ගෙවී ගිය මාස තුනක කාලය තුළ නීති විරෝධී මත්ද්‍රව්‍ය කිලෝග්‍රෑම් 50ක් රේගු භාරයට ගෙන ඇතැයි මුදල් රාජ්‍ය ඇමැති ආචාර්ය රංජිත් සියඹලාපිටිය මහතා පැවැසීය. ඒ අතර කුෂ් සහ හෂීස් යන මත්ද්‍රව්‍ය වන බව රාජ්‍ය ඇමැතිවරයා සඳහන් කළේය. කැනඩාවේ සිට මෙරටට ආනයනය කළ බහාලුමක තිබී පසුගියදා සොයා ගත් කුෂ් මත්ද්‍රව්‍ය තොගයක් නිරීක්ෂණය කිරීම සඳහා ඊයේ (16) ඔරුගොඩවත්ත රේගු අංගණය වෙත ගිය අවස්ථාවේ රාජ්‍ය ඇමැතිවරයා මේ බව කියා සිටියේය.
පසුගිය මස 25 වැනිදා ශ්‍රී ලංකාවට ආනයනය කරන ලද මෙම බහාලුම පිළිබඳ ඇති වූ සැකය මත රේගුවේ ආදායම් අධීක්ෂණ බළකාය විසින් අත්අඩංගුවට ගන්නා ලදි.
පොලිස් මත්ද්‍රව්‍ය නිවාරණ කාර්යාංශය සමඟ සිදු කළ පරීක්ෂාවේ දී එහි තිබී කුෂ් මත්ද්‍රව්‍ය කිලෝග්‍රෑම් 6ක් සොයා ගැණිනි. එම තොගයේ වටිනාකම රුපියල් මිලියන 60ක් පමණ බව සියඹලාපිටිය මහතා සඳහන් කළේය. ඉතාලියේ සිට ගෙන් වූ බහාලුමක තිබී හෂීස් මත්ද්‍රව්‍ය කිලෝග්‍රෑම් 35ක් සහ අමෙරිකාවේ සිට ආනයනය කරන ලද බහාලුමක තිබී කුෂ් මත්ද්‍රව්‍ය කිලෝග්‍රෑම් 10.5ක් මීට පෙර සොයා ගැනුණි.
