පැසිපියා චිත්‍රපට ඉදිරිපත් කළ “දැවෙන පිපාසය” චිත්‍රපටය තිරගත වූයේ 1971 වසරේ පෙබරවාරි මස 11 වනදාය. නිෂ්පාදනය පබ්ලික් දොඩන්ගොඩගේය. තිරපිටපත, කැමරාකරණය සහ අධ්‍යක්ෂණය තිමති වීරරත්නගෙනි. මෙම චිත්‍රපටයේ වඩාත් ජනප්‍රිය ගීතයක් ලෙසින් ප්‍රචලිත වූයේ එච්.ආර්. ජෝතිපාල සහ ශ්‍රීමතී තිලකරත්න විසින් ගායානා කරනු ලබන
“රිදී වලා තුළින් එබී
යන ගීතයයි. මෙම ගීතය සංගීතවත් කරනු ලැබුවේ පී.වී. නන්දසිරි වන අතර, පදරචනය හෙන්රි ධර්මසේනගේය.
චිත්‍රපටයේ ප්‍රධාන චරිතය රඟදැක්වූ රොබින් ප්‍රනාන්දු තමා රංගනයෙන් සම්බන්ධ වූ චිත්‍රපට දහයකට පමණ පසු ප්‍රධාන නව භූමිකාව හා එක්වන්නේ දැවෙන පිපාසය චිත්‍රපටය තුළිනි. ඔහු හා ප්‍රධාන නිළිය චරිතය රඟදක්වන්නේ නිලන්ති විජේසිංහයි.
චිත්‍රපටය සඳහා දායක වන අනෙකුත් නළු නිළියන් වන්නේ බන්ධු මුණසිංහ, බැසිල් ද සේරම්, දොන් සිරිසේන, දයානන්ද ජයවර්ධන, එඩී. ජුනියර්, පූජිත මෙන්ඩිස්, පියදාස විජේකෝන්, පියදාස ගුණසේකර, ස්ටැන්ලි පෙරේරා, රෝයි ද සිල්වා, ශ්‍රියාණි පෙරේරා, තලතා ගුණසේකර, ගර්ලි ගුණවර්ධන, ශාන්ති ලේඛා හා පර්ල් වාසුදේවිය.
මෙහි විශේෂත්වය වන්නේ එච්.ආර්. ජෝතිපාල ද මෙම චිත්‍රපටයට රංගනයෙන් සම්බන්ධ වීමයි. ඔහු රංගනයෙන් සම්බන්ධ වෙමින් ගයන ගීය වන්නේ
“ලස්සන ලස්සන මල් වාගේ”
යන ගීතයයි.
චිත්‍රපටයේ කතා වස්තුවට අනුව ප්‍රධාන නළුවා ලෙසින් රංගනයේ යෙදෙන රොබින්ට, නිලන්ති හමුවන්නේ සමාජ ශාලාවකදීය. මෙලෙස හඳුනාගත් අලුත් මිතුරියට ඔහුගේ ආරාධනාව වන්නේ රාත්‍රී භෝජනයකට පැමිණෙන ලෙසයි. එම ඉල්ලීම පිළිගත් ඇය ඔහු හමුවට එන්නේ එකල තිබූ ජනප්‍රිය විලාසිතාවක් වූ සාරි විලාසිතාවක් ද සමඟිනි. මේ සමාජ ශාලාවේම රංගනයෙන් සම්බන්ධ වන නාටිකාංගනාවන් සමඟින් ගීත ගායනයට එක්වන්නේ එච්.ආර්. ජෝතිපාලයි. මේ ඔවුන්ගේ ප්‍රේම කතාවේ ආරම්භක ලක්ෂණයයි. එතැන් සිට දිගහැරෙන්නේ ඔවුන්ගේ ප්‍රේම විකාශයයි. මෙකී ප්‍රේම කතාව මෙසේ දිග හැරෙන විට තරුණියන් අතුරුදන් වන්නට ලක්වන බවක් දැනගන්නට ලැබෙන්නේ බදුල්ල හා බණ්ඩාරවෙල ප්‍රදේශයන්ගෙනි.
චිත්‍රපටය ඉදිරියට ගලා යන්නේ මෙවන් පසුබිමකය. 35mm ප්‍රමාණයේ කළු සුදු චිත්‍රපටයක් වන මෙහි කතා වස්තුව හා දෙබස් හෙන්රි ධර්මසේනගේය. පී.පී. නන්දසිරි සංගීත අධ්‍යක්ෂණයෙන් සම්බන්ධ වන දැවෙන පිපාසය චිත්‍රපටයේ කලා අධ්‍යක්ෂණය ස්ටීවන් ගුණතිලකගේය.
චිත්‍රපටයේ ගීත 05ක් අන්තර්ගත වන අතර, රුවන් වලා තුළින් එබී (එච්.ආර්. ජෝතිපාල – ශ්‍රීමතී තිලකරත්න), ලස්සන ලස්සන මල් වාගේ (එච්.ආර්. ජෝතිපාල) , රුචිරාණන මල් සුවඳ ගලා (ලතා වල්පොල) හා I Love You යන ඉංග්‍රීසි ගීතය ඒ අතර වේ. චිත්‍රපටයේ ගීත පොත් එවක මුද්‍රණය වූයේ මරදාන ආනන්ද පොත්හලේය.
අද (17) දා රාත්‍රී 10.00ට “දැවෙන පිපාසය” චිත්‍රපටය ප්‍රදර්ශනයට පෙර ප්‍රවීණ සිනමා විචාරක ගාමිණී වේරගම මහතා විසින් සිනමා විචාරයක්ද පවත්වනු ලබන අතර, ඒ අවස්ථාවට ප්‍රවීණ රංගන ශිල්පිනී නිලන්ති විජේසිංහ මහත්මිය ද සම්බන්ධ වේ.
