මෙරට ජනගහනයෙන් සියයට 23ක් එනම්, ලක්ෂ 46ක් තරුණ තරුණියන් බව තරුණ හා ක්‍රීඩා රාජ්‍ය ඇමැති රෝහණ දිසානායක මහතා පැවැසීය.
ක්‍රීඩා හා යෞවන කටයුතු අමාත්‍යාංශය, ජාතික තරුණ සේවා සභාව සහ ශ්‍රී ලංකා යෞවන සමාජ සම්මේලනය එක්ව මහරගම යොවුන් රඟහලේ සංවිධානය කර තිබූ 43 වන ජාතික යෞවන සම්මාන උලෙළට ඉකුත් 29 වැනිදා එක්වෙමින් රාජ්‍ය ඇමැතිවරයා මේ බව සඳහන් කළේය. 
ඒ අනුව මෙවර අය වැයෙන් තරුණ ප්‍රජාවගේ සංවර්ධනය වෙනුවෙන් රුපියල් මිලියන 29000ක් වෙන් කර ඇති බවත් එම මුදල් වෙන්කළ ජනාධිපතිවරයාට ජාතියේ ප්‍රණාමය හිමිවන බවත් ඒ මහතා කියා සිටියේය.
රාජ්‍ය ඇමැතිවරයා වැඩිදුරටත් මෙසේද පැවැසීය.
තරුණ කටයුතු සහ රැකීරක්ෂා අමාත්‍යවරයා වශයෙන්, වත්මන් ජනාධිපති රනිල් වික්‍රමසිංහ මහතාට ජපානයෙන් ලැබුණු ත්‍යාගයක් ලෙස මහරගම පිහිටි මේ ගොඩනැඟිල්ලේ තරුණ සේවා සභාව ආරම්භ කිරීමෙන් පසුව, තාරුණ්‍යයේ අලුත් යුගයක්, නව පිබිදීමක් රටේ ඇරැඹුණා. තාරුණ්‍යයේ කාර්යයන් ඉටු කිරීම වෙනුවෙන්, මහරගම මෙම ස්ථානය හැරෙන්න, බෙල්වුඩ් – බටන්ගල ඇතුළුව ආයතන 57ක් සක්‍රීය ලෙස ක්‍රියාත්මක වෙනවා.
මම මහනුවර ‘බෙලිවුඩ්’ හි පිහිටි ස්ථානයට ගිහින් එහි නතර ව තිබුණු තාරුණ්‍යයේ ක්‍රියාකාරකම්, නැවතත් වර්තමාන තාරුණ්‍ය සඳහා ආරම්භ කිරීමේ ප්‍රතිඵලයක් ලෙස මෙවැනි සම්මාන උලෙළක් අභිමානයෙන් පැවැත්වීමට අවකාශය ලැබුණා.
මෙහි දී සිංහල, දමිළ සහ ඉංගීසි මාධ්‍ය ත්‍රිත්වයෙන් පවත්වනු ලැබූ තරග 95කින් ජයග්‍රහණය ලැබූ 131 දෙනෙකුට ද, නාට්‍ය අංශයේ දක්ෂතා දැක්වූ 56 දෙනකු සහ ගද්‍ය / පද්‍ය රචනා, චිත්‍ර, ඡායාරූප යන තරග අංශයෙන් දක්ෂතා දැක්වූ 75 දෙනකු සඳහා සම්මාන පිරිනැමිණි.මේ අවස්ථාවට ක්‍රීඩා හා යෞවන කටයුතු අමාත්‍යාංශයේ ලේකම් කේ. මහේෂන්, ජාතික තරුණ සේවා සභාවේ සභාපති /අධ්‍යක්ෂ ජනරාල් පසිදු ගුණරත්න, හිටපු අධ්‍යක්ෂ ජනරාල්වරුන් වන ආචාර්ය සුනිල් ජයත්න නවරත්න, හරීන්ද්‍ර සමරවික්‍රම යන මහත්වරුන් ඇතුළු විශාල පිරිසක් සහභාගි වී සිටියහ.
