක්ෂණය ශෝන් මැක්ස්මස් දිසානායක විසින් කරන ලද දෙවැනි සිනමාත්මක නිර්මාණය ‘නිර්-වස්ත්‍ර’ හි රුපගත කිරීම් පසුගියදා මීගමුවේදී අවසන් කෙරිණි. ලාංකේය සිනමාවට නැවුම් අත්දැකීමක් ගෙන එමින් ‘නිර්-වස්ත්‍ර’ ප්‍රථම දර්ශනය ඕස්ට්‍රේලියාවේ මෙල්බර්න් හී ප්‍රදර්ශනය කිරීමට විධිවිධාන යොදා ඇත. විල්මන් සිරිමාන්න, ප්‍රීති රන්දෙණිය, රියන්සි ෆ්‍රෙෂර්, විහඟ නදීත්, තරු අබේසේකර, රාජිත රොද්‍රිගු, ගුණසිරි සිල්වා, රොහාන් ඇන්තනීස්, රංජිත් කිරිඇල්ල, නදීර හිරුෂාන්, සමීර ප්‍රනාන්දු, යසෝධ රවිහාර, ලලිත් පිටවෙල, ප්‍රසාත් මංජුල මෙහි රංගනයෙන් දායක වෙති.
මොරටුව එළිය කළ “සාහිත්‍යාංජලි’’
මොරටුව මහ නගර සභාව මඟින් වාර්ෂිකව සංවිධානය කරනු ලබන “සාහිත්‍යාංජලි” සාහිත්‍ය කලා මහෝත්සවයේ මෙම වර්ෂයේ දිගහැරුම “හෙළ සිනමා රසෝඝය” තේමාව යටතේ පසුගිය දින මොරටුව බෞද්ධ මන්දිර ශ්‍රවණාගාර‍යේදී පවත්වන ලදි. මොරටු පුත්‍රයකු වෙනුවෙන් පිරිනැමෙන විශේෂ උපහාර සම්මානය මෙවර ශ්‍රී ලාංකික සිනමා කලාව වෙනුවෙන් ඉටුකළ විශිෂ්ට සේවය අගයනු වස් ප්‍රවීණ සිනමාවේදී ශිවන්ත අර්ථසාද් වෙත පිරිනමන ලදි. එමෙන්ම මොරටුව මහ නගර සභාව මඟින් මෙවර සාහිත්‍ය මාසය වෙනුවෙන් පාසල් සිසුන් අතර පවත්වන ලද සාහිත්‍ය තරගවල ජයග්‍රාහක දරු දැරියන් වෙත ත්‍යාග හා සහතික පිරිනැමීමද එදින සිදු කෙරිණි. මෙම උලෙළේ ප්‍රධාන දේශනය ප්‍රවීණ සිනමාවේදී ජ්‍යෙෂ්ඨ මාධ්‍යවේදී නුවන් නයනජිත් කුමාර මහතා විසින් සිදු කරන ලදී.
දශක පහක් එක් කරළියක..
පිළියන්දල මධ්‍ය විදුහලේ “ආදි සිසු කලා හවුල” මඟින් සංවිධානය කරනු ලබන “දශක පහක් එක් කරළියක” (1980- 2020) ප්‍රාසාංගික අත්දැකීමක් ලබා දීමට කටයුතු සූදානම් කර තිබේ. මෙම ප්‍රසංගයේ සංකල්පය සහ ප්‍රධාන සංවිධායකත්වය මැදි විදුහල් කලා සංගමයේ සභාපතිනි, ගුරු උපදේශිකා රේණුකා ප්‍රියදර්ශනී විසින් සිදු කරනු ලබයි. මේ සඳහා පිළියන්දල මධ්‍ය විද්‍යාලයේ ඉගෙනුම ලැබූ කලා ක්ෂේත්‍රයේ දස්කම් දක්වන ආදී සිසුන්ට හැකියාව තිබෙන අතර, තම කලා හැකියාවන් වේදිකාව මත එළිදැක්වීමට කැමති ආදි සිසු සිසුවියන්, දෙසැම්බර් 17 වෙනිදාට පෙර පිළියන්දල මධ්‍ය විද්‍යාලයේ ආදි සිසු කලා හවුල අමතා තම සහභාගීත්වය තහවුරු කරන ලෙස සංවිධායක මණ්ඩලය ඉල්ලා සිටී.
