ආනන්දනීය සිංහල සිනමා සංසදය 49 වන සුහද හමුව ජාතික මානසික සෞඛ්‍ය විද්‍යායතනයේදී පසුගියදා පැවැත්විණි. එදින නේවාසික සහෘදයන් සහෘදණියන් වෙනුවෙන් කිතිසිරි හේවාගමගේ මහතා නිෂ්පාදනය කළ බණ්ඩාර කැලේගම මහතා අධ්‍යක්ෂණය කළ නෙයිනගේ සූදුව වේදිකා නාට්‍ය නොමිලයේ වේදිකාගත කරන ලදී. ජාතික මානසික සෞඛ්‍ය විද්‍යායතනයේ කාර්ය මණ්ඩලය සමඟ ආනන්දනීය හිතවතුන් හිතවතියන් රැසක්ද මීට සහභාගි වුහ. නාට්‍ය වේදිකාගත කිරිමෙන් පසු බණ්ඩාර කැලේගම, කිත්සිරි හේවාගම සහ රංගන ශිල්පී සරත් දික්කුඹුර ඇගයීමට ලක් විය.
හෙළ සිනමාවේ රෝමියෝ කෘතිය එළිදකී
ශ්‍රී ලාංකේය ශ්‍රව්‍ය දෘශ්‍ය කලාව උදෙසා කළ මෙ‍ෙහවර හා අද්විතීය ප්‍රතිභාව හා ප්‍රකට කළ මානව ගුණ සපිරි ප්‍රභාශ්වර පෞරුෂය විවරණය කරන “හෙළ සිනමාවේ රෝමියෝ ඩග්ලස් රණසිංහ” යන මැයෙන් සරච්චන්ද්‍ර මුතු බණ්ඩා විසින් රචිත කෘතිය පසුගිය දින ජනගත කෙරිණි. ඒ බණ්ඩාරනායක අන්තර්ජාතික සම්මන්ත්‍රණ ශාලාවේ ලෝටස් ශ්‍රවණාගාරයේදීය.
අමෙරිකාවෙන් ඇසුණු බෙරහඬ
බන්දුල ජයවර්ධනගේ බෙරහඬ වේදිකා නාට්‍යය පසුගියදා බිංග්හැම්ටන් සරසවියේදී වේදිකාගත කෙරිණි. එම සරසවියේ නාට්‍ය අධ්‍යන අංශයේ සේවය කරන මහාචාර්ය ලක්ෂ්මි දමයන්තිගේ අධ්‍යක්ෂණයෙන්, සුදු ජාතික නළු නිළියන්ගේ දායකත්වයෙන් මෙම නාට්‍ය වේදිකාගත කෙරුණි. ලක්ෂ්මි දමයන්ති, දයානන්ද ගුණවර්ධනගේ නරිබෑණා නාට්‍යයේ ගමදුවගේ චරිතය ඉදිරිපත් කරමින් මෙරට කලා ක්ෂේත්‍රයේ දස්කම් දැක්වූ නිළියකි. බෙරහඬ සිංහල පිටපත ඉංග්‍රීසියට පරිවර්තනය කරන ලද්දේ එම සරසවියේ ආචාර්ය උපාධි පර්යේෂණ කටයුතුවල යෙදෙන සුලා මහගම ආරච්චි විසිනි. පසුගිය නොවැම්බර් 16 වැනිදා එම විශ්වවිද්‍යාලයේදී බෙරහඬ ඉංග්‍රීසි නිෂ්පාදනය එළි දැක්විණි.
