ලේක්හවුස් මාධ්‍ය පාඨමාලා සඳහා NVQ මට්ටම ගැනීමට පියවර ගනිමින් තිබෙනවා
– ලේක්හවුස් සභාපති මහාචාර්ය හරේන්ද්‍ර කාරියවසම්
ප්‍රෞඪ උරුමයකට හිමිකම් කියන ලේක්හවුස් ආයතනය ආරම්භ කළ මාධ්‍ය ඇකඩමිය මඟින් සාම්ප්‍රදායික මාධ්‍යකරණයට එහා ගිය ප්‍රබුද්ධ මාධ්‍යකරුවන් පිරිසක් අනාගතයට හා රටට දායාද කරන බව ප්‍රවාහන, මහාමාර්ග හා ජනමාධ්‍ය ඇමැති, ආචාර්ය බන්දුල ගුණවර්ධන මහතා ප්‍රකාශ කරයි. ඇමැතිවරයා මේ බව සඳහන් කළේ කොළඹ, බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේදී ඊයේ (23) පස්වරුවේ පැවති ලේක්හවුස් ආයතනය ආරම්භ කළ මාධ්‍ය ඇකඩමියේ ඩිප්ලෝමා ප්‍රදානෝත්සවයට එක් වෙමිනි.
මාධ්‍ය ක්ෂේත්‍රයේ කටයුතු කිරීම සඳහා අවැසි දැනුමැති සහ වගකීම් සහගත නිර්මාණශීලි මාධ්‍ය පරපුරක් බිහි කිරීමේ පරමාර්ථයෙන් ලංකාවේ සීමාසහිත එක්සත් ප්‍රවෘත්ති පත්‍ර සමාගම විසින් ආරම්භ කරන ලද ලේක්හවුස් මාධ්‍ය ඇකඩමිය විසින් සංවිධානය කරන ලද මාධ්‍ය සන්නිවේදන ඩිප්ලෝමා පාඨමාලාව හා ඩිජිටල් මාධ්‍ය සන්නිවේදන ඩිප්ලෝමා පාඨමාලාව සාර්ථව අවසන් කළ ශිෂ්‍ය ශිෂ්‍යාවන් 26 දෙනකු වෙනුවෙන් ඩිප්ලෝමා ප්‍රදානය මෙහිදී සිදු විණි. මාධ්‍ය සන්නිවේදන ඩිප්ලෝමාව හැදෑරූ සිසු සිසුවියෝ 10 දෙනෙක් සහ ඩිජිටල් මාධ්‍ය සන්නිවේදන පාඨමාලාව හැදෑරූ සිසු සිසුවියෝ 16 දෙනෙක් ඊට අයත් වූහ.
එහිදී වැඩිදුරටත් අදහස් පළ කළ ඇමැති, ආචාර්ය බන්දුල ගුණවර්ධන මහතා:
“අපේ රට තුළ යම් යම් අවස්ථාවල සිදු වූ තත්ත්වයන් හමුවේ ඉදිරියට ගමන් කිරීමේදී මඟ පෙන්වූ ආයතනයක් ලෙස ලේක්හවුස් ආයතනය හදුන්වන්න පුළුවන්. නිදහස ලැබීමටත් පෙර සිට නිදහස දිනාගැනීම සඳහා වන අරගලයටත්, නිදහසින් පසුත් ශ්‍රී ලංකාවේ සමාජ, ආර්ථික, දේශපාලන හා සමාජ සංස්කෘතික හැඩගැස්ම සඳහා ජනමතය වෙනස් කළ සහ ඒ වෙනුවෙන් අවශ්‍ය පසුතලය නිර්මාණය කළ ආයතනය ලේක්හවුසියයි. ඓතිහාසික ප්‍රෞඪ උරුමයට හිමිකම් කීමට හැකි වෙනත් කිසිදු ආයතනයක් ශ්‍රී ලංකාවේ නැහැ. ඒ නිසා එම ආයතනයේ ගුණය අනාගත පරම්පරාවට බෙදාහැරීම සඳහා මේ ආයතනය විසින් පසුගිය වසරේදී ලේක්හවුස් මාධ්‍ය ඇකඩමිය ආරම්භ කළා.
