ශ්‍රී ලංකා ක්‍රිකට් ආයතනය සිලෝන් ඇග්‍රෝ ඉන්ඩස්ට්‍රීස්හි ප්‍රීමා අනුග්‍රහයෙන් සංවිධාන කරන අන්තර් දිස්ත්‍රික් අවුරුදු 15න් පහළ ශ්‍රී ලංකා යොවුන් ලීග් ක්‍රිකට් තරගාවලියේ තරග 4ක් නිමා වන විට ප්‍රසාද ලකුණු සටහනේ පෙරමුණ ගැනීමට කොළඹ දකුණ ක්‍රීඩකයෝ සමත්ව සිටිති.
කොළඹ රාජකීය විදුහලේ තෙවිඳු වේවැල්වලගේ නායකත්වයෙන් තරග වදින කොළඹ දකුණ කණ්ඩායම සහභාගි වූ තරග දෙකම ජය ගනිමින් ප්‍රසාද ලකුණු 5ක් සමඟ පළමු ස්ථානයට පත්ව ඇති අතර, කිංස්වුඩ් විදුහලේ කෙනුල පිහිලිඅංග මෙහෙයවන මහනුවර කණ්ඩායම (3) දෙවැනි ස්ථානයට පත්ව ඇත්තේ සහභාගි වූ එකම තරගය ජය ගනිමිනි. තරග දෙකකින් එකක් ජය ගත් අම්බලන්ගොඩ ශ්‍රී දේවානන්ද විදුහලේ තෙනුජ රශ්මින් නායකත්වය දෙන ගාල්ල (3) තෙවැනි ස්ථානයට පත්වෙද්දී, වෙස්ලි විදුහලේ ලිතුම් සෙනුජ මෙහෙයවන කොළඹ උතුරට පරාජයක් සහ කුරුණෑගල මලියදේව විදුහලේ දම්ලත් ගමගේගේ නායකත්වයෙන් තරග වදින දඹුල්ලට පරාජයන් දෙකක් හිමිව තිබේ.
අනාගත ක්‍රිකට් තරු සෙවීමේ ජාතික අරමුණෙන් සංවිධාන කරන මේ තරගාවලිය 2007 වසරේ සිට ප්‍රීමා අනුග්‍රහයෙන් පැවැත්වෙන අතර, මේ තුළින් දිස්ත්‍රික් හා පළාත් මට්ටමේ දක්ෂ ක්‍රීඩකයන් මුල් අවධියේදීම හඳුනාගෙන ඔවුන් ක්‍රමවත් පුහුණුවක් තුළින් ජාතික කණ්ඩායම දක්වා රැගෙන යෑම මේ තරගාවලියෙන් සිදු වේ.
මේ තරගාවලියේ තෙවැනි දිනය වන අද (24) දඹුල්ල සහ කොළඹ දකුණ වෙළෙඳසේවා ක්‍රීඩාංගණයේදීත්, මහනුවර සහ කොළඹ උතුර කණ්ඩායම් කොළඹ රාජකීය විදුහල් ක්‍රීඩාංගණයේදීත් තරග වැදීමට නියමිතය.
මූලික වටයේ අවසානයේ ප්‍රසාද ලකුණු සටහනේ පෙරමුණ ගන්නා කණ්ඩායම් දෙක මේ 29 වැනිදා වෙළෙඳ සේවා ක්‍රීඩාංගණයේදී ප්‍රීමා කුසලානය වෙනුවෙන් පැවැත්වෙන අවසන් මහා තරගයට එක් වෙයි.