කතුරු මිතුරු දින 50 පසු කරයි
ගිරිරාජ් කෞෂල්‍ය අධ්‍යක්ෂණය කළ “කතුරු මිතුරු” ආලංකුලම ෆිල්ම් වෙනුවෙන් බාසුරු සිරිවර්ධනගේ නිෂ්පාදනයකි. එය මේ දිනවල දිවයින පුරා සියලුම සිනමා ශාලාවල ප්‍රදර්ශනය වේ. දින 50 පසු කරන විට ලක්ෂ 2,000 ක ආදායම ඉක්මවා ඇත. ප්‍රහසන කලාවට නව අරුතක් ගෙන එමින් ජයලත් මනෝරත්නයන් රංගනයෙන් දායක වූ අවසාන සිනමාපට අතරට “කතුරු මිතුරු” ද එක් වේ. මහේන්ද්‍ර පෙරේරා, රොඩ්නි වර්ණකුල, ප්‍රියන්ත සෙනවිරත්න, සම්පත් ජයවිර, ජයනී සේනානායක, මොරින් චාරුනි, ගිහාන් ප්‍රනාන්දු, වසන්ත විට්ටච්චි, දයා වයමන්, සහන් රන්වල , ඇතුළු නළු නිළියන් රැසක් රංගනයෙන් එක් වෙති.
ඇහැළියගොඩ ගී තරුව දිනේෂ්
දිනේෂ් සෙනෙවිරත්න, ඇහැළියගොඩ, පනාවල වෙසෙන දක්ෂ ගායකයෙකි. ඔහු ගායකයෙක් පමණක් නොව, දක්ෂ බේස් ගිටාර් වාදන ශිල්පියෙක්ද වෙයි. රත්නපුර ඇහැළියගොඩ මධ්‍ය මහා විද්‍යාලයෙන් සිප් සතර හැදෑරු දිනේෂ් පාසල් කාලයේ සිටම සංගීත කලාවට යොමුව ඇති අතර වයස අවුරුදු 15දී ඇහැළියගොඩ ශේනායි සංගීත කණ්ඩායමේ බේස් ගිටාර් වාදකයෙක් ලෙස කටයුතු කර තිබීම විශේෂත්වයකි. දිනේෂ් මේ වන විට ඔය කඳුළු අරන් යන්නම්, අතීතයේ පෙම් පුරාවතක කිඳුරි, සරාගී පැතුම් මල් පිපීලා, නිල් දෑස ඔබගේ, සුරංගනා ලොවෙන් මිදී නමින් තම හඩින් ගී 5ක් සංගීත ලෝකයට දායාද කර ඇත.
ඔහු මේ වන විට ඇහැළියගොඩ සහ ඒ ආසන්න ප්‍රදේශයන්හි ප්‍රසංග වේදිකාවන්හි ජන හද දිනූ සංගීත තරුවකි.
ශර්මිලා කුරුප්පුගේ
ඔස්කා නව සභාපති කීර්ති පැස්කුවල්ට
ගීත නිර්මාණක කේන්ද්‍රයේ (Outstanding Song Creators Association -OSCA) නව සභාපතිවරයා ලෙස ප්‍රවීණ සංගීතවේදී කීර්ති පැස්කුවල් මහතා පසුගියදා පැවැති මහ සභා රැස්වීමේදී ඒකමතිකව තේරි පත්විය. 2002 වසරේ ආරම්භක සභාපතිවරයා ලෙස වසර 21ක් පුරාවට කටයුතු මෙහෙයවන ලද්දේ එහි නිර්මාතෘ ජයන්ත ධර්මදාස මහතාය. සංගීත ක්ෂේත්‍රයේ නියැළී සිටින ගායක ගායිකාවන්, වාද්‍ය ශිල්පීන් සහ සංගීත කන්ඩායම් වලින් ගීත නිර්මාණක කේන්ද්‍රය සමන්විත වෙයි. ඒ අනුව 2023/2024 ප්‍රවර්තන වර්ෂය තුළ අධ්‍යක්ෂ මණ්ඩලය ලෙස, කීර්ති පැස්කුවල් (සභාපති )ලෙස තේරි පත්ව ඇත.