“එය ආරම්භ කළ අවස්ථාවේ අප බලාපොරොත්තු වුණේ සාම්ප්‍රදායික මාධ්‍යකරුවන් පිරිසකට වඩා හිතෙනවාට වඩා වැඩිපුර යමක් සිතිය හැකි, පෙනෙනවාට වඩා වැඩි යමක් දැකිය හැකි, ඇසෙනවාට වඩා වැඩිපුර යමක් අසන්න පුළුවන් ප්‍රබුද්ධ මාධ්‍යකරුවන් පිරිසක් අනාගයට, රටට දායාද කරන්නයි. අප්‍රබුද්ධ මාධ්‍යයක් පවතින විට එය ප්‍රබුද්ධ මාධ්‍යයක් බවට පරිවර්තනය කරගැනීම සඳහා, අසංස්කෘතික මාධ්‍යක් පවතින විට සංස්කෘතික මාධ්‍යයක් බවට පරිවර්තනය කරගැනීම සඳහා, අවිචාරවත් මාධ්‍යයක් පවතින විට විචාරවත් මාධ්‍යයක් බවට පරිවර්තනය කරගැනීම සඳහා, නොහොබිනා මාධ්‍යයක් පවතින විට ඔබින මාධ්‍යයක් බවට පරිවර්තනය කරගැනීම සඳහා මාධ්‍ය භාවිතය සිදු කරන්නේ කෙසේද යන්න පිළිබඳ ඉගැන්වීමත් ඇකඩමිය තුළ ඩිප්ලෝමාවක් ලෙස කරන්නට ඇතැයි සිතනවා.
“අතීතයේ ලේක්හවුස් ආයතනයේ යුග මෙහෙරවක නිරත වූ දැවැන්ත මාධ්‍යවේදීන්ගේ උරුමය හා ජීව ගුණය මේ අය වෙනුවෙන් කාන්දු කරන්න ආචාර්ය මණ්ඩලය කටයුතු කරන්න ඇතැයි සිතනවා. හෙළයේ මහා ප්‍රාඥයා මාර්ටින් වික්‍රමසිංහ මහතා ලේක්හවුස් සිංහල මාධ්‍යවල කර්තෘ මණ්ඩලයේ මුල් පුටුව හෙබවූවා. එනිසා එවන් යුග පුරුෂයන් රාශියක් විසින් සකස්කර දෙනු ලැබූ සම්මතයන්, පිරිවිතරයන් සහ ඒවායේ ගුණාත්මක හා ප්‍රමාණාත්ම ව්‍යූහාත්මක වෙනස්කම් පිළිබඳ මැනවින් හැදෑරීමක් කරන්න අවස්ථාව ලැබෙන්න ඇති. අප අද්‍යතන ශ්‍රී ලංකාවේ මාධ්‍ය භාවිතය තුළ සත් සමාජයක් ඇති කරනවාට වඩා පුද්ගලානුබද්ධ හා දේශපාලනයට අනුබද්ධ වෛරය සමාජයේ විවිධ පාර්ශ්ව වෙත ඇති කරලා නිරායුධ අහිංසක මිනිසුන් හිටපු රටක, පන්සිල් රැක්ක මිනිසුන් හිටපු රටක සංස්කෘතික අපගමනයත් සදාචාරාත්මක පිරිහීමක් හා මනුස්සකමේ දරුණු නායයෑමක් ඇති කරන්න අදාළ වන ලෙස මාධ්‍ය හැසිරීමකුත් අප දකිනවා. ඒ නිසා අද යුගයට ඉතා විශාල වශයෙන් නීරස වුණත් සත්‍යය වඩාත් ප්‍රබුද්ධ ලෙස ඇති කරගැනීමට ලේක් හවුස් මාධ්‍ය ඇකඩමිය අනෙකුත් ආයතනවලටත් ආදර්ශයක් වන ලෙස අලුත් ප්‍රබුද්ධ සංවාද මණ්ඩපයක්ද මේ විෂයයානුබද්ධ කරුණු ඉගැන්වීමට අතිරේකව ලේක්හවුස් මාධ්‍ය ඇකඩමිය කළ හැකි යැයි මම විශ්වාස කරනවා. ඒ නිසා මාධ්‍ය ඉගෙනීමට පැමිණෙන විද්‍යාර්ථීන්ට මාධ්‍ය ඇකඩමිය මඟින් අපේ තිබෙන අනෙක් ආයතනත් යොදාගෙන විවිධ විෂයන් පිළිබඳ සති දෙකකට හෝ වරක් වැඩමුළුවක්, සම්මන්ත්‍රණයක් පවත්වා එහි විවිධ මට්ටම් පිළිබඳ සොඳුරු ගැටීමක් ඇතිවන ආකාරයට ප්‍රබුද්ධ සංවාඳයක් ඇති කරන්න පුළුවන් වෙයි කියා මම හිතනවා. එය විෂය මාලාවේ කොටසක් ලෙස කරන්න පුළුවන්.
