– විදෙස් ආධාර ව්‍යාපෘති යළි අරඹන්න හැකි වේවි
ශ්‍රී ලංකාවේ නිල ණය හිමියන් ණය ප්‍රතිව්‍යුහගතකරණය සඳහා පෙරේදා (29) මූලික එකඟතාවන්ට පැමිණි බව පාර්ලිමේන්තුවට සතුටින් දැනුම් දෙන බව මුදල් රාජ්‍ය අමාත්‍ය ශෙහාන් සේමසිංහ මහතා පාර්ලිමේන්තුවේදී ඊයේ (30) පැවසීය.
මේ මාසය තුලදී IMF දෙවැනි වාරිකය ලබාගෙන මේ රට බංකොලොත්භාවයෙන් නිදහස් කර ගැනීමට හැකිවනු ඇති බව ද මුදල් රාජ්‍ය අමාත්‍ය ශෙහාන් සේමසිංහ මහතා පැවසීය. ශ්‍රී ලංකාවේ නිල ණය හිමියන්ගේ කමිටුව, මෙරට ණය ප්‍රතිව්‍යුහගතකරණය සම්බන්ධයෙන් එකඟතාව පළ කිරීම පිළිබඳ පාර්ලිමේන්තුවේදී විශේෂ ප්‍රකාශයක් සිදු කරමින් රාජ්‍ය අමාත්‍යවරයා මේ බව පැවසීය. මෙරට ණය ප්‍රතිව්‍යුහගතකරණය සඳහා ණය හිමියන්ගේ රටවල එකඟතාව ඊයේ (30) ලැබුණු බවත් මෙම ණය ප්‍රතිව්‍යුහගතකරණය මඟින්, මෙරට ආර්ථික ස්ථාවරත්වයක් ඇති කිරීමට සහ ලබන වර්ෂය වන විට ආර්ථික වර්ධනයක් කරා ළඟා වීමට හැකිවනු ඇතැයි ද රාජ්‍ය අමාත්‍යවරයා කීය.
වැඩිදුරටත් අදහස් දැක්වූ රාජ්‍ය අමාත්‍යවරයා පැවසුවේ, විදේශ මූල්‍ය සහයෝගය ඇතිව ක්‍රියාත්මක වන ව්‍යාපෘති සියල්ල නැවත ආරම්භ කිරීමට අවශ්‍ය මූල්‍ය සහයෝගය මේ නිසා ලැබෙනු ඇති බවයි. ඇතැමුන් මෙම දෙවැනි වාරිකය ලැබීම සම්බන්ධයෙන් විශාල සැකයක් ජනතාව තුළ ඇති කළා. ණය ප්‍රතිව්‍යුහගත කිරීමේ ක්‍රියාවලියට ණය හිමි රටවල් සහයෝගය ලබා දෙන්නේ නැති බවට ජනතාව තුළ සැකයක් මතු කළා. ණය ප්‍රතිව්‍යුහගත කිරීම මේ අවස්ථාවේ සිදු නොවුණා නම් අපි බලාපොරොත්තු වූ ආර්ථික වර්ධනය කරා ගමන් කරන්න බැරිව යනවා. එම නිසා මෙය ඉතිහාසයේ සන්ධිස්ථානයක්. දෙසැම්බර් මාසය වන විට මෙම එකඟතාව ලැබෙයි. මෙතෙක් සිදු කළ ප්‍රතිසංස්කරණ කිසිවක් ආපසු හරවන්නේ නැතිව ශක්තිමත් ආර්ථිකයක් කරා ගමන් කිරීමේ ඉදිරි ගමන ආරම්භ කිරීමට හැකි වුණා.
නිල ණය හිමි කමිටුව මඟින් එකඟතාව ලබාදීම ජාත්‍යන්තර මූල්‍ය අරමුදලේ වැඩසටහනේ පළමු සමාලෝචනය අවසන් වීමෙන් පසු දෙවැනි වාරිකය නිදහස් කිරීමට අදාළ විධායක මණ්ඩලයේ අනුමැතිය දෙසැම්බර් මස තුළ ලබා ගැනීමට හැකියාව ඇති කරන බව අමාත්‍යවරයා පෙන්වා දෙයි. එමඟින් ලෝක බැංකුව සහ ආසියානු සංවර්ධන බැංකුව වැනි අනෙකුත් හවුල්කරුවන්ට තවදුරටත් මූල්‍ය පහසුකම් සැපයීමට හැකියාව ලැබෙනු ඇත.
මෙම පියවර ශ්‍රී ලංකාවේ ආර්ථික ප්‍රකෘතිය සඳහා ජාත්‍යන්තර ප්‍රජාවගේ අඛණ්ඩ සහයෝගිතාව පෙන්නුම් කරන වැදගත් සන්ධිස්ථානයක් වන අතර තවදුරටත් ශ්‍රී ලංකාව සාර්ව ආර්ථික ස්ථාවරත්වය ප්‍රතිෂ්ඨාපනය කර තිරසාර ආර්ථික වර්ධනය ළඟා කර ගැනීමට අවශ්‍ය පුළුල් ප්‍රතිසංස්කරණ වැඩසටහන ක්‍රියාත්මක කිරීමට කැපවී සිටින බවයි සේමසිංහ මහතා සඳහන් කළේ. ණය ප්‍රතිව්‍යුහගතකරණ ක්‍රියාවලියේදී සියලු ණය හිමියන්ට සාධාරණ ක්‍රමවේදයක් අනුගමනය කිරීමට රජය පොරොන්දු වූ බව ද කීය.
ජනාධිපති රනිල් වික්‍රමසිංහ මහතා ගත් නායකත්වය නිසා එම විශ්වාසය තහවුරු කිරීමට ශ්‍රී ලංකාවට හැකි වූ බව ද සේමසිංහ මහතා කීය.