සිග්නිස් සම්මාන උලෙළ අනිද්දා
සිග්නිස් (SIGNIS) අන්තර්ජාතික සංවිධානයට අයත් සිග්නිස් (SIGNIS) ශ්‍රී ලංකා ආයතනය මඟින් 43 වැනි වරටත් පවත්වනු ලබන ‘සිග්නිස් උත්තමාචාර සිනමා හා ප්‍රාසාංගික ටෙලි නාට්‍ය සම්මාන උලෙළ’ කොළඹ අගරදගුරු අති උතුම් මැල්කම් කාදිනල් රංජිත් හිමිපාණන් සහ රදගුරු සමුළුවේ සභාපති අති උතුම් හැරල්ඩ් ඇන්තනී හිමිපාණන්ගේ ප්‍රධානත්වයෙන් රදගුරු සමුළුවේ සියලු සාමාජික රදගුරුතුමන්ලාගේ සහ කලාකරුවන් රැසකගේ සහභාගීත්වයෙන් අනිද්දා (26) හවස 5.30ට කොළඹ බණ්ඩාරනායක සම්මන්ත්‍රණ ශාලාවේදී පැවැත්වේ.
වසර 1973 වසරේදී ආරම්භ වූ මෙම සම්මාන උලෙළට මේ වසරේදී අඩ සියවසක් සැපිරේ. ආරම්භයේදී ‘OCIC සිනමා උත්තමාචාරය’ නමින් හැඳින්වූ මෙම සම්මාන උලෙළ ආරම්භ කිරීමට පුරෝගාමී වූයේ ශ්‍රී ලාංකේය සිනමාවට මෙන්ම කතෝලික ජනසන්නිවේදන ක්ෂේත්‍රයේ උන්නතිය වෙනුවෙන් මහඟු මෙහෙවරක් කළ ඉටු කළ ස්වර්ගස්ථ ගරු අර්නස්ට් පෝරුතොට පියතුමාය. මෙම වසරේදී එම සම්මාන උලෙළේ 50 වැනි සංවත්සරය සැමරෙන අතර, මෙවර සම්මාන උලෙළේදී 2021, 2022 වර්ෂවල ප්‍රදර්ශනය කළ චිත්‍රපට සහ විකාශනය වූ ටෙලිනාට්‍ය වෙනුවෙන් ක්ෂේත්‍ර 16ක් යටතේ සම්මාන 80ක් පිරිනැමේ.
හාල් මිටකට අම්මේ උඹ මොනවද වික්කේ
පසුගිය සතියේ මුහුණු පොතේ සහ youtube නාළිකාවල ඉහළම ප්‍රතිචාර ලද ගීතය ලෙස සටහන් වූයේ කසුන් මංගල ඕපාත පද රචනා කොට ගායනා කරන “හාල් මීටකට අම්මේ උඹ මොනවද වික්කේ” ගීතයයි. ශකිල දිල්ශාන් සංගීතවයෙන් අසංක වටවල රූප රචනයෙන්, සහ සංස්කරණය සහ වර්ණ සංයෝජන‍ෙයන් චමින්ද සමරනායක එක්විය. මෙම ගීතය මුහුණු පොතේ ප්‍රේක්ෂක ප්‍රතිචාර මිලියන 5 ඉක්මවූ අතර යූටියුබ් නාළිකාවල මිලියන 3,20 ඉක්මවා ඉහළම ප්‍රතිචාර ලබා ගැනීමට හැකිවිය. පාසැල් යන වියේ දී හදිසි අනතුරකට ලක්වී පාදයක් අහිමි වූ කසුන් මංගල අද තරුණ ගායන පරපුරේ සිටින දක්ෂ ගායන ශිල්පියෙක් හා පද රචකයෙක් මෙන්ම වාදන ශිල්පියෙක් ද වේ.
අනුරට කලා භූෂණ සම්මානයක්
ගොරොක්ගහකොටුව, වල්පිට පදිංචි, එස්. ඩබ්. එම්. අනුර විජේසිංහ මහතාට 2022 වසරේ කලා භූෂණ රාජ්‍ය සම්මාන ගෞරව සම්මානය ප්‍රදානය කරන ලදි. රූපවාහිනි සහ වේදිකා නාට්‍ය ශිල්පියකු ලෙස ක්ෂේත්‍රයේ දස්කම් රැසක් දක්වා ඇති ඔහු වසර ගණනාවක් කලා ක්ෂේත්‍රයේ කටයුතු කර තිබේ.