“ඊට අතිරේකව අනෙක් පැති ගත් විට සෞන්දර්යාත්මක හා කලා ක්ෂේත්‍රය ගත් විට විවිධ අත්දැකීම් ලැබුණු බොහෝ කලාකරුවන් හා බොහෝ නිර්මාණකරුවන්, සාහිත්‍යකරුවන් වයස්ගත වෙනවා. ඔවුන්ගේ තිබුණු දැනුම සමඟ අප සැසඳීමේදී අල්පශ්‍රැත වෙනවා. ආචාර්ය ගුණදාස අමරසේකරයන්ගේ 94 වැනි ජන්ම දිනය සැමරීම පිළිබඳ උත්සවය මම දුටුවා. ඔහු මධ්‍ය ක්ෂේත්‍රයේ දැවැන්තයෙක්. ඔහුගේ තිබෙන අදහස්, සිතුම්, පැතුම්, ආකල්ප පිළිබඳ අපටත් අලුත් පරම්පරාවටත් යමක් එකතු කරගන්න පුළුවන්. අවුරුදු 90 සපිරෙන මහාචාර්ය එදිරිවීර සරච්චන්ද්‍රයන් සමඟ නාට්‍යයකට, රංග කලාව සඳහා උරදුන් විජයරත්න වරකාගොඩ මහතා 90 වැනි විය සපුරනවා. එවිට මේ මාධ්‍ය ඇකඩමියට පුළුවන් එවැනි අත්දැකීම් බහුල බොහෝ දෙනකුගේ ඇසූ පිරූ තැන් ඇති අයගේ භාවිතය ලබාගන්න. එය සාම්ප්‍රදායික විශ්වවිද්‍යාල පද්ධතිය තුළ නොකෙරෙන දේ මාධ්‍ය ඇකඩමියට කරන්න පුළුවන්. ඒ නිසා මාධ්‍ය ඇකඩමියේ ඊළඟ වර්ෂයේදී වඩාත් පුළුල් පරාසයක් තුළ තමන්ගේ භූමිකාව ඉටු කර අනාගතයේදී විශ්වවිද්‍යාලයක් බවට උසස් තත්ත්වයට පරිවර්තනය කරගන්න මේ හා දායක වූ සැමට ශක්තිය, ධෛර්යය හා වාසනාව ලැබේවායි පතනවා!”
ලංකාවේ සීමාසහිත එක්සත් ප්‍රවෘත්ති පත්‍ර සමාගමේ සභාපති, මහාචාර්ය හරේන්ද්‍ර කාරියවසම් මහතා:
“මගේ සිත ඇදී යන්නේ මීට වසරකට පමණ පෙරාතුව ලේක්හවුස් මාධ්‍ය ඇකඩමිය ආරම්භ කළ මුල්ම දිනයටයි. මට අද වගේ මතකයි එදා මා පැවසුවා මාධ්‍ය ඇකඩමිය ඇරඹීමෙන් ලේක්හවුස් වංශකථාවේ නව පරිච්ඡේදයක් ආරම්භ වන බව. අද අප ඒ අරමුණට ළඟා වෙමින් සිටිනවා. මේ වන විට ලේක් හවුස් මාධ්‍ය ඇකඩමිය යන නාමය අප ආයතනය සතු වෙනම පෞද්ගලික සමාගමක් ලෙස ලියාපදිංචි කර අවසන්. එසේම ඩිප්ලෝමා පාඨමාලා දෙකක් සහිතව එක් දින වැඩමුළු රාශියක් සාර්ථක ලෙස නිම කර ඇති අතර, මේ පාඨමාලා සඳහා NVQ මට්ටම ලබාගැනීමටද පියවර ගෙන තිබෙනවා. ශ්‍රී ජයවර්ධනපුර විශ්වවිද්‍යාලය, ශ්‍රී ලංකා ගුවන් විදුලි සංස්ථාව, ශ්‍රී ලංකා රූපවාහිනී සංස්ථාව, ස්වාධීන රූපවාහිනිය ඇතුළු විවිධ ආයතන සමඟ අවබෝධතා ගිවිසුම් ඇති කරගැනීමේ කටයුතු අවසන් අදියරට පැමිණ තිබෙනවා. එමෙන්ම ලේක්හවුස් මාධ්‍ය ඇකඩමිය මාධ්‍ය විශ්වවිද්‍යාලයක් බවට පත් කිරීමට අවශ්‍ය මූලික කරුණුද මේ වන විටත් විශ්වවිද්‍යාල ප්‍රතිපාදන කොමිෂන් සභාව සමඟ සාකච්ඡා කරමින් පවතිනවා.
