ඩුබායිහි පැවැත්වීමට නියමිත කොප් 28 ලෝක නායකයන්ගේ සමුළුවට සහභාගි වීම සඳහා ජනාධිපති රනිල් වික්‍රමසිංහ මහතා ඊයේ (30) උදෑසන දිවයිනෙන් පිටත්ව ගියේය.
දේශගුණික විපර්යාස පිළිබඳ ජාත්‍යන්තර සමුළුව හෙවත් “කොප් 28” (Cop 28) සමුළුව වෙනුවෙන් ජනාධිපති රනිල් වික්‍රමසිංහ මහතා මෙවර විශේෂ යෝජනා 3ක් ඉදිරිපත් කිරීමට නියමිතය. දේශගුණික විපර්යාස විශ්වවිද්‍යාලයක් මෙරට ඇති කිරීම, දියුණු රටවල ක්‍රියාකාරකම් හේතුවෙන් අපහසුතාවට පත්වන තුන්වන ලෝකයේ රටවල් වෙනුවෙන් දේශගුණික යුක්ති සංසදයක් පිහිටුවීම හා නිවර්තන වැසි වනාන්තර වෙනුවෙන් සංසදයක් පිහිටුවීම ඒම යෝජනා ත්‍රිත්වයයි.
කොප් 28 සමුළුව රාජ්‍යයන් 54ක නායකයන්ගේ සහභාගිත්වයෙන් ලබන 04 වැනිදා සිට ඩුබායිහිදී පැවැත්වෙන අතර එහිදී දේශගුණික විපර්යාස ගැන මෙන්ම ණය ස්ථායීකරණය ගැන අතිරේක සාකච්ඡා කිහිපයක් පැවැත්වීමට ද සැලසුම් කොට තිබේ. මෙහිදී රාජ්‍ය නොවන සංවිධානයන්හි අනුග්‍රාහකත්වය යටතේ තරුණ තරුණියන් 20ක් සමුළුවට සහභාගි වීමට නියමිත අතර ඔවුන් අතිරේක සාකච්ඡාවන්ට සහභාගි වේ. ජනාධිපති රනිල් වික්‍රමසිංහ මහතා සමඟ විදේශ කටයුතු ඇමති අලි සබ්රි, විදුලිබල හා බලශක්ති ඇමැති කංචන විජේසේකර, පරිසර ඇමැති කෙහෙලිය රඹුක්වැල්ල, පාඨලී චම්පික රණවක, පරිසර අමාත්‍යාංශයේ ලේකම් වෛද්‍ය අනිල් ජාසිංහ, දේශගුණික විපර්යාස පිළිබඳ ජනාධිපති උපදේශක රුවන් විජයවර්ධන, ජනාධිපති විදේශ කටයුතු අධ්‍යක්ෂ දිනුක් කොළඹගේ ඇතුළු 15ක පමණ දූත පිරිසක් සහභාගි වීමට නියමිතය. පෞද්ගලික අංශයෙන් තවත් පිරිසක් සිය වියදමෙන් මෙම සමුළුවට සහභාගි වීමට නියමිත බව දේශගුණික විපර්යාස පිළිබඳ ජ්‍යෙෂ්ඨ උපදේශක රුවන් විජයවර්ධන මහතා සඳහන් කළේය.
