වෙනස්ම තේමාවන්ගෙන් යුත් චිත්‍රපට හැමදාමත් රැඳෙන්නේ ප්‍රේක්ෂක ජනතාව අතරේය. ශ්‍රී ලාංකේය සිනමාවට දායාදයක් වූ එවන් සිනමාපටයක් ඔබට මෙවර නැරැඹිය හැකි වන්නේ ජාතික රූපවාහිනියෙන් විකාශය වන සිනෙ ඡායා තුළිනි. 2020 වසරේ තිරගත වූ ‘ද නිව්ස්පේපර්’ චිත්‍රපටය නිෂ්පාදනය කරනු ලැබුවේ ආචාර්ය බන්දුල ගුණවර්ධන, රවීන්ද්‍ර ගුරුගේ සහ එච්. ඩී. ප්‍රේමසිරි විසිනි. මෙම චිත්‍රපටයේ මූලිකම විශේෂත්වය වන්නේ චිත්‍රපටය අධ්‍යක්ෂණය කරනු ලැබූ අධ්‍යක්ෂවරුන් දෙදෙනාම එහි ප්‍රධාන චරිතයට පණ පෙවීමයි. මෙහි ප්‍රධාන චරිතයන් දෙක රඟ දක්වනු ලැබුවේ සරත් කොතලාවල සහ කුමාර තිරිමාදුර විසිනි. චිත්‍රපටය තිරගත වීම ආරම්භ වීම ම සිදු වූයේ විශේෂිත කාරණාවක් ද මුල්කර ගනිමිනි. එනම් කොරෝනා වසංගතය හේතුවෙන් දින 105 ක් පුරාවට වසා දමා පැවැති සිනමා ශාලා විවෘත කිරීම වෙනුවෙන් තිරගත කළ නවතම සිනමාපටය වීමත් සමඟිනි.
චිත්‍රපටයේ කතා තේමාවට මූලික බීජය වන්නේ පුවත්පතක පළ වූ ප්‍රවෘත්තියක වැරැදි තොරතුරකි. යහපත් ජීවිතයක් ගත කරමින් සිටින ගුණා සහ පවුලේ උදවිය ත්‍රස්තවාදීන් ලෙසින් හංවඩු ගැසෙන්නේ මෙකී කරුණු හේතුවෙනි. ත්‍රස්තවාදීන්ය කියා ඔවුන් හංවඩු ගසන ගම්මුන් කැලෑ නීතියට අනුව යමින් ගුණාගේ ගේදොර පවා ගිනි තබා ඔහුට උරුම කරනුයේ ආබාධිත ජීවිතයකි. 
එතැන් පටන් ඔහුට හිමිවන්නේ රෝද පුටුවකි. එහෙත්, මේ අතර ගුණාට එක් යහළුවෙක් පමණක් ඉතිරි වේ. ඔහු නමින් ලුවිස්ය. මිනිත්තු 103ක් පුරා දිවෙන චිත්‍රපටයේ ඉදිරි ගලා යෑම සිදු වන්නේ මේ මතිනි.
එක් සිදු වීමක් හේතුවෙන් සිද්ධීන් ගණනාවක්ම නිරූපණය කරමින් විවිධ පැතිකඩ පෙන්වා දීමට උත්සුක වන අතර සමාජයේ නිරන්තරයෙන් සිදුවන මංකොල්ලකෑම් සහ මත්ද්‍රව්‍ය සම්බන්ධයෙන්ද ස්පර්ශ කිරීමක් සිදු කරනුයේ එය චිත්‍රපටයට ද බද්ධවන ප්‍රධාන පෙළේ සිදුවීම් බවට පත්කර ගනිමිනි. එහෙයින් චිත්‍රපටයේ අවසානය ද ලියැවෙන්නේ සිදුවීම් එකක් මත එකක් පිහිටි ආකාරයෙනි. චිත්‍රපටයේ සිදුවීම්මාලාව ඇරැඹෙන්නේ ද ගුණා සහ ලුවිස් කොළඹට පැමිණ පත්තර කන්තෝරු ගානේ යෑම ආරම්භ වීමත් සමඟිනි. ඔවුන් එසේ පැමි‍ණෙන්නේ ද ගුණාගේ සොහොයුරාට එරෙහිව අසාධාරණ ලෙස දොස් පැවරූ පුවත් පත්‍රිකාවක වැරැදසහගත පුවත නිවැරැදි කිරීමේ අරමුණෙනි.
