බොරැල්ල ලෙස්ලි රණගල මාවතේ පිහිටි තට්ටු නිවාස සංකීර්ණයක පදිංචි කෝටිපති ව්‍යාපාරිකයකුගේ නි‍ෙවසකින් රුපියල් ලක්ෂ 85කට අධික මුදලක් සොරාගෙන ත්‍රිරෝද රථයකින් යමින් සිටි මෙහෙකාර සේවකයා පොලිසියට හසුවීමෙන් අනතුරුව එම මුදල් සියල්ල පොලිසියට අල්ලස් ලෙස ලබාදීමට උත්සාහ කිරීමේදී අත්අඩංගුවට ගත් බව බොරැල්ල පොලිසිය සඳහන් කරයි.
සැකකරු සමඟ සොරා ගත් මුදලින් රුපියල් 8,440,000/=ක මුදලක් ද පොලිස් භාරයට ගෙන ඇත.
බදුල්ල ප්‍රදේශයේ කෝටිපති ව්‍යාපාරිකයකු පුතුන් දෙදෙනාගේ අධ්‍යාපන කටයුතු සඳහා බොරැල්ලේ පිහිටි මෙම සුඛෝපභෝගී නිවාස සංකීර්ණණයේ නිවසක් කුලී පදනම මත ලබාගෙන ඇත. එම නිවසේ මෙහෙකාර සේවය සඳහා ඔහු යටතේ වසර 25ක පමණ කාලයක් සේවය කළ සැකකරු රඳවාගෙන සිටි බව පොලිසිය කියයි.ව්‍යාපාරිකයාගේ පුතුන් දෙදෙනා සහ වැඩිමල් පුතුගේ මිතු‍ෙරකු මෙම නි‍ෙවසේ පදිංචිව සිටින බව පොලිසිය කියයි. කෝටිපති ව්‍යාපාරිකයා බදුල්ලේ සිට සිය බිරිය සහ දියණිය සමඟ එම නිවසට පෙරේදා (15) පැමිණ ඇති බව ද පොලිසිය කියයි
පුතුන් දෙදෙනා සහ ඔහුගේ මිතුරා අධ්‍යාපන කටයුතු සඳහා උදෑසන නිවසින් පිටත්ව ගොස් තිබූ අතර, එම නිවසට පැමිණි ව්‍යාපාරිකයාගේ බිරිය සහ දියණිය අවශ්‍යතාවයක් සඳහා දහවල් නිවසින් පිටතට ගොස් තිබූ අතර, මද වේලාවකදී ව්‍යාපාරිකයා ද රියදුරු සමඟ නිවසින් පිටතට ගොස් තිබූ බව පොලිස් විමර්ශනවලදී අනාවරණය වී ඇත.
එම අවස්ථාවේදී මෙහෙකරුවන සැකකරු රියැදුරු අමතා ඔවුන් සිටින තැන විමසා පැමිණෙන විට ප්‍රෙෂර් පෙති රැගෙන එන ලෙස දැනුම් දී දුරකතනය විසන්ධි කර තිබූ බව පොලිසිය කියයි ව්‍යාපාරිකයා හා රියැදුරු නිවසට පැමිණෙන විට නිවසේ දොර අඩවල් කර තිබූ අතර රියදුරු ප්‍රෙෂර් පෙති ලබා දීම සඳහා මෙහෙකරු අමතා කතා කළ ද ප්‍රතිචාරයක් නොවීමෙන් නිවසේ සෑමතැනම සොයා බැලුව ද ඔහු සොයා ගැනීමට නොහැකි වීමෙන් අනතුරුව ව්‍යාපාරිකයාට ඒ බව පවසා තිබේ. ඒ අනුව ව්‍යාපාරිකයා නිවසට පැමිණ කළ සොයා බැලීමේදී නිවසේ අල්මාරිය විවෘත කර ඇති අයුරු දක්නට ලැබී ඇත.
නිවසේ අල්මාරියේ තැන්පත් කර තිබූ රුපියල් කෝටියකට පමණක් ආසන්න මුදලින් රුපියල් ලක්ෂ 85ක මුදලක් නොමැති බවත් රන් භාණ්ඩ සහ තවත් මුදල් ඒ අයුරින්ම තිබෙන බවත් පවසමින් ව්‍යාපාරිකයා බොරැල්ල පොලිසියට පැමිණිලි කර තිබිණි පැමිණිල්ල ලැබී පැය කිහිපයක් ගතවීමට මත්තෙන් ගල්ගමුව පොලිසියෙන් බොරැල්ල පොලිසියට ලද පණිවුඩයකින් කියවී ඇත්තේ මාර්ග බාධකයක් හරහා ත්‍රිරෝද රථයකින් යාමට පැමිණි පුද්ගලයකු පරික්ෂා කිරීමේදී ඔහු එක වරම බෑගයකින් මනාව සකස් කරන ලද මුදල් මිටියක් පොලිස් නිලධාරීන් වෙත දික් කර එය ලබාගෙන තමන්ට එම ස්ථානයෙන් යාමට ඉඩ සලසා දෙන ලෙස ඉල්ලීමක් කළ බවය. ඒ අනුව ඔහු සන්තකයේ තිබූ බෑගය පරීක්ෂා කිරීමේදී විශාල මුදල් තොගයක් තිබීම හේතුවෙන් ඔහු අත්අඩංගුවට ගත් බව ගල්ගමුව පොලිසිය දැනුම් දී ඇත.
අධික ලෙස මත්පැන් පානය කර සිටි එම පුද්ගලයා අනෙක් මුදල් කොටස ද තමන් වෙත ලබා දීමට එකඟතාවය පළ කළ බවත් එම පොලිස් නිලධාරීන් පවසා ඇත. මුදල් සහිතව සිටි පුද්ගලයා බොරැල්ලේ සිට මෙම මුදල් රැගෙන යමින් සිටින බව ගල්ගමුව පොලිසිය හෙළිකරගෙන ඇත්තේ සැකකරු කුලී පදනමට රැගෙන ලබාගත් ත්‍රිරෝද රථ රියදුරුගෙන් ප්‍රශ්න කිරීමේ දීය. තමන් බොරැල්ලේ සිට අනුරාධපුරය දක්වා කුලී පදනම මත මෙම පුද්ගලයා සමඟ පැමිණි බව ද ඔහු ප්‍රකාශ කර ඇත. සැකකරු මුදල් සොරා ගැනීමෙන් අනතුරුව ත්‍රිරෝද රථයේ නැඟී කටුනායකට පැමිණ මත්පැන් පානය කර එහි සේවකයකුට සන්තෝසම් වශයෙන් රුපියල් 5000ක මුදලක් ද ලබාදී ඇතැයි විමර්ශනවලදී අනාවරණය වී ඇත
සැකකරු අනුරාධපුරයට එන අතරවාරයේදී දුරකතනයෙන් අමතා ඔහුගේ පුතුට වෑන් රථයක් මිලදී ගැනීම සඳහා මුදල් ලබා දෙන බවට ද පොරොන්දු ලබා දී ඇතැයි ද වැඩිදුර විමර්ශනවලදී අනාවරණය වී තිබේ. 52 හැවිරිදි සැකකරු අධිකරණය වෙත ඉදිරිපත් කිරීමට නියමිතය. ඔහු ලුණුගල පදිංචිකරුවෙකි.
