පොළොන්නරුව රිමාන්ඩ් බන්ධනාගාරයේ කටයුතු නිරීක්ෂණය කිරීමට අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍ය ජනාධිපති නීතිඥ, ආචාර්ය විජයදාස රාජපක්ෂ මහතා අද (28) පෙරවරුවේ සහභාගි විය.
එම බන්ධනාගාරයේ මුළුතැන්ගෙය, වෘත්තිය පුහුණු කටයුතු නිරීක්ෂණය කළ අධිකරණ අමාත්‍යවරයා, විශේෂිත අංශයේ රදවා සිටින සිරකරුවන්ගේ තොරතුරු පිළිබදව සාකච්ඡා කළේය.
පොළොන්නරුව බන්ධනාගාරයේ විශේෂිත අංශයේ සිරකරුවන් සමග සාකච්ඡා කිරීමෙන් අනතුරුව එම අංශයේ රදවා සිටින සියලුම සිරකරුවන්ගේ තොරතුරු ඇතුළත් වාර්තාවක් කඩිනමින් තමන් වෙත ලබාදීමට පියවර ගන්නා ලෙස නිලධාරීන්ට අමාත්‍යවරයා විසින් උපදෙස් ලබා දෙන ලදී.
පොළොන්නරුව බන්ධනාගාර තුළ රැදවියන් 175 දෙනෙකු සදහා ප්‍රමාණවත් පහසුකම් පැවතිය ද මේ වන විට 315 දෙනෙකු රදවා සිටින බව අනාවරණය විය.
මහාචාර්ය අති පුජ්‍ය පාතේගම ඥාණිස්සර නායක ස්වාමීන් වහන්සේ, බන්ධනාගාර කොමසාරිස් ජනරාල් තුෂාර උපුල්දෙණිය, පොලොන්නරුව බන්ධනාගාරයේ සහකාර අධිකාරී, යන මහත්වරුන්ද මෙම අවස්ථාවන් සදහා එක්ව සිටියහ.