ආරම්භයේදීම චිත්‍රපටයේ විශේෂ දර්ශනයක් පැවැතියේ 2020 ජුනි 29 දින වැල්ලවත්ත සැවෝයිහි ප්‍රීමියර් ශාලාවේදීය. චිත්‍රපටය නැරැඹීමේදී පෙනී යන කරුණු වන්නේ එක් කාර්යයක් කර ගැනීම වෙනුවෙන් සුදුසුකමක් ලෙස තවත් කාගේ හෝ කාර්යයක් කළ යුතු බවයි. තම පුවත පුවත්පත් ආයතනය බැහැර කළ ද ඔවුන්ට එය පුවත්පතකට යොමු කළ හැකිවන්නේ පොලිසියේ මැදිහත්වීම මතයි. එයට හේතු වූයේ ඔවුන් දෙදෙනා මංකොල්ලකරුවකු අල්ලා ගැනීමට පොලිසියට උදවු දුන් නිසාවෙනි. මෙම චිත්‍රපටය තිරගත වීමත් සමඟ වඩාත් ප්‍රේක්ෂක අවධානයට යොමු වීමට හේතු වූ කාරණාව වන්නේ අධ්‍යක්ෂවරුන් දෙදෙනා විසින් මනා ලෙස සමාජය කියවීමට උත්සාහයක් ගෙන තිබීමයි.
චිත්‍රපටය සම්බන්ධයෙන් කරුණු දැක්වීමේ දී එහි එන තේමා ගීතය පිළිබඳව මහත් කතාබහට ලක් වූ බව කිව යුතුය. එයට කරුණු කීපයක්ම ඒකරාශි වී තිබිණි. ඉන් එක් කරුණක් වන්නේ ආචාර්ය නන්දා මාලනිය වසර ගණනාවකට පසු චිත්‍රපට පසුබිම් ගායනයට එක් වීමෙන් පසු හොඳම ගායනයට හිමි සම්මානය දිනා ගැනීමට සමත් වීමයි. සුනිල් ආරියරත්න විසින් රචනා කළ එම ගීතය සංගීතවත් කරනු ලැබුවේ ප්‍රේමසිරි කේමදාසයන් ගේ දියණිය වන ගයත්‍රී කේමදාස විසිනි.
‘දොළේ දියත් නැති විය නුඹ නහවන්නට
තන කිරිත් හිඟ විය තොල් සඟවන්ට
කටුසර බෝග තිබුණේ බඩ පුරවන්ට
සමා වෙයන් පුතුනේ නුඹ වැදුවාට’
චිත්‍රපටයේ සංගීතය පිළිබඳව ගයත්‍රී පවසන්නේ මෙවැන්නකි.
“මට මේ චිත්‍රපටයට සංගීත කටයුතු කරන්න කතා කළේ කුමාර තිරිමාදුර සහ සරත් කොතලාවල. මීට පෙර ඔවුන්ගේ චිත්‍රපටයක මම සංගීත කටයුතුවලට සම්බන්ධ වුණා. මේ මම සංගීතවත් කරපු දෙවෙනි චිත්‍රපටය. මීට ඉස්සෙල්ලා විදේශ වැඩසටහන්වලට සංගීත කටයුතුවලට මම සම්බන්ධ වුණා. විශේෂයෙන් කියන්න ඕන කාරණාවක් තමයි චිත්‍රපට සංගීතය වෙනුවෙන් ද නිව්ස්පේපර් චිත්‍රපටයට ජාත්‍යන්තර වශයෙන් සම්මාන ලැබීමත් සමඟ විදේශයන්ගෙන් වැඩි වශයෙන් මට ප්‍රතිචාර ලැබෙන්න පටන් ගත්තා.” යනුවෙනි. 
මෙම චිත්‍රපටයේ ප්‍රධාන චරිතයන් අතරට සරත් කොතලාවල (ගුණා) කුමාර තිරිමාදුර (ලුවිස්) ලෙසින් සම්බන්ධ වන අතර ඊට අමතරව ධර්මප්‍රිය ඩයස්, පුබුදු චතුරංග, ගිහාන් ප්‍රනාන්දු, ශ්‍යාම් ප්‍රනාන්දු, ගිරිරාජ් කෞෂල්‍ය, වසන්ත කුමාරවිල, නෙතලි නානායක්කාර, මිහිර සිරිතිලක මෙන්ම ජයලාල් රෝහණ, උමයංගනා වික්‍රමසිංහ, දිමුතු චින්තක, දයාදේව එදිරිසිංහ. හේමන්ත ඊරියගම, මාෂි සිරිවර්ධන, සරත් කරුණාරත්න, නිල්මිණි කෝට්ටගොඩ, සරත් කුලතුංග, ආනන්ද අතුකෝරල, සරත් චන්ද්‍රසිරි, අජිත් ලොකුගේ, රුවන් මදනායක, වසන්ත මොරගොඩ, රුක්මාල් නිරෝෂ්, චින්තක පීරිස්, ජානක රණසිංහ ප්‍රියන්ත සිරිකුමාර රංගනයෙන් සම්බන්ධ වූහ.
