තියුණු මන්නා පිහි පහර එල්ල කර අද (07) අලුයම , සීදුව ලියනගෙමුල්ල ප්‍රදේශයේ මළ ගෙදරක් ඉදිරි පිට සූදු සෙල්ලම් කරමින් සිටි පුද්ගලයෙකු මරා දමා ඇති බව සීදුව පොලිසිය ප්‍රකාශ කරයි.
මෙලෙස ඝාතනය කර ඇත්තේ කටුනායක , කොළඹ පාර , අංක 92 ලිපිනයේ පදිංචි තොම්මගේ ඉරෝෂන් රජීන්ද්‍ර ප්‍රනාන්දු නැමැති 46 හැවිරිදි පුද්ගලයෙකි.
මෙම පුද්ගලයා කටුනායක ” නිව් අඹ සෙවන ” නැමැති කාමර කුළියට දෙන ස්ථානයක් සහ අවන්හලක් පවත්වා ගෙන යන ව්‍යාපාරිකයෙකි .
මොහුට එරෙහිව මීගමුව මහේස්ත්‍රාත් අධිකරණයේ විභාග වන මිනීමැරුම් නඩු දෙකක් පවතින බවත් මොහු පුරුද්දක් වශයෙන් ප්‍රදේශයේ මළ ගෙවල් වල රාත්‍රී කාළයේ මුදල් ඔට්ටුවට සූදු සෙල්ලම් කරන අයෙකු බවත් පොලිසිය පැවසීය .
“ඩියෝ ” වර්ගයේ යතුරු පැදියකින් පැමිණි නොහදුනන දෙදෙනෙකු , තියුණු මන්නා පිහි වලින් පහර එල්ල කර මොහු ඝාතනයට ලක් කර තිබේ .
මෙම මරණය සිදු වූ ස්ථානයට මීගමුව මහේස්ත්‍රාත්වරයා පැමිණ සිය නිරීක්ෂණයන් සිදු කර ඇති අතර , මේ වනවිට මෙම මළ සිරුර මීගමුව මහ රෝහලේ මෘත ශරීරාගාරයේ තබා තිබේ .
මෙම මරණයට සම්බන්ධ කිසිවෙකුත් මේ වනවිට පොලිසිය විසින් අත් අඩංගුවට ගෙන නොමැති අතර මෙම මළ සිරුර පිළිබඳ පශ්චාත් මරණ පරීක්ෂණය සිදු කිරීමෙන් අනතුරුව , මරණකරුගේ ඥාතීන් වෙත මෙම සිරුර භාර දීමට පොලිසිය පියවර ගනිමින් සිටිති.
සීදුව පොලිසිය සිද්ධිය සම්බන්ධයෙන් වැඩිදුර පරීක්ෂණ පවත්වයි
