නාවික හමුදා ක්ෂණික ක්‍රියාකාරී යාත්‍රා බළගණයේ 27 වැනි සුදුසුකම් ලැබීමේ පාඨමාලාව සම්පූර්ණ කළ නිලධාරීන් දෙදෙනකු සහ නාවිකයන් 34 දෙනකුට ලාංඡන පැලඳවීමේ උත්සවය පෙරේදා (15) පුත්තලම, ග‍ඟේවාඩිය ක්ෂණික ක්‍රියාකාරී යාත්‍රා බළගණ මූලස්ථාන ප්‍රධාන සරඹ පිටියේදී වයඹ නාවික විධානයේ ආඥාපති රියර් අද්මිරාල් නිශාන්ත පීරීස් මහතාගේ ආරාධනයෙන්, නාවික හමුදාපති වයිස් අද්මිරාල් ප්‍රියන්ත පෙරේරා මහතාගේ ප්‍රධානත්වයෙන් අභිමානවත් අයුරින් පැවැත්විණි.
අනන්තයට එහා දිවෙන විජයග්‍රහණය කරා යන උදාර පාඨය රැගත් ක්ෂණික ක්‍රියාකාරී යාත්‍රා බළගණයේදී මාස නවයක කාල සීමාවක් පැවති මේ පුහුණු පාඨමාලවේදී හදිසි සහ ස්වභාවික ආපදා තත්ත්වයන්හි දී ආපදාවට පත්වන පිරිස් මුදවාගැනීම සහ ඔවුන්ගේ ජීවිත සහ දේපොළ ආරක්ෂා කර අවශ්‍ය සහන සැලසීමේ මෙහෙයුම් සඳහා මනා ප්‍රායෝගික හා න්‍යායාත්මක පුහුණුවක් දීම සිදු කෙරිණි.
පුහුණු කාල සීමාවේදී විශේෂ කුසලතා දැක්වූ නිලධාරීන් සහ නාවිකයන් වෙත විශේෂ සම්මාන පිරිනැමීම එහිදී නාවික හමුදාපතිවරයා විසින් සිදු කෙරිණි. ඒ අනුව විශිෂ්ටතම පුහුණුවන්නාට හිමි සම්මානය ලුතිනන් ජීආර්එස්ආර් තිලකරත්න විසින් හිමිකර ගත් අතර, දක්ෂතම යාත්‍රා හසුරවන්නාට හිමි සම්මානය ලුතිනන් ඩීජීවයිපී ප්‍රේමලාල් විසින් හිමි කරගන්නා ලදි. දක්ෂතම ජීවිතාරක්ෂකයාට හිමි සම්මානය බලනැවි ආර්ජීආර් ජීවන්ත විසින් සහ දක්ෂතම ශාරීරික යෝග්‍යවත් පුහුණුවන්නාට හිමි සම්මානය එහිදී බලනැවි එච්එම්එම්එන්බී හේරත් විසින් නාවික හමුදාපතිවරයා වෙතින් හිමි කර ගන්නා ලදී. එහිදී පුහුණුව අවසන් කළ නාවිකයන් ඇමතූ නාවික හමුදාපති වයිස් අද්මිරාල් ප්‍රියන්ත පෙරේරා ප්‍රථමයෙන් ක්ෂණික ක්‍රියාකාරී යාත්‍රා බළගණ සුදුසුකම් ලැබීමේ පාඨමාලාව සාර්ථකව සම්පූර්ණ කළ නාවික පුද්ගලයන් වෙත සිය ශුභාශිංසන පිරිනැමීමට කටයුතු කෙරිණි. මේ උත්සවයෙන් අනතුරුව සිය පුහුණු වීමෙන් ලද පන්නරය විදහා දක්වමින් 27 වන සුදුසුකම් ලැබීමේ පාඨමාලාවට අයත් නාවිකයන් විසින් විශේෂ සංදර්ශනයක් සහ දියේ ගිලී ආපදාවට පත් පුද්ගලයන්ට සහන සැලසීමේ ප්‍රදර්ශනාත්මක මෙහෙයුමක් සිදු කළ අතර, ඒ සඳහා ශ්‍රී ලංකා ගුවන් හමුදාවේ බෙල් 212 වර්ගයේ හෙලිකොප්ටර් යානාවක් ද එක් විය.
