තත්පරයක් දෙන්න හෙට (25) සිට අයි. ටී. එන් නාලිකාව ඔස්සේ සති අන්තයේදී විකාශනය වේ. ජනප්‍රිය ටෙලි නාට්‍ය නිර්මාණය කළ සුපුන් රත්නායක මෙහි අධ්‍යක්ෂවරයායි. ඔහු සමඟ කළ කෙටි පිළිසඳරකි මේ.
මේ නිර්මාණයට ඔබ ගත් වෑයම ගැන කතා කරමු?
මේ අහම්බකාරකයක් නෙවෙයි. පිටපත ලිව්වේ රසික සුරවීර ආරච්චි. නිෂ්පාදනය වගේම නිෂ්පාදන සැලසුම්කරණය කළේ රුවන් චින්තක රණවීර. අපි කාලෙක පටන් යාළුවෝ. එකට එකම වැඩක් කරන්න අපිට කාලෙක සිටම ඕනකම තිබුණා. රසික ඒ කාලේ ඉඳන්මයි මේ වැඩේ ගැන කිය කියා හිටියේ. බොරළු පාර, ඇබෑර්තු ඇත ටෙලි නාට්‍ය පිටපත් ඔහුගේ. ඒත්, ආර්ථික, සමාජයීය කාරණා නිසා වැඩේ පස්සට ගියා. වසංගත තත්ත්වයත් ඊට බලපෑවා. අන්තිමේදී අපි ඉටා ගත්තා තවත් පමා නොකර මේ වැඩේ කරන්න. ගිය අවුරුද්දේ තත්පරයක් දෙන්න, එළියට ආවේ එහෙමයි. ඒත්, මේකට ලොකු වියදමක් ගියා. ඒ නිසා සාධාරණ මිලක් ගෙවන නාළිකාවක් හෙව්වා. හෙට අයි. ටී. එන් හරහා අපි එන්නේ එහෙම දීර්ඝ කතාබස් ගණනාවකට පස්සේ.
මෙහි කතා වස්තුව දිව යන්නේ කුමන විෂයයක් වටාද?
මේ අත්දැකීම මට නැහැ. කාන්තා බන්ධනාගාරයක් තුළ සිදුවීම් පෙළක් වටා මේ කතාව දිවෙන්නේ. ඒත්, මේ පිටුපස කතා පෙළක් තියෙනවා. ඇතුළට යන කෙනා නෙවෙයිනේ හුඟක් දුරට එළියට එන්නේ. ඊට සමාජයීය කරුණු බලපානවා. ඒ වගේම, මේ අයගේ මානසික තත්ත්වය කොහොම ඇතිද කියලා එබී බැලීමකුත් මේ තුළ ඇති. එතැනින් නිම නෑ. බන්ධනාගාරගත වන කෙනකුගේ පවුලේ අය, මුහුණ දෙන තත්ත්වය ගැනත් මේ කතාවෙන් අවධානය යොමු වී ඇති බවයි මගේ හැඟීම.
“එයා දැන් බැදලා” හරහා ප්‍රකට වූ සේමිනි ඉද්දමල්ගොඩ යොදා ගැනීමෙන් විශේෂ ආකර්ෂණයක් බලාපොරොත්තු වෙනවාද?
එයා දැන් බැදලා කියන්නේ මෑතකාලීන ටෙලි අතර සීල් එකක්. ඒ ගැනවත් එහි අධ්‍යක්ෂ ප්‍රසන්න ජයකොඩි ගැනවත් අමුතුවෙන් කිව යුතු නෑ. ඒ තරමට විශිෂ්ටයි. හැබැයි මේ ටෙලියේ එන ප්‍රධාන ජේලර් බ්‍රිජට්ගේ චරිතයට සේමිණි ගත්තේ ජනප්‍රියත්වය තකාම නෙවෙයි. ඒ චරිතය ඉල්ලා සිටි දේ ඈ තුළ වූ නිසයි. අනෙක එයා දැන් බැඳලා කරන්න කලින් තමයි මෙය රූ ගැන්වුණේ. ඉතින් එහෙම සම්බන්ධයක් නෑ. සේමිණිත් මේ චරිතයේ වගකීම සතුටින් භාර ගත්තා.
හැමදාම වැඩ කරන කාස්ට් එකෙන් ඔබ්බට කළ වෙනස ගැනත් කියමුද?
මෙහෙමයි, ඕනෑම නිර්මාණකරුවකුගෙන් ඒ ලක්ෂණය දකින්න පුළුවන්. ඊට උදාහරණ ඕනෑ තරම් තියෙනවා. ඒත්, ඔය චෝදනාව කරන අයම හාත්පස වෙනස් පිරිසක් දාලා වැඩක් කළොත්, ඒ ඒ කෙනා ඒ ඒ චරිතයට සාධාරණයක් කළේ නෑ කියලා දොස් කියන්නත් පුළුවන්. ඉතින් සම්මානනීය වූ රන්දික ගුණතිලක, ගීත් රත්නායක ඊට නිදසුන් බවත් මට හිතෙනවා.
අඩෝ, ආදී ඔබ පැමිණි මඟ දිහා හැරී බලද්දී එදා හා අද අතර වෙනසක් දැනෙනවාද?
ඒ එදා මං අඩෝ දුටු විදිය. ඒත්, අද මට ඊට වඩා අත්දැකීම් ඇති කෙනෙක් විදියට කියන්න වෙන්නේ අද මං අඩෝ කළා නම්, කරන්නේ එදාට වඩා වෙනස් විදියකට කියලායි. අඩෝ ටෙලියෙන් කතාබහකට ලක් වුණත් මං ඊට මගේ ආදර අවනඩුව, ලොක් ඩවුන් ස්ටෝරි, ඇට්ටරයා, තුම්පනේ, මෙට්‍රෝ හීන, ෆෝචූන් රෙසිඩන්සි ආදී ටෙලි නිර්මාණ කළා.
සිනමාවෙනුත් ඔබගේ නිර්මාණ දකින්න ප්‍රේක්ෂකයා කැමැති ඇති. ඒ ගැනත් කතා කරමුද?
ප්‍රේක්ෂකයා ඊට කැමැති ඇති. එතැනට යන පාරක යමින් ඉන්නේ කියලා දැනෙනවා. ඉකුත් කාලයේ මං ඒ හීනයත් හැබෑ කර ගන්න සැලසුම් හැදුවා. ඒක ලබන අවුරුද්ද තුළ යථාර්ථවාදී තැනකට ගෙනියන්න පුළුවන් වෙයි කියා හිතනවා.
තත්පරයක් දෙන්න ටෙලියේ රංගන ශිල්පීන්, ගැනත් කිව්වොත්?
ශ්‍යාම් ප්‍රනාන්දු, තරින්දි ප්‍රනාන්දු, ශලනි තාරකා, රොජර් සෙනෙවිරත්න, සේමිණි ඉද්දමල්ගොඩ, මාදනී මල්වත්ත, වොල්ගා කල්පනී, කුසුම් පෙරේරා, රෙබෙකා දිල්රුක්ෂි, හේෂාන් මනුල, පූජන දන්දෙනිය, සංජීව දිසානායක, සම්පත් දඩල්ලගේ, දිනූෂි දිසානායක, සමන්ත පරණලියන, සමන්ත කුමාර ලියනගේ, ඇන්ටන් කුරේ, දුමී වන්නි ආරච්චි ආදී ප්‍රවීණ හා දක්ෂ පිරිසක් වෙනවා.