සරත් කොතලාවල සහ කුමාර තිරිමාදුර තිර පිටපත ලියා අධ්‍යක්ෂණය කළ චිත්‍රපටයේ කැමරා අධ්‍යක්ෂණය චන්දන ජයසිංහය. ‘ද නිව්ස්පේපර්’ චිත්‍රපටයේ සංගීත අධ්‍යක්ෂණය ගයාත්‍රී කේමදාස වන අතර සංස්කරණය රුක්මල් නිරෝෂ්ගේය.
මෙම චිත්‍රපටය දෙස් විදෙස් සිනමා විචාරකයින්ගේ පවා මහත් පැසසුමට ලක් වූ අතර දෙස් විදෙස් සම්මාන රාශියක් ද දිනා ගැනීමට සමත් විය. චිත්‍රපටයේ පළමු ජාත්‍යන්තර සම්මානය 2022 වසරේදී බැංගලෝර් ජාත්‍යන්තර චිත්‍රපට උලෙළේ, (ආසියානු සිනමා උලෙළේදී) දෙවන හොඳම ස්ථානය දිනා ගැනීමට සමත් විය. ඉන්පසු ද නිව්ස්පේපර් සිනමාපටය තම දෙවන ජාත්‍යන්තර සම්මානය දිනා ගනු ලැබුවේ 23වන ලන්ඩන් රේන්බෝ සිනමා උලෙළේ දීය. මෙහි දී හොඳම අධ්‍යක්ෂණය වෙනුවෙන් හිමි සම්මානය දිනා ගැනීමට සමත් විය. 2022 වසරේ මැයි 29 දා සිට ජුනි 5 වනදා දක්වා මෙම සිනමා උලෙළ පැවති අතර ප්‍රශ්න විචාරාත්මක වැඩසටහන්, සම්මන්ත්‍රණ ආදී විශේෂ වැඩසටහන්වලින් පසුව ජයග්‍රාහී චිත්‍රපටය නම් කරන ලදි. මෙම සම්මානයන් දෙක දිනා ගැනීමෙන් පසුව 2022 අගෝස්තු 12 වන දා සිට 30 දක්වා ඔස්ට්‍රේලියාවේ මෙල්බර්න් හිදී පැවැති 13වන මෙල්බර්න් ඉන්දියානු සිනමා උලෙළ සඳහා ශ්‍රී ලංකාවෙන් චිත්‍රපට දෙකක් තෝරා ගැනිණි. ඉන් එක් සිනමාපටයක් වූයේ ද නිව්ස් පේපර්ය. ඉන්දියානු උප මහාද්වීපික අංශයේ හොඳම චිත්‍රපටය සඳහා වූ නිර්දේශිත චිත්‍රපට අතරට නිව්ස් පේපර් තෝරාගෙන තිබිණි.
ඉන් අනතුරුව 2022 සැප්තැම්බර් මාසයේ දී රුසියාවේ පැවැති කසාන් සිනමා උලෙළේ තරගකාරී අංශයෙන් හොඳම නළුවාට හිමි සම්මානය දිනා ගැනීමට කුමාර තිරිමාදුර සහ සරත් කොතලාවල ට අවස්ථාව ලැබිණි. එදින ඔවුන් දෙදෙනාට හිමි සම්මානය රැගෙන එනු ලැබුවේ, එම සිනමා උලෙළේ සංවිධායක මඬුල්ලේ ඇරියුමින් උලෙළේ සමාප්තියට සහභාගි වූ අමාත්‍ය බන්දුල ගුණවර්ධන මහතාය. එම චිත්‍රපට උලෙළ නම් කර තිබුණේ කසාන් අන්තර්ජාතික මුස්ලිම් චිත්‍රපට උලෙළ නමිනි.
