රාජ්‍ය යන්ත්‍රණය වෙනස් නොවුණොත් රටට අනාගතයක් නොමැති බව එක්සත් ජාතික පක්ෂයේ සභාපති, පාර්ලිමේන්තු මන්ත්‍රී වජිර අබේවර්ධන මහතා පැවසීය.
මන්ත්‍රීවරයා මේ බව පැවසුවේ කොළඹ හිල්ටන් හෝටලයේ පසුගිය 27 වැනි දින පැවති රජයේ තොරතුරු සහ සන්නිවේදන තාක්ෂණ වෘත්තිකයන්ගේ සමුළුව අමතමිනි.
එහිදී වැඩිදුරටත් අදහස් දක්වමින් මන්ත්‍රීවරයා මෙසේ ද කීවේය.
“ස්වදේශ කටයුතු අමාත්‍යාංශයේ හිටපු ඇමැතිවරයා හැටියටත් 2001දී රාජ්‍ය පරිපාලන ඇමැතිවරයා හැටියටත් කටයුතු කළ නිසා මට සමහර අවස්ථාවල පාර්ලිමේන්තුවේදීත්, විවිධ ස්ථානවලදී හිතෙනවා කතා කරනවාට වැඩිය හොඳයි කතා නොකරන එක කියලා.
මොකද එච්චරට අපි සිහින ලෝක ගොඩක් දැකලා අවසානයි. මට මතකයි 2001 රාජ්‍ය පරිපාලන අමාත්‍යාංශය භාර ගන්නවා. මට මතකයි, මම ඒ වෙලාවේ කළ කතාව. මම කිවුවා, අද මම මේ අමාත්‍යාංශය භාර ගන්නවා. හැබැයි මගේ ඉදිරියේ ඉන්න ඔබ හිතනවාද දන්නෙ නෑ අපි වගේ අයත් ඕනෙද කියලා. ඔහොම යමු කියලා තමයි පටන් ගත්තෙ.
ඒ වෙලාවේ රනිල් වික්‍රමසිංහ මහතා අග්‍රාමාත්‍යවරයා හැටියට බැලුවා ජාත්‍යන්තරයේ සහයෝගය ගෙන සම්පූර්ණ රාජ්‍ය යන්ත්‍රණයේ පරිවර්තනයක් ඇති කරන්න. ඒ හදපු වාර්තා තාමත් මගේ ළඟ තියෙනවා. හැබැයි ඉතින් ඒවායින් රටට වැඩක් වුණේ නෑ කියන එකයි ප්‍රකාශ කරන්න තියෙන්නෙ. කාලය සහ වේලාව ගත වුණා පමණයි.
ඒ වෙලාවේ අපි වොෂිංටන් එක්ක කෙළින්ම වැඩ කළා. වර්ල්ඩ් බෑන්ක් එක කෙළින්ම ඩොලර් මිලියන 98ක් දෙන්න රනිල් වික්‍රමසිංහ අගමැතිවරයාට පොරොන්දු වුණා. විශාල පරිවර්තනයකට යන්නයි අපි උත්සාහ කළේ. පරිවර්තනයක් කිවුවාම සමහර වෙලාවට රාජ්‍ය සේවකයන් හිතනවා දැන් අපට අවස්ථාව අහිමි වෙනවාද කියලා. නෑ අවස්ථාව අහිමි වෙන්නෙ නෑ අවස්ථාව වැඩි වෙනවා.
අද රාජ්‍ය සේවකයන් ලක්ෂ 13යි. විශ්‍රාමිකයන් ලක්ෂ 7½යි. සියල්ල ලක්ෂ 20ක් පමණ. රාජ්‍ය යන්ත්‍රණය හොඳට දුවනවා නම් මේ ලක්ෂ 20ටම වැඩ තියෙනවා. අපි එහෙමයි එවෙලේ හිතුවේ. ඒ වෙලාවේ හිටියා 450,000ක් වගේ විශ්‍රාමිකයන්. අද විශ්‍රාමිකයන් හත් ලක්ෂ ගණනකට වැඩියි.
ස්වදේශ කටයුතු අමාත්‍යාංශය මේ රටේ තිබෙන වැදගත්ම අමාත්‍යාංශයක්. අද එහි රාජ්‍ය ඇමැතිවරයා හැටියට අශෝක ප්‍රියන්ත මහතා ළඟ ඒ වගකීම තිබෙනවා. ඒ වගේම අග්‍රාමාත්‍ය දිනේෂ් ගුණවර්ධන මහතා පළපුරුදු දේශපාලන නායකයෙක් හැටියට එම අමාත්‍යාංශයට නායකත්වය දෙනවා.
දැන් මෙතන මතක් කළා ඉඩම් රෙජිස්ට්‍රාර් ජනරාල් දෙපාර්තමේන්තුව ගැන. අවුරුදු 170යි මේ දෙපාර්තමේන්තුවට වයස. කිසිම දවසක රාජ්‍ය නායකයෙක් පස් පාගලා නැති අමාත්‍යාංශයක්. මම ඇමැති කාලේ එතැනට අපි රනිල් වික්‍රමසිංහ අගමැතිවරයා එක් කරගෙන ගියා. ඒ මහතා මට දවසක් ලිපියක් එවලා තිබුණා. ඒ ලියුම තාම මගේ ළඟ තිබෙනවා.