“එමෙන්ම 2024 වසරේ ලේක්හවුස් ආයතනයට මූල්‍ය ශක්තියක් දෙන ප්‍රබලම අංශයක් බවට ද පත් කර තිබෙනවා. තොරතුරු තාක්ෂණ විප්ලවය, නව ආර්ථික අර්බුදය ඇතුළු සමස්ත ජනමාධ්‍ය ක්ෂේත්‍රය යම් අභියෝගයට ලක් වී ඇති යුගයක සාම්ප්‍රදායික ජනමාධ්‍ය ව්‍යූහය ධෛර්යයෙන් යුතුව පරිවර්තනය කිරීමට සහ එමඟින් ජනමාධ්‍ය ආයතනවල පෙරමුණට ලේක්හවුස් ආයතනය ගෙන ඒමට අප කැප වී කටයුතු කරනවා. ලේක් හවුස් ආයතනය නව මාවත් සොයා යන ගමනේදී අපට හමු වුණු, මාධ්‍ය ඇකඩමිය ආරම්භ කිරීමට මඟ පෙන්වීමත් ඊට අවශ්‍ය ශක්තිය දීමත් පිළිබඳව හිටපු සභාපති, ජනමාධ්‍ය අමාත්‍යාංශයේ ලේකම් අනූෂ පැල්පිට මහතා මා මේ මොහොතේ ඉතා ගෞරවයෙන් හා ආදරයෙන් මතක් කරනවා. ආචාර්ය බන්දුල ගුණවර්ධන මහතා මගේ ආර්ථික විද්‍යා ගුරුවරයායි. එදා ඔබ ඉගැන්වූ න්‍යායාත්මක දැනුම අද ප්‍රායෝගිකව අප භාවිත කරනවා.
“සාම්ප්‍රදායික තවත් එක් ඇමතිවරයකු නොවී අනාගතය දකින වැඩ කිරීමට සුදුසු පරිසරයක් නිර්මාණය කරදෙන සුවිශේෂ පුද්ගලයකු ලෙස මා ඔබට ගෞරව කරනවා. ලේක් හවුස් ආයතනය පිළිබඳ ඔබ දකින සුබ සිහින සැබෑ කිරීමට අප ඇප කැප වී කටයුතු කරන අතර, ඒ සඳහා සුවිශේෂ හැකියාවන්ගෙන් සමන්විත බැඳීමෙන් වැඩ කරන අධ්‍යක්ෂ මණ්ඩලයක් සහ සේවක පිරිසක් අප සතු බව මා පවසන්නේ ඉතා සතුටින්. මාධ්‍ය ඇකඩමියේ කටයුතු සඳහා සුවිශේෂ කැප වීමෙන් කටයුතු කරන එහි සමායෝජක නිසයුරු ආරියර්වර්ධන මහත්මිය, අලෙවිකරණ කටයුතු ඇතුළු සියලු කටයුතු සඳහා දිවා රෑ නොබලා වෙහෙසෙන එරන්ද එදිරිමාන්න මහතා ඒ වගේම අරුණි මුතුමලි, මනෝලි සුබසිංහ, වාසනා අබේනායක හා රශ්මිකා මහත්මීන්ද ඩිජිටල් අංශයේ කාර්ය මණ්ඩලයද මා ආදරයෙන් සිහිපත් කරනවා.