ප්‍රසන්න විතානගේට අන්තර්ජාතික සම්මානයක්
සම්මානනීය ශ්‍රී ලාංකික සිනමාකරුවෙකු වන ප්‍රසන්න විතානගේ මලයාලම් බසින් නිර්මාණය කළ “පැරඩයිස්” චිත්‍රපටිය පසුගිය බූසාන් සිනමා උලෙළේ හොඳම චිත්‍රපටයට හිමි සම්මානය දිනාගනු ලැබීය. ළඟදීම හින්දි, දෙමළ, සිංහල බසින් තිරගත වීමට නියමිත මෙම සිනමාපටයේ රෝහාන් මැතිව්, දර්ශන රාජේන්ද්‍රන් සමඟ මහෙන්ද්‍ර පෙරේරා, ශ්‍යාම් ප්‍රනාන්දු රඟපාති. මැඩ්රාස් ටෝකිස් හානිව්ටොන් මූවිස් නිෂ්පාදනයකි. පැරඩයිස් චිත්‍රපටිය කැමරාව රජිව් රවිගේය. සංස්කරණය ශ්‍රිකර් ප්‍රසාද්ය. ක්‍රිෂ්ණ කුමාර්ගේ සංගීත අධ්‍යක්ෂණය කළ මෙහි ශබ්ද පරිපාලනය ත්‍යත්නායක් ගෙනි.
ස්වර
ඒඩ්ස් පිළිබඳව සිනමාත්මක කතිකාවක් ගොඩනඟමින් සංජය නිර්මාල් තිර රචනය කර අධ්‍යක්ෂණය කළ නීටා ප්‍රනාන්දු, මනෝහාන් නානායක්කාර නිෂ්පාදනය කළ “ස්වර” සිනමාපටය පසුගිය දින මාධ්‍ය දර්ශනය කොළඹ city center scope සිනමා ශාලාවේ දී පැවැත්විණි. මෙය එළඹෙන 01 වැනිදා සිට සෞඛ්‍ය අමාත්‍යාංශයේ ජාතික ලිංගාශ්‍රිත හා ඒඩ්ස් මර්දන වැඩසටහන, ශ්‍රී ලංකා පවුල් සංවිධාන සංගමය අත්වැල් බැඳගනිමින් මෙරට සිනමා ශාලාවල ප්‍රදර්ශනය ඇරඹෙනු ඇත. නීටා ප්‍රනාන්දු, ඩබ්. ජයසිරි, දමිතා අබේරත්න, අනූෂා රාජපක්ෂ, සචිනි අයේන්ද්‍ර, ධනූ ඉන්නසිත්තම්බි, ජීවන් කුමාරතුංග, දිලුනි මල්ලවආරච්චි, වීණා ජයකොඩි, ක්ලීටස් මෙන්ඩිස්, ශ්‍රියන්ත මෙන්ඩිස්, නිලන්ති විජේසිංහ, බුද්ධික ජයරත්න, අසේල ජයකොඩි, සරත් කොතලාවල, සංජීව දිසානායක, නිරෝෂන් ඉලේපෙරුම, ජානකී විජේරත්න, සංජීවනී වීරසිංහ, කුලිත රවිඳු පෙරේරා යන රංගන ශිල්පීන් රංගනයෙන් එක්වෙති. “ස්වර” ඒෂියා ඩිජිටල් එන්ටටේන්ට්මන්ට් ඉදිරිපත් කිරිමකි.