මේ අමාත්‍යාංශය ඇතුළේ තිබෙනවා සේවා ගොඩක්. පරිපාලන, ඉංජිනේරු, නිර්මාණ ශිල්පී, විද්‍යාත්මක ආදී සේවා විශාල ප්‍රමාණයක් තිබෙනවා. මේ සේවාවලට සම තැන ලැබෙනතුරු අපේ රටට හරියන්නේ නෑ. ඒක ඉස්සරවෙලා සියලු දෙනා හිතේ තියාගන්න ඕනෙ. රාජ්‍ය යන්ත්‍රණය වෙනස් නොවුණොත් කඩාගෙන වැටේවි. ඒකෙ වැරැද්ද අපේ. ඇයි අපි වෙනස් වෙන්න කැමති නෑ. පෞද්ගලික යන්ත්‍රණය? පෞද්ගලික යන්ත්‍රණයෙත් වැඩ කරනවා 80,000ක් විතර. බලන්න කොයි තරම් ඉස්සරහින්ද ඔවුන් ඉන්නේ කියලා. කොයිතරම් වේගයෙන් ගමන් කරනවාද කියලා.
මෝටර් රථ ප්‍රවාහන දෙපාර්තමේන්තුවට, විදේශ ගමන් බලපත්‍ර කාර්යාලයට වෙන තැනකට යනකොට කොළ මිටියක් ගෙන යන යුගය මීට අවුරුදු 20කට ඉහතදී අවසන් වෙන්න තිබුණේ. තාමත් අපේ අය අද රියැදුරු බලපත්‍රය අලුත් කරන්න ගියොත් ආයෙමත් ඉල්ලනවා කොළ ටික. එහෙම රටකට ඉදිරියට යන්න පුළුවන් ද?
අපි හැමදාමත් ගත්තේ ලෝකයේ පැරණි තාක්ෂණය. ලෝකය AIවලට යනවා. අපි ඉන්නෙ වෙන තැනක. ඉතින් මේක ලේසි වැඩක් නොවේ. ඇමැතිවරයාගේ අවධානය මං හිතනවා යොමු කර ගන්න තිබෙන්නේ මේ සේවාව කොහොමද දීපව්‍යාප්ත සේවාවක් හැටියට පවත්වන්නේ කියලා. දැන් පුද්ගලික අංශ ඒක පිළිගෙන වේගයෙන් ඉදිරියට යනවා. දැන් ළමයි ලක්ෂ ගාණක් ඉන්නවා, ගෙවල්වල ඉඳන් වැඩ කරන්නෙ. වැටුප් ගන්නවා. විශාල ආදායමක් උපයා දෙනවා අපේ රටට.
දැන් මේ වැරැද්ද හැදුණේ නැතිනම් රට කිසි දවසක ඉදිරියට යන්නේ නෑ, ඒකයි මං කිවුවේ, පරිපාලන, ඉංජිනේරු, වෛද්‍ය, කෘෂිකර්ම, අධ්‍යාපන ඇතුළු සියලු සේවාවන් එක මේසයක වැඩ කරන්න බැරි නම් රටට අනාගතයක් නෑ කියලා. තරගයට කවුරුවත් ලොක්කො වෙන්න යන්න එපා.
ලංකාවේ හෝටල් තිබෙනවා, අයිතිකාරයා ජපානයේ. ජපානයේ ඉඳන් පාලනය කරන්නෙ. කොළඹ සහ කොල්ලුපිටියේ කාමර දෙතුන් සීයෙ හෝටල්. පාලනය කරන්නෙ ජපානයේ ඉඳගෙන. අවුරුද්දකට දෙපාරයි එන්නෙ. 100%ක් සාර්ථකයි. රටේ ආර්ථික වර්ධන වේගය වැඩි වෙනවා නම් අපේ ආර්ථික ශක්තිය වැඩි වෙනවා නම් රාජ්‍ය යන්ත්‍රණය වේගවත්ව යන්න තිබෙනවා. නැතිනම් රාජ්‍ය යන්ත්‍රණය අකර්මණ්‍ය වෙනවා.
ලෝකය ගිය ගමනත් එක්ක ලංකාවෙ රාජ්‍ය යාන්ත්‍රණය ගමන් කරන්න තිබෙනවා. දැනට අපි පසුගාමී වෙලා අවුරුදු 25කට වැඩියි. ඉතින් මෙය ලේසි අභියෝගයක් නොවේ. සියලු දෙනා එකතු කරගෙන, සියලු දෙනා මේක තේරුම් ගෙන හැම සේවාවකම ඉන්න අය මෙය තේරුම් ගෙන ඉදිරියට යා යුතුයි.”
