කුල්ලෙන්, පොල්ලෙන්, වතුර බවුසරෙන් උත්තර දෙන ක්‍රමය ඇති නොවුණා නම් කැලෑ නීතිය අද රට තුළ රජ කරන බව ශ්‍රී ලංකා පොදුජන පෙරමුණේ කළුතර දිස්ත්‍රික් මන්ත්‍රී රෝහිත අබේගුණවර්ධන මහතා පාර්ලිමේන්තුවේ දී ඊයේ (23) පැවසීය.
ආරක්ෂක සහ මහජන ආරක්ෂක අමාත්‍යාංශවල වැය ශීර්ෂ පිළිබඳ අය වැය කාරක සභා අවස්ථාවේ විවාදයට එක්වෙමින් මන්ත්‍රීවරයා මේ බව කියා සිටියේය.
මන්ත්‍රීවරයා මෙසේද පැවසුවේය.
රටේ කැලෑ නීතිය හෙවත් ත්‍රස්තවාදය ඉවත් කිරීමට පියවර ගත් ජනාධිපති රනිල් වික්‍රමසිංහ මහතාට ස්තුතිවන්ත විය යුතුයි. ගෝඨාභය රාජපක්ෂ මහතාගේ නිවෙසට අරගලකරුවන් පැමිණි අවස්ථාවේදී එම ක්‍රමය ක්‍රියාත්මක වූයේ නම් අදටත් ඔහු ජනාධිපතිවරයාව සිටිනවා.
හොඳ නායකත්වයක් තිබූ නිසා එදා ත්‍රස්තවාදය අවසන් කරන්න හැකි වුණා. හිටපු යුද හමුදාපතිවරයා මෙතැන සිටිනවා. දේශපාලන ලෙස කුමන මතවාදයක් දැරුවත් එතුමාගේ සේවාව අපි අගය කරනවා. ආණ්ඩු වෙනස් කරන්න ඕනෑ කෙනෙකුට පුළුවන්. ජනතාවට ඒ බලය තිබෙනවා. පුද්ගලයන් පත් කිරීමේ, ඉවත් කිරීමේ වගකීම ජනතාවට තිබෙනවා. අරගලය අවස්ථාවේ සිදුවීම් දහදාහක් විතර තියෙනවා.
