2008 වසරේදී ඇල්පිටිය පොලිස් ස්ථානයේ අත්අඩංගුවේ සිටියදී පහරදීමෙන් මියගිය අයෙකුගේ මරණය සම්බන්ධයෙන් විධිමත් විමර්ශනයක් පවත්වා සිද්ධියට අදාළ නිලධාරීන් වහාම අත්අඩංගුවට ගෙන අධිකරණයට ඉදිරිපත් කරන ලෙස බලපිටිය මහාධිකරණ විනිසුරු රංග දිසානායක මහතා පසුගියදා නියෝග කළේය.
මෙම සිද්ධියට අදාළ යැයි මේ දක්වා චෝදනා කරමින් අධිකරණයට ඉදිරිපත් කර සිටි සිවු දෙනෙකු වහාම නිදොස් කොට නිදහස් කළ මහාධිකරණ විනිසුරුවරයා අදාළ නියෝගය නිකුත් කළ අතර එහි පිටපත් පොලිස්පති, නීතිපති, පොලිස් කොමිෂන් සභාවේ සභාපති, මානව හිමිකම් කොමිසමේ සභාපති, ඇතුළු පිරිසට යවන ලෙසද රෙජිස්ට්‍රාර්වරියට නියෝග කළේය.
පසුගිය 2008 වසරේ ඔක්තෝබර් 17 වැනිදා ඇල්පිටිය පිටුවල කන්ද පදිංචි ඉලුක්පිටිය ගමගේ පියදාස නමැත්තා ගේ මරණය සම්බන්ධයෙන් යැයි පවසමින් සැකපිට චුදිතයින් හතර දෙනකු අත්අඩංගුවට ගෙන අධිකරණයට ඉදිරිපත් කර තිබිණ. ඒ අනුව අත්අඩංගුවට ගෙන තිබූ සරත් විජේරත්න, කරුණාවසම් පේදුරුතන්ත්‍රිගේ සමන් කුමාර, දොන් නිෂාන්ත පණ්ඩිතරත්න, කහදුව කංකානම්ගේ ප්‍රසාද් කුමාර යන සැකකරුවන් මෙසේ නිදොස් කොට නිදහස් කිරීමට මහාධිකරණ විනිසුරුවරයා නියෝග කළේය. විනිසුරුවරයාගේ නඩු තීන්දුවේ මෙසේ සඳහන් වේ.
අධිකරණයට ඉදිරිපත් කර ඇති සාක්ෂි හා කරුණු අනුව ඉතාම නිවැරදිව පැහැදිලි වන්නේ මියගිය පියදාස නමැත්තා මියයාමට හේතු වී ඇත්තේ 2008.10.18 වන දින පැය 14.30 ට උප පොලිස් පරීක්ෂක චන්ද්‍රසූරිය ඇතුළු නිලධාරීන් කණ්ඩායමක් විසින් අත්අඩංගුවට ගැනීමෙන් පසුව ඔහුට සිදු කර ඇති පහරදීම් හේතුවෙන් බවයි. මෙම අපරාධය සම්බන්ධයෙන් වගකිවයුතු නියම පුද්ගලයින් හඳුනාගෙන ඔවුන් අත්අඩංගුවට ගෙන අධිකරණයට ඉදිරිපත් කරන ලෙස නියෝග කළේය.
මෙම නඩු විභාගයේදී පතිරණ විතානගේ සිරිතුංග, විශ්‍රාමලත් උප පොලිස් පරීක්ෂක පල්ලගෙ රාළලාගේ චන්ද්‍රසූරිය, විශ්‍රාමික ජ්‍යෙෂ්ඨ පොලිස් අධිකාරි ඩී.එම්. කරුණාරත්න බණ්ඩා, විශ්‍රාමික අධිකරණ වෛද්‍ය නිලධාරී එච්.එම්. මහින්ද, විශ්‍රාමික සහකාර පොලිස් අධිකාරී කහවත්ත ලියනගේ සුජීව නිශාන්ත, ප්‍රධාන පොලිස් පරීක්ෂක ප්‍රභාත් කුමාර ජ්‍යෙෂ්ඨ පොලිස් අධිකාරී විජිතලාල් උඩුගමසූරිය, කාන්තා උප පොලිස් පරීක්ෂක ධම්මිකා දීෂානි, සමරක්කොඩි මුදියන්සේලාගේ විමලාවතී (මියගිය අයගේ බිරිය) යන අය සාක්ෂි ලබා දී තිබුණි.
චුදිතයින් වෙනුවෙන් නීතිඥ සමන් තාබ්‍රෙව් පෙනීසිටි අතර පැමිණිල්ල වෙනුවෙන් රජයේ ජ්‍යෙෂ්ඨ අධිනීතිඥ සෞම්‍ය විජේසිංහ මෙණෙවිය පෙනී හිටියාය.
