පර්චස් දහයක ඉඩමක් තුළ තනා ඇති දෙමහල් නිවසක් පොලී පදනම යටතේ ලක්ෂ හැටක මුදලක් ලබා ගැනීමේ සිද්ධියකින් පසුව දෙපාර්ශවය අතර හට ගෙන ඇති ආරාවුලක් හේතුවෙන් මීරිගම පොලීසිය ගොනු කර තිබූ ලක්ෂ හැට හයේ නඩුවක් ඊයේ (16) පෙරවරුවේ නැවත කැඳවූ අවස්ථාවේ එහි හිමිකාරිය වෙනුවෙන් පෙනී සිටි නීතීඥ සමීර වික්‍රමසිංහ මහතා කරුණු දක්වමින් මේ වන විට ප්‍රශ්න ගත නිවසින් හිමිකාරිය දොට්ට දමා පොලියට මුදල් දී ඇති පාර්ශවය නිවසට ඇතුල් වී සිටින හෙයින් ප්‍රාථමික අධිකරණ නඩු විධාන සංග්‍රහ පනතේ 67/03 වගන්තිය ප්‍රකාරව අතුරු ආඥාවක් ඉල්ලා සිටීම හේතුවෙන් මහේස්ත්‍රාත්වරයා ඊයේම (16) පස්වරුවේ එම නිවසට ගොස් ස්ථාන පරීක්ෂණයක් සිදු කළ අවස්ථාවේ හිමිකාරියට අයත් භාණ්ඩ විශාල ප්‍රමාණයක් අස්ථාන ගත වී ඇති බවට අනාවරණය වීම හේතුවෙන් දෙපාර්ශ්වයට අද (17) පෙරවරුවේ අධිකරණය ඉදිරියේ පෙනී සිටින ලෙසට නියෝග කළේය.
මීරිගම වැරල්ලවත්තේ පදිංචි උත්පලා තුෂාරි මුතුනායක නැමැත්පතිය පදිංචි දෙමහල් නිවස 2018 වසරේ උකස් කර රුපියල් ලක්ෂ හැටක මුදලක් ලබා ගැනීමෙන් පසුව ලක්ෂ විසි පහක පමණ මුදලක් ඇය මුදල් ලබා ගත් පාර්ශවයට ආපසු ගෙවා ඇති බව කියන නමුත් දෙපාර්ශවය අතර ආරාවුලක් හට ගැනීම හේතුවෙන් මීරිගම පොලීසිය ප්‍රාථමික නඩු විධාන සංග්‍රහ පනතේ 66 වගන්තිය ප්‍රකාරව නඩුවක් ගොනු කර ඇත.
එම නඩුව ඊයේ (16) පෙරවරුවේ නැවත කැඳවූ අවස්ථාවේ නිවසේ හිමිකාරිය වන උත්පලා තුෂාරි මුතුනායක හා මුදල් දුන් බව කියන පාර්ශවයේ ලක්මිණි උමයංගනා නැමැත්තිය අධිකරණය ඉදිරියේ පෙනී සිටියහ.