කසාන් අන්තර්ජාතික මුස්ලිම් චිත්‍රපට උලෙළේදී හොඳම නළුවාට හිමි සම්මානය හා ලන්ඩන්වල රේන්බෝ සිනමා උලෙළේදී හොඳම අධ්‍යක්ෂණය වෙනුවෙන් හිමි සම්මානය ඇතුළු ජාත්‍යන්තර සම්මාන රැසක් දිනා ගත් “ද නිව්ස්පේපර්” චිත්‍රපටය මුල්වරට දේශීය වශයෙන් ඇගයීමට ලක් වූයේ පසුගිය සැප්තැම්බර් මාසයේදීය. කොළඹ දිස්ත්‍රික් සංස්කෘතික බල මණ්ඩලයේ සංවිධානයෙන් පැවති සම්මාන උත්සවය නම්කර තිබුණේ ‘කොළොම්තොට හරසර ප්‍රණාම’නමිනි. සම්මාන උලෙළේ දී චිත්‍රපටයේ අධ්‍යක්ෂවරුන් මෙන්ම ප්‍රධාන චරිතයෙන් සම්බන්ධ වූ කුමාර තිරිමාදුර සහ සරත් කොතලාවල ඇගයීමට ලක් වූ අතර චිත්‍රපටයේ සම නිෂ්පාදකවරුන් වන ජනමාධ්‍ය හා ප්‍රවාහන අමාත්‍ය ආචාර්ය බන්දුල ගුණවර්ධන, සරසවි පොත් ප්‍රකාශන ආයතනය අධිපති එච්. ඩී. ප්‍රේමසිරි සහ සංස්කරණ ශිල්පී රවීන්ද්‍ර ගුරුගේ විශේෂ සම්මානයන්ට පාත්‍ර විය. මේ සියලු කාරණා අතර අනෙකුත් ශිල්පීන්ට ද සහතික පත්‍ර පිරිනැමීමක් සිදු කෙරිණි. ජාත්‍යන්තර වශයෙන්, ද නිව්ස්පේපර් චිත්‍රපටය නොයෙක් වර සම්මානවලට නිර්දේශ වුවද, සම්මාන ලැබූවද වසර 3කට පසුව දේශීය වශයෙන් ලද ප්‍රථම ඇගයීම වන්නේ ‘කොළොම්තොට හරසර ප්‍රණාම’සම්මාන උලෙළයි.
2020 වසරේ තිරගත වූ “ද නිව්ස්පේපර්” චිත්‍රපටය නැවුම් කතාබහකට මුල පුරනු ලැබුවේ පසුගියදා පැවැති 20වන ජනාධිපති සම්මාන සිනමා උලෙළේ දීය, වසර තුනකට පසුව පැවැති මෙම සිනමා සම්මාන උලෙළේදී 2020 වසරේ තිරගත වූ චිත්‍රපට අතුරින් හොඳම නළුවා සම්මානය දිනා ගනු ලැබුවේ ද නිව්ස්පේපර් චිත්‍රපටයේ කුමාර තිරිමාදුර විසිනි. මෙයට මනා වටිනාකමක් ලැබීමට හේතු කාරණා වූයේ 2020 වසරේ තිරගත වූ චිත්‍රපට අතරින් හොඳම චිත්‍රපටය ලෙසින් ද නිව්ස් පේපර් චිත්‍රපටය සම්මානයට පාත්‍ර වීමත් සමගිනි. එම වටිනාකම වඩාත් තීව්‍ර වූයේ කලකට පසුව චිත්‍රපට පසුබිම් ගායනයට සම්බන්ධ වූ නන්දා මාලනිය හොඳම ගායනයට හිමි සම්මානය දිනා ගැනීමත් සමඟිනි.
සිනෙ ඡායා තුළින් අද රාත්‍රී 10.00ට ජාතික රූපවාහිනියෙන් මිනිත්තු 103ක් පුරා දිවෙන “ද නිව්ස්පේපර්” චිත්‍රපටය විකාශය කෙරේ. ඊට පෙර ආචාර්ය බන්දුල ගුණවර්ධන, බුද්ධදාස ගලප්පත්ති, කුමාර තිරිමාදුර සහ ප්‍රවීණ සිනමා විචාරක ගාමිණී වේරගම විසින් පවත්වනු ලබන සිනමා විචාරයක්ද රාත්‍රී 9.30 සිට විකාශය වීමට නියමිතය.
ජනාධිපති සිනමා සම්මාන උලෙළකදී හොඳම පද රචනය, හොඳම ගායිකාව, හොඳම ගී තනුව, හොඳම සංගීත අධ්‍යක්ෂණය යන සම්මාන හතරම එකවිට දිනූ ‘ද නිවුස්පේපර්’ චිත්‍රපටයේ ඇතුළත් එකම ගීතය
දොළේ දියත් නැති විය නුඹ නහවන්ට
තනේ කිරිත් හිඟ විය තොල් පොඟවන්ට
කටුසර බෝග තිබුණේ බඩ පුරවන්ට
සමා වෙයන් පුතුනේ නුඹ වැදුවාට
රෑ ගානක් උලලේනෙක් හැඬුවාය
ගම්මැද්දේ බැල්ලී උඩබිරුවාය
නුඹ එන තුරා අම්මා දින ගැන්නාය
හාමත් වෙලා ගොම පොළොවේ වැටුණාය
දුක් ගිනි නිවන්නට මතු ජාතියක නුඹේ
ආයෙත් මගෙ බඩට දවසක වරෙන් පුතේ
නුඹ මට කරපු දේවල් මහ මෙරක් වගේ
අම්මා නොවෙයි බුදු වන්නේ නුඹයි පුතේ
