කර්මාන්ත ශාලාවක භාවිත කළ රොබෝ හස්තයක් මගින් මිනිසකු ජීවිතක්ෂයට පත් වීමේ පුවතක් දකුණු කොරියාවෙන් වාර්තා වේ. මේ ඛේදවාචකය සිදු වී ඇත්තේ දකුණු කොරියාවේ ආහාර ඇසුරුම් කර්මාන්ත ශාලාවක ගම්මිරිස් ඇසුරූ පෙට්ටි ඔසවා විද්‍යුත් ආධාරයෙන් ගමන් කරන පටියක තබා ප්‍රවාහනය කිරීම සඳහා යොදා ගන්නා රොබෝ හස්තයකිනි. රොබෝ යන්ත්‍ර මගින් මීට පෙර මිනිසුන් තුවාල ලබා තිබුණද, මරණයක් වාර්තා වූ පළමු අවස්ථාව මෙය බව සඳහන් වේ.
ජීවිතක්ෂයට පත් වූ මැදි වියේ පුද්ගලයා එම රොබෝ හස්ත නිපද වූ සමාගමේ සේවකයකු වන අතර, මීට දින කිහිපයකට පෙර රොබෝ හස්තයේ දෝෂයක් පිළිබඳ ලද පැමිණිල්ලකට අනුව එම සමාගමට පැමිණ එය පරීක්ෂා කිරීමට ගොස් ඇත. අවාසනාවකට එම සේවකයා ආසන්නයට පැමිණි මොහොතේ ආහාර ඇසුරූ පෙට්ටිවලින් වෙන් කර හඳුනා ගැනීමට අසමත් වූ එම රොබෝ හස්තය ඔහු ඔසවා විද්‍යුත් ආධාරයෙන් ගමන් ගන්නා පටියෙහි තබා ඔහුගේ මුහුණ සහ පපුව ප්‍රදේශය පොඩි කර දමා ඇතැයි විදෙස් මාධ්‍ය වැඩිදුරටත් වාර්තා කළේය.
පසුව ඔහු රෝහල්ගත කළද, ඒ වන විටත් ජිවිතක්ෂයට පත්ව සිටි බව වාර්තා වේ.
රොබෝ හස්තයේ දෝෂයක් හේතුවෙන් මේ මරණය සිදු වූ බවට විමර්ශනයෙන් අනාවරණය වී තිබේ.
