මෙම තරගාවලියට සහභාගි වීමට බලාපොරොත්තු වන පෙර පාසල්, ප්‍රාථමික පාසල් සහ ද්විතීයික පාසල් සිසුන්ට සම්බන්ධ වීමට තවත් මාස 2ක කාලයක් ලබා දෙමින් LMSV season 3 ශූරතාවලියේ කාලසීමාව දෙසැම්බර් 31 දක්වා දීර්ඝ කර ඇති බවට රොටරි ආයතනය නිවේදනය කරයි.
Little Minds Strong Values (LMSV) යනු රංග කලාව තුළින් ළමුන් තුළ ආචාරධර්ම සහ සාරධර්ම ප්‍රවර්ධනය කිරීම සඳහා කොළඹ මෙට්‍රොපොලිටන් රොටරි සමාජය මඟින් ආරම්භ කරන ලද ව්‍යාපෘතියකි. WWW.LMSV.LK වෙබ් අඩවියේ championship යන කොටස යටතේ සියලුම උපදෙස් ලබා ගත හැකිය. LMSV වැඩසටහනට අදාළ රූපවාහිනි වැඩසටහනේ පෙනී සිටින දරුවනුත් මෙම තරගාවලියට සහභාගිවන්නන් අතරින් තෝරා ගනු ලැබේ. නි‍ෙවසේ සිටින ඔබේ දරුවා සහ පාසල්වල, ආගමික හෝ වෙනත් සංවිධානවල සිටින දරුවන් මෙම යහපත් වටිනාකම් ඉගෙන ගෙන වසර අවසන් වීමට පෙර ශූරතාවලියට සහභාගී වීමට දිරිමත් කරන්න.
උපන් දිනයයි දින 50යි
ප්‍රහසන සිනමාත්මකව කලාවට නැවුම් අර්ථයක් ගෙන ආ කතුරු මිතුරු අධ්‍යක්ෂ ගිරිරාජ් කෞෂල්‍යගේ උපන් දිනය පසුගිය දිනට යෙදී තිබුණි. ඒ ආලංකුලම ෆිල්ම් වෙනුවෙන් බාසුරු සිරිවර්ධන නිෂ්පාදනයක් වන ‘කතුරු මිතුරු’ දින 50 පසු කරන දිනටයි. එදින ගිරිරාජ් කෞශල්‍යගේ පවුලේ සියලුම දෙනා ඇතුළු කතුරු මිතුරු වෙනුවෙන් නිෂ්පාදනයෙන් දායකත්වය දැක්වූ නළු නිළියන් ඇතුළු කාර්මික ශිල්පීහු සහභාගි වූහ. එදින විශේෂ ආරාධිත අමුත්තන් සහ මාධ්‍යවේදීහුද සහභාගි වූහ. දිවයින පුරා සියලුම සිනමා ශාලාවල ප්‍රදර්ශනය වන කතුරු මිතුරු මේ වන විට ලක්ෂ 2000ක ආදායම පසුකරමින් අතිසාර්ථකව ප්‍රදර්ශනය වේ.
මධූෂිගෙන් ගීත 6ක්
මධූෂි ලක්මි බණ්ඩාරගේ කුලුඳුල් ගීත ඇල්බමය නුදුරේදීම නිකුත් වීමට නියමිතය. මෙහි ගීත 6ක් ඇතුළත් වන අතර ශාන්ති ජයසිරි, එම්. සූරිය බණ්ඩාර සහ ඉෂාරා තරංගනී එම ගීතයන්හි පද රචනයෙන් දායක වේ. සංගීත නිර්මාණය සංගීත අධ්‍යක්ෂ ආනන්ද වෛද්‍යසේකර ගෙනි.
භාරතය දිනූ පුංචි කෙල්ල
යාපනයේ අරියාලේ සුන්ඩුන්කුලි බාලිකා විද්‍යාලයේ අටවන වසරේ ඉගෙනුම ලබන කිල්මිෂා දියණිය තමිල්නාඩු රූපවාහිනි නාළිකාවක “සරිගමපා” රියැලිටි වැඩසටහනේ අවසාන තරගයට තේරී පත්වසිටී. තමිල්නාඩු ප්‍රාන්තයේ අතිවිශාල ජනප්‍රසාදයක් දිනාගෙන සිටින ඇයගේ ප්‍රසංග ඇතුළත් යූ ටියුබ් නැරඹුම් වාර දස ලක්ෂය ද ඉක්මවා ගොස් තිබේ.
සුද්දගෙ කියුම
එඬෙරමුල්ල ශාන්ත සෙබස්තියන් විද්‍යාලීය ශ්‍රවණාගාරය ප්‍රතිසංස්කරණය කිරීමේ අරමුණින් එහි ආදි ශිෂ්‍ය සංගමය සංවිධාන කරනු ලබන විල්සන් ගුණරත්න නවතම නාට්‍ය නිර්මාණය” සුද්දගෙ කියුම”එළැඹෙන 02වැනි දා සන්ධ්‍යාවේ මරදාන එල්ෆින්ස්ටන් රඟහලේ දී වේදිකාගත කෙරේ. සම නිෂ්පාදනය ෂෙරිල් සොනිකාගෙනි.
විවිධ චරිත හතරක් විල්සන් ගුණරත්න රඟපාන අතර චන්ද්‍ර තිලක් ගුණරත්න, කීර්ති බණ්ඩාර, දයානන්ද හේවගේ, චින්තක පතිරණ, නීතිඥ පංචාල ලියනගේ, අනුර විරසිංහ, ජයනි චාමිනි සමඟ චාමර කසුන්, රංගනයෙන් එක්වෙති.