“අද දින පාඨමාලා සම්පූර්ණ කර සහතික ලබා හෙට දිනයේ සැබෑ ලෝකයට පිය නඟන ඔබගෙන් මම සෙනෙහෙබරව ආයාචනය කර සිටින්නේ සහතිකවලින් ඔබ්බට ගිය ලෝකයක් දකින්න ලෙස හා ඒ අනුව සැබෑ ලෝකයේ විස්මිත වෙනසක් කරන්න දායක වන ලෙසයි. සහතික දැකීම සහ ලැබීම සිත් සතුටු කරවන කාරණයක් වන නමුත්, සහතිකවලට පමණක්ම ඔබව විශිෂ්ටයකු කළ නොහැකි බවයි. ඔබ විශිෂ්ටයකු බවට පත් වන්නේ හෙටින් ඇරඹෙන ලෝකයේ ඔබ ක්‍රියා කරන ආකාරය මතයි. මාගේ දේශනය අවසන් කිරීමට පෙර අයිසැක් නිව්ටන්ගේ ශ්‍රේෂ්ඨ කියමනකට අවධානය යොමු කරන්න කැමැතියි. ඔහු ප්‍රකාශ කළේ ඔහු වෙරළේ අවිදිමින් සිප්පිකටු එකතු කරන කුඩා දරුවකු බවයි. ඔහුගේ විද්‍යා ඥානය වෙරළෙන් ඔහුගේ අත්ලට පැමිණි සිප්පිකටුවලට සමාන කර ඇති අතර, මහ සයුරරෙන් තවමත් එළියට නොපැමිණි සිප්පිකටු ප්‍රමාණය හා සැසඳීමේදී ඔහුගේ ඥානය ඉතා අල්ප බවට නිහතමානිව ප්‍රකාශ කළා. එබැවින් අද ලේක් හවුස් මාධ්‍ය ඇකඩමියෙන් සහතික ලැබ සමු ගෙන යන ඔබ ශ්‍රීමත් අයිසැක් නිව්ටන් ප්‍රකාශ කළා සේම ඔබ නොදන්නා ලෝකය ජයග්‍රහණය කරන්නට උත්සාහ ගන්නා ලෙස මා ඉල්ලා සිටිනවා. මේ ඩිප්ලෝමා ප්‍රදාන උත්සවය තව සුළු වේලාවකින් අතීතයට එක් වෙයි. එහෙත් ඔබ අයිති වන්නේ එම අතීතයට නොව හෙටින් ඇරඹෙන අනාගතයටයි. ඒ අනාගත ලෝකයේ ඩිජිටල්කරණය, Al තාක්ෂණයෙන් පරිපුරණ නූතන ජන මාධ්‍යවේදීන් ලෙස අපි යළි හමු වෙමු.”
ඩිප්ලෝමා ප්‍රදානයට සමගාමිව ලේක්හවුස් මාධ්‍ය ඇකඩමියේ නිල වෙබ් අඩවිය එළිදැක්වීමද ප්‍රවාහන, මහාමාර්ග හා ජනමාධ්‍ය ඇමැති, ආචාර්ය බන්දුල ගුණවර්ධන මහතාගේ ප්‍රධානත්වයෙන් සිදු වූ අතර, මේ අවස්ථාවට සහභාගි වීම වෙනුවෙන් ඇමැතිවරයා වෙත සමරු තිළිණයක් පිළිගැන්වීම ලේක්හවුස් සභාපති මහාචාර්ය හරේන්ද්‍ර කාරියවසම් මහතා අතින් සිදු විය.
ජනමාධ්‍ය අමාත්‍යාංශයේ අතිරේක ලේකම් එම්.එස්.බී. ජයසුන්දර, රජයේ ප්‍රවෘත්ති අධ්‍යක්ෂ ජනරාල් දිනිත් චින්තක කරුණාරත්න, ශ්‍රී ලංකා රූපවාහිනී සංස්ථාවේ සභාපති ආචාර්ය ප්‍රසාද් සමරසිංහ, කොළඹ විශ්වවිද්‍යාලයේ මහාචාර්ය ටියුඩර් වීරසිංහ, ආචාර්ය චන්දන තිලකරත්න, ලේක්හවුස් ආයතනයේ අධ්‍යක්ෂවරුන් වන සිසිර පරණතන්ත්‍රී, මංජුල මාකුඹුර, ආචාර්ය සුනිල් ජයන්ත නවරත්න, නීතිඥ ජනක රණතුංග, සාමාන්‍යාධිකාරි සුමිත් කොතලාවල, සමාගම් ලේකම් සුදර්ශි හේවාවසම්, අතිරේක සාමාන්‍යාධිකාරි වී.එස්. බොයිස්, නියෝජ්‍ය සාමාන්‍යාධිකාරීවරුන් වන චන්දන බණ්ඩාර, චින්තක යාපා, ප්‍රමිතා ජයමහ, දිනමිණ පුවත්පතේ ප්‍රධාන කර්තෘ මනෝජ් අබයදීර, සිළුමිණ පුවත්පතේ ප්‍රධාන කර්තෘ ධර්මන් වික්‍රමරත්න, ඩේලි නිව්ස් සහ සන්ඩේ ඔබ්සර්වර් ප්‍රධාන කර්තෘ ප්‍රමෝද් ද සිල්වා, තිනකරන් පුවත්පතේ ප්‍රධාන කර්තෘ ටී. සෙන්තිල් වේලවර් මහත්ම මහත්මීන් ඇතුළු පිරිසක් මේ අවස්ථාවට එක්ව සිටියහ.
