– ලොකු පුතුන් දෙදෙනාට උයා කවා පාසල් යවා තාත්තා මිරිස් වගාවට වතුර දමමින් ඉඳලා
– දරුවන්ගේ අම්මා සිව් මසකට පෙර රට ගිහින්
වගාබිමේ ආරක්ෂාවට යොදා තිබූ විදුලි රැහැනක පැටලී ගම්පොළ පොලිස් කොට්ඨාසට අයත් කොත්මලේ කොටගේපිටිය මාඉප්පල ගමේ 32 හැවිරිදි පියකු හා 3 හැවිරිදි දියණියක ගම්පොල රෝහලට ඇතුළත් කිරීමෙන් පසු මියගිය බව පුස්සැල්ලාව පොලිසිය පවසයි. 
මෙසේ මියගොස් ඇත්තේ සුනිල් ශාන්ත කුමාර නමැති අයකු සහ ඔහුගේ දියණිය එස්.එම්. අභින්නියා සිඟිත්තියයි.
මියගිය සුනිල්ගේ බිරිය මීට මාස 4කට පෙර විදේශගතව ඇති අතර, සුනිල් අවුරුදු 11 හා 7 වයස්වල පිරිමි දරුවන් දෙදෙනා හා මියගිය දියණිය සමඟ මෙහි ජීවත්ව තිබේ. නිවෙසට යාබදව මොහු එළවළු වගාවක් පවත්වාගෙන යන අතර, එහි මිරිස් වගාව සතුන්ගෙන් බේරාගැනීමට අඩියක් පමණ උසට කම්බි ගසා එයට විදුලිය සම්බන්ධ කර තිබී ඇත.
පෙරේදා (29) උදෑසන සුපුරුදු පරිදි අවදි වූ සුනිල් ආහාර පිසීමෙන් අනතුරුව පුතුන් දෙදෙනා පාසල් යවා කුඩා දියණියටද කෑම කවා තිබේ. මේ දරුවෝ දෙදෙනා මාස්වෙල විද්‍යාලයේ 3 හා 6 ශ්‍රේණිවල ඉගෙනුම ලබති. වැඩිමහල් පුතු පවසන්නේ පාසල් ගෙන යෑමට තාත්තා කිරිබත් සාදා දුන් බවයි.
දරුවන් පාසල් ගිය පසු සුනිල් තම දරුවන් සඳහා දහවල් ආහාරයද සකසා තිබේ. එළවළු දෙකක් සමඟ බත් පිසූ මොහු පෙරවරු 10ට පමණ මිරිස් වගාවට බෙහෙත් ඉසීම සඳහා ගොස් ඇති අතරේ නිවෙසේ සිටි සිඟිත්තිය මිදුලේ සෙල්ලම් කරමින් සිට ඇත. මොහු එසේ වගා බිමේ සිටින අවස්ථාවල තනිව සිටින දරුවාද ඔහු සිටින බිමේ ඇති ගල්තලාවේ සෙල්ලම් කරන බව ඥාතීහු පවසති. මෙදිනද මිදුලේ සෙල්ලම් කරමින් සිටි දැරිය ප්ලාස්ටික් කෝප්පයක්ද රැගෙන වගා බිමට ගොස් ඇති අතර, එහිදී දෙදෙනාටම විදුලිසර වැදී බිම වැටී සිටින අයුරු මුලින්ම දැක ඇත්තේ සුනිල්ගේ සහෝදරයාය.
නාමල් බණ්ඩාර නමැති ඔහුගේ බිරිඳගේ ඥාතියකු මිය යෑම පිළිබඳව අයියා වූ සුනිල්ට පැවසීමට මොහු එළවළු වගා වෙත පැමිණ තිබේ.
නාමල් බණ්ඩාර සුනිල් සොයා යන විට වගා බිමේ කම්බි මත මේ දියණියත් පියාත් වැටී සිටින බව දැක, ඒ බව වහා ඥාතීන්ට පවසා තිබේ. පසුව මොවුන් එකතු වී පිය දියණි දෙදෙනා ගම්පොල රෝහලට රැගෙන විත් ඇති අතර, එහිදී ඔවුන් මියගිය බව පවසයි. 
මෙහි මහේස්ත්‍රාත් පරීක්ෂණය ගම්පොල වැඩබලන මහේස්ත්‍රාත් නිලන්ත පිලපිටිය මහතා ඊයේ (30) පැවැත්වීය. පශ්චාත් මරණ පරීක්ෂණය පැවැත්වීමට නියමිතය.
ගම්පොල කොට්ඨාස භාර ජ්‍යෙෂ්ඨ පොලිස් අධිකාරි ප්‍රදීප් රත්නායක, පොලිස් අධිකාරි රොෂාන් අමරසිංහ මහත්වරුන්ගේ උපදෙස් මත පුස්සැල්ලාව පොලිස් ස්ථානාධිපති (ප්‍ර.පො.ප) ඉන්දික හේමකුමාර, අපරාධ අංශයේ ස්ථානාධිපති එම්.එම්.එච්.එස්. යාලගම, ගම්පොල ස්ථානීය පරීක්ෂණ අංශයේ ස්ථානාධිපති (ප්‍ර.පො.ප) චම්පික විමලරත්න, (පො.ප) ප්‍රියන්ත බණ්ඩාර, (පො.සැ) 20191 නිලන්ත හේරත්, 12642 ගාමිණී රත්නායක, 21002 බන්දුල රත්නායක, කාන්තා (පො.සැ) 2972 ඉනෝකා උඩගෙදර ඇතුළු නිලධාරීහු පිරිසක් පරීක්ෂණ පවත්වති.