ලක්හඬ සංවත්සරයට
ලක්හඬ ගුවන්විදුලියේ විසිහත් වන සංවත්සරය නිමිත්තෙන් ගෝල්ඩන් මෙමරීස් සංගීත ප්‍රසංගය දෙසැම්බර් 03 වන ඉරිදා සවස 6.30ට පිළියන්දල මධ්‍ය විදුහල් ශ්‍රවණාගාරයේදී පැවැත්වේ. රාජ්‍ය සංගීත කණ්ඩායමේ සංගීතයෙන් හැඩවෙන මෙම ප්‍රසංගය සඳහා සංගීත ක්ෂේත්‍රයේ ප්‍රවීණයන් වන බන්දුල විජේවීර, නිමල් ගුණසේකර, චන්ද්‍රකුමාර කඳන ආරච්චි, ලලිත් පොන්නම්පෙරුම, දයාරත්න පෙරේරා, පුණ්‍යා කත්‍රිආරච්චි, රෝහණ සිරිවර්ධන, ත්‍යාගා එන්. එඩ්වඩ්, රෝහණ බෝගොඩ, නිර්මලා රණතුංග ඇතුළු ශිල්පීන් සහභාගී වන අතර මෙම ප්‍රසංගය මෙහෙයවනු ලබන්නේ ලක්හඬ ගුවන්විදුලියේ ප්‍රවීණ නිවේදක ඉන්ද්‍රසිරි සුරවීර විසිනි.
මිනුසර මියැසිය
ප්‍රාදේශීය ලේකම් තනුජා රාජකරුණා මහත්මියගේ සංකල්පයක් අනුව මිනුවන්ගොඩ ප්‍රාදේශීය ලේකම් කාර්යාලයයේ සුබ සාධක සංගමයට ආධාර පිණිස පවත්වනු ලබන “මිනුසර මියැසිය “එළඹෙන 25වැනි දා සවස නයිවල ජයසිංහ ශ්‍රවණාගාරයේ දී පවත්වනු ලැබේ. මාරිම්බා සංගීත කණ්ඩායමේ චන්දික පෙරේරාගෙනි. ප්‍රසංගය වර්ණවත් කිරීම සඳහා මිනුවන්ගොඩ කොට්ඨාසයේ කලායතන කිහිපයක් සම්බන්ධ වන අතර මිනුවන්ගොඩ ප්‍රාදේශීය ලේකම් කාර්යාලයේ කාර්ය මණ්ඩලය මෙහි ගායනයෙන් හා නර්තනයෙන් එක්වෙති.
රඟපාන්න එන්න
ගුණපාල කරුණාපතිරණ, නිෂ්පාදනය කර අධ්‍යක්ෂණය කරන “දොන්ත බබක්කා හා සේතං” නවතම වේදිකා නාට්‍ය සඳහා නවක රංගන ශිල්පීන් හා ශිල්පිනියන්ට අවස්ථාවක් උදා වී ඇත. රඟපෑමට හැකියාවක් ඇති සියලුම දෙනාට 0716034934 දුරකතනය ඔස්සේ ඔහුව සම්බන්ධ කරගෙන වේදිකා නාට්‍යයට සම්බන්ධ විය හැකිය.
ඉල්ලන් කෑවා
සුනිල් ශ්‍රී විසින් රචනා කොට නිර්මාණය කළ විසි වැනි වේදිකා නාට්‍ය “ඉල්ලන් කෑවා” 50 වැනි දර්ශනය වෙනුවෙන් විශේෂ දර්ශනයක් පසුගිය දා බොරැල්ල නාමෙල් මාලනී පුංචි තියටර්හිදී වේදිකාගත කෙරිණි. රජිත හිරාන්, ශිරෝමිකා ප්‍රනාන්දු, නන්දන හෙට්ටිආරච්චි, සංජානා පීරිස්, රොමේෂ් සංජේ, ධනුක සිල්වා, අවින්ද්‍යා බණ්ඩාර, රංග සම්පත්, හංසි අමයන්ගොඩ, චමිල සම්පත් සමඟ සුනිල් ශ්‍රී රංගනයෙන් එක්වෙති. අංග රචනය ගාමිණී කොස්තා, සංගීතය උදාර ප්‍රනාන්දුගෙනි. මෙදින දර්ශන වාර 50කට උරදුන් සියලු කලා ශිල්පීන් ඇගැයීම ද එදින සිදු කෙරිණි.
