ගිරිඋල්ල අධ්‍යාපන කලාපයට අයත් බෝයවලාන මහා විද්‍යාලයේ සිසුන් 22කට සහ ගුරුවරියන් දෙදෙනෙකුට ඊයේ (28දා) දහවල් 12ට පමණ බඹරුන් දෂ්ට කිරීම හේතුවෙන් දඹදෙණිය මූලික රෝහලට සහ අලව්ව ප්‍රාදේශීය රෝහලට ඔවුන් සියලු දෙනා ඇතුළත් කිරීමට පියවර ගෙන තිබේ.
පාසල් භූමියේ රුක්අත්තන ගසක බැඳ තිබූ බඹර වදයකට දහවල් කාලයේදී උකුස්සකු පහරදීම නිසා එය ඇවිස්සීමෙන් විද්‍යාලයේ අධ්‍යාපන කටයුතුවල නිරතව සිටි සිසුන්ට සහ ගුරුවරුන්ට එසේ බඹරුන් දෂ්ට කර ඇත.
විදුහලට යාබදව පිහිටි ක්‍රීඩාංගණයේ ක්‍රීඩා කරමින් සිටි ප්‍රදේශයේ ළමුන් 10 දෙනෙකු ද එම බඹරුන් දෂ්ට කිරීම නිසා අලව්ව ප්‍රාදේශීය රෝහලට ඇතුළත් කිරීමට පියවර ගෙන ඇති අතර, විද්‍යාලයේ එක් ගුරුවරියක් ද එම රෝහලට ඇතුළත්ව ප්‍රතිකාර ලබන බව අලව්ව ප්‍රාදේශීය රෝහලේ ප්‍රකාශකයෙක්
පැවැසීය.
දඹදෙණිය මූලික රෝහලට ඇතුළත් කළ තවත් ගුරුවරියක මූලික ප්‍රතිකාර ලබා පිටව ගිය බවත් රෝහලට ඇතුළත් කළ සිසුන් 22ට බඹරුන් දෂ්ට කිරීමෙන් බරපතළ තත්ත්වයක් නොමැති බව දඹදෙණිය මූලික රෝහලෙන් කළ විමසීමේදී පැවැසීය.
මේ පිළිබඳ බෝයවලාන මහා විද්‍යාලයේ විදුහල්පති අස්වින් බණ්ඩාර මහතාගෙන් කළ විමසීමේදී එම බඹර වදය පෙරේදා 26දා දෙමාපියන් පිරිසක් විසින් රාත්‍රි කාලයේදී දුම් ගසා ඉවත් කිරීමට පියවර ගත්ත ද එය සාර්ථක වී නොමැති බවත් බඹර දෂ්ටනයෙන් පසුව විද්‍යාලයේ අනෙක් සියලු සිසුන් ආරක්ෂිතව
ඉවත් කර ගැනීමට පියවර ගත් බව වැඩිදුරටත් පැවැසීය.