කාලී මුහුරත් උලෙළ
කාලී සිනමා සිත්තමේ මුහුරත් උලෙළ ඉකුත්දා (28) දින පෙරවරුවේ කොළඹ හිල්ටන් හෝටල් පරිශ්‍රයේදී කලා ක්ෂේත්‍රයේ බොහෝ පිරිසකගේ සහභාගිත්වයෙන් ඉතා උත්කර්ෂවත් අන්දමින් පැවැත්විණි. එලිගන්ට් ක්ලියෝපැට්‍රා සමාගම විසින් නිෂ්පාදනය කරන කාලී සිනමා පටය කලාසූරී ආචාර්ය මේනක කෞශල්‍ය අරුමපුරගේ ස්වතන්ත්‍ර නිර්මාණයකි. ප්‍රවීණ සිනමා කැමරා ශිල්පී මහේෂ් කරුණාරත්නගේ මුල්ම සිනමා අධ්‍යක්ෂණය කාලී වේ. වෛද්‍ය නුවන්දිකා සිරිවර්ධන හා ගයාන් වික්‍රමතිලක ප්‍රධාන චරිත නිරූපණය කරන මේ සිනමා පටයට ශ්‍රියන්ත මෙන්ඩිස්, රොෂාන් පිලපිටිය, සංජානා ගම ආරච්චි, කුසුම් රේණු, මේනක කෞශල්‍ය අරුමපුර, චන්දික නානායක්කාර වැනි දක්ෂ හා ප්‍රවීණ ශිල්පීහු රැසක් රංගන දායකත්වය සපයති.
වෙනස් මඟක් ගත් Solo Town
Solo Town යනු, සිංහල සිනමාවට එක්වන, වෙනස්ම චිත්‍රපටයකි. එහි මුහුරත් උලෙළ සහ එහි නළු නිළියන් හඳුන්වා දීමේ වැඩසටහන පසුගියදා කලා ක්ෂේත්‍රයේ ජනප්‍රිය නළු නිළියන්ගේ සහ මාධ්‍යවේදීන්ගේ සහභාගිත්වයෙන් පැවැත්වුණි. ඒ බොල්ගොඩ Wave by Singhe පරිශ්‍රයේ දීය. “Solo Town” සිනමාපටයේ ප්‍රධාන චරිතය රඟපාන්නේ මෙරට ටෙලි තිරයේ ජනප්‍රිය සහ දක්ෂ රංගන ශිල්පියකු වන රවීන් කනිෂ්කය. මෙහි ප්‍රධාන කාන්තා චරිතය නිරූපණය කරන්නේ ශනායා වැන්හොෆ් විසිනි. බිමල් ජයකොඩි, මිශෙල් දිල්හාරා සෙසු චරිත නිරූපණය කරති. සිනමාපටයේ තිර රචනය අයේෂා ජයරත්න සහ චතුරංගන ද සිල්වාගෙනි. සහන් වික්‍රමආරච්චි සහ පුෂ්පිත නිර්මාල් සුසංයෝගයෙන් කැමරාකරණය සිදු කරති. චිත්‍රපටයේ සංගීත නිර්මාණයෙන් චතුරංගන ද සිල්වා දායක වේ. හර්ෂ මංජුල වේශ නිරූපණයෙන් ද, කලා මධුරංග මාරසිංහ කලා අධ්‍යක්ෂණයෙන් ද දායක වෙති. යශෝද දණුපම “Solo Town” වලට වර්ණ සංයෝජනයෙන් දායක වේ. නිෂ්පාදන කළමනාකරු කවීන්ද්‍ර ගංගීත්ය. සොඳුරු ලොකුපෝතාගම චිත්‍රපටයේ සහය අධ්‍යක්ෂවරයායි. මෙහි අධ්‍යක්ෂවරු වන්නේ, චතුරංගන ද සිල්වා – සහන් වික්‍රමාරච්චි ය. “Solo Town” සිනමාපටය, Stage Adventures Pvt. Ltd නිෂ්පාදනයකි.
බිඟුසර රත්නායක සිහින රඟහල
ධනංජය කරුණාරත්න තිරපිටපත රචනා කොට අධ්‍යක්ෂණය කළ කෙටි නාට්‍ය පහකින් සමන්විත ‘සිහින රඟහල’ එළඹෙන 03වැනිදා සවස කොළඹ ලයනල් වෙන්ඩ්ට් රඟහලේ දී වේදිකාගත කෙරේ.
සිනමා සම්මන්ත්‍රණයක් අද
ප්‍රංශය හා ශ්‍රී ලංකාව අතර රාජ්‍යතාන්ත්‍රික සම්බන්ධතාවට වසර 75ක් පිරීම නිමිත්තෙන් “සිනමාව හා සමාජය යටත් විජිත හා පශ්චාත් නිදහස් සමයේ ශ්‍රී ලංකාව සිනමාවේ ආරම්භය හා පරිණාමය” යන තේමාව යටතේ සම්මන්ත්‍රණයක් හෙට පස්වරු 06.00 ට කොළඹ 7 හෝර්ටන් පෙදෙසේ, ලයිට් හවුස් ශ්‍රවණාගාරයේ දී පැවැත්වේ.
එදින ප්‍රංශයේ La Reunion විශ්වවිද්‍යාලයේ මහාචාර්යවරියක වන, ලාංකේය සිනමාවේ මුල් යුගයේ ප්‍රවීණ චිත්‍රපට අධ්‍යක්ෂවරයෙකු වූ රොබින් තම්පෝ මහතාගේ දියණිය වන විලාසනි තම්පෝ ඔතැන් විශේෂ දේශනයක්ද පවත්වනු ඇත.
