අම්බලන්ගොඩ මාදම්පා ගඟේ ඇතිවූ කිඹුල් තර්ජනයක් නිසා එම ගඟේ පිහිනුම් පුරුදු වන සිසුන් හට සිය පුහුණුවීම් කටයුතු සිදු කිරීමට නොහැකි තත්ත්වයක් උදා වී ඇත.
දැනට දින කිහිපයක සිට විශාල කිඹුලකු පුහුණුවීම් කටයුතු සිදු කරන ස්ථානය අසල සැරිසැරීම හේතුකොටගෙන මේ තත්ත්වය උදා වී ඇත. පිහිනුම් සමාජ හතරක පිහිනුම් ක්‍රීඩාව ඉගෙන ගන්නා සිසුන් මෙම මාදම්පා ගඟේ පුහුණුවීම් කටයුතු සිදු කරයි. එසේම මෙම ගංගා තීරයේ පිහිනුම් තරඟ ද පවත්වනු ලබයි. මෙම කිඹුල් තර්ජනය හේතුකොටගෙන මේ වන විට සියලුම පුහුණුවීම් කටයුතු ආදිය නවතා දමා ඇත. මේ සම්බන්ධයෙන් ප්‍රදේශවාසීන් හික්කඩුව වනජීවි කාර්යාලය වෙත දැනුවත් කිරීමෙන් අනතුරුව මෙම කිඹුලා අල්ලා ගැනීම සඳහා ඊයේ රාත්‍රියේ යකඩ කූඩුවක් කොළඹ අත්තිඩිය වනජීවි කාර්යාලයේ සිට රැගෙන අතර, එය මාදම්පා ගන් තීරයේ තැබීමට කටයුතු කරන බව හික්කඩුව වනජීවී කාර්යාලය පවසයි.
